សមត្ថកិច្ចខេត្តកោះកុង បានឃាត់ខ្លួនពលរដ្ឋចំនួន ៤នាក់ ដែលមានជម្លោះដីធ្លីជាមួយក្រុមហ៊ុនចិន ញូញៀន (Union Development Group ឬ UDG) នៅព្រឹកព្រលឹមថ្ងៃពុធនេះ ដោយពុំបានបញ្ជាក់ពីមូលហេតុ។
អ្នកស្រី ឆៃ គឹមធុច អះអាងជាពលរដ្ឋរងគ្រោះដីធ្លី និងឃើញហេតុការណ៍នេះ ប្រាប់វីអូឌីថា ចាប់តាំងពីថ្ងៃចន្ទដើមសប្តាហ៍នេះ ពលរដ្ឋប្រមាណ ៦០នាក់ បាននាំគ្នាបោះតង់នៅមុខសាលាខេត្ត រងចាំដំណោះស្រាយរឿងដីធ្លីពីអាជ្ញាធរ លុះដល់ម៉ោងប្រមាណជាង ២ភ្លឺថ្ងៃពុធនេះ ក៏ស្រាប់តែសមត្ថកិច្ចប្រហែលជិត១០០នាក់ បានចុះទៅចាប់ពលរដ្ឋចំនួន ៤នាក់ ដែលកំពុងសំរាន្តលង់លក់ក្រោមតង់នោះ។
អ្នកស្រី ឱ្យដឹងថា ពលរដ្ឋទាំង៤នាក់ ដែលសមត្ថកិច្ចចាប់ខ្លួនទាំងកណ្តាលយប់នោះ រួមមាន អ្នកស្រី ព្រាប រដ្ឋា ជាតំណាងពលរដ្ឋ, អ្នកស្រី ព្រំ គង់, លោក សុខ ពេជ្រ និងម្នាក់ទៀតឈ្មោះ ថាវ ។ អ្នកស្រីថា ករណីសមត្ថកិច្ចចាប់ពលរដ្ឋទាំងនេះ គឺមិនបានប្រាប់ពីមូលហេតុច្បាស់លាស់នោះទេ។
វីអូឌី នៅពុំទាន់អាចសុំការអត្ថាធិប្បាយពីសមត្ថកិច្ចខេត្តកោះកុង បាននៅឡើយទេ នៅព្រឹកថ្ងៃពុធនេះ។
គួររំលឹកថា ពលរដ្ឋប្រមាណ៦០នាក់ ដែលអះអាងថា កំពុងមានជម្លោះដីធ្លីជាមួយក្រុមហ៊ុនចិន ញូញៀនបានប្រមូលផ្តុំគ្នាតវ៉ា និងបោះតង់ដេកមុខសាលាខេត្តកោះកុង តាំងពីថ្ងៃទី២៨ ខែកញ្ញាឆ្នាំ២០២០ ដោយសារជម្លោះដីធ្លីរបស់ពួកគេអូសបន្លាយរយៈពេល១២ឆ្នាំ មកហើយ នៅពុំទាន់មានដំណោះស្រាយពីអាជ្ញាធរ។
តែយ៉ាងណា អភិបាលខេត្តកោះកុង លោកស្រី មិថុនា ភូថង មានប្រសាសន៍កាលពីថ្ងៃចន្ទថា ជម្លោះដីធ្លីរវាងពលរដ្ឋ និងក្រុមហ៊ុនចិនញូញៀននេះ ក្រសួងរៀបចំដែនដី និងអាជ្ញាធរខេត្ត កំពុងដំណើរការសិក្សាបន្ថែមលើអត្តសញ្ញាណរបស់ប្រជាពលរដ្ឋ និងអត្តសញ្ញាណផ្សេងៗទៀត ដើម្បីឈានទៅរកការដោះស្រាយបញ្ចប់វិវាទ៕