ក្រុមហ៊ុនជីបម៉ុងលែន ដែលជាម្ចាស់ទីតាំងទីក្រុងរណបហ្គ្រេនភ្នំពេញ បានច្រានចោលការលើកឡើងរបស់ប្រជាពលរដ្ឋ ដែលថាមានការគំរាមកំហែងដោយអាវុធ ក្រោយពីពួកគេតវ៉ាទាមទារកុំឱ្យក្រុមហ៊ុនលុបស្រះទឹក។
ការបញ្ជាក់របស់ក្រុមហ៊ុន បានធ្វើឡើងក្រោយពីប្រជាពលរដ្ឋមួយចំនួន ដែលមានជីវភាព ធូរធារ រស់នៅក្នុងទីក្រុងរណបហ្គ្រេនភ្នំពេញ ខណ្ឌសែនសុខ រាជធានីភ្នំពេញ បានអះអាង ថា ពួកគេបានរងនូវការគំរាមកំហែងដោយអាវុធ បន្ទាប់ពីបានធ្វើសកម្មភាពតវ៉ា កុំឱ្យមានការលុបស្រះទឹកទំហំ ១០ហិកតា ក្នុងតំបន់នោះ។
ក្រុមហ៊ុន ជីប ម៉ុង លែន បានប្រាប់វីអូឌីនៅថ្ងៃអង្គារនេះថា ក្រុមហ៊ុនពុំបានគំរាមកំហែងដោយអាវុធទៅប្រជាពលរដ្ឋដែលតវ៉ានោះទេ គឺមានតែបង្កើនការការពារសន្តិសុខជូនប្រជាពលរដ្ឋ ខណៈដែលពួកគាត់បានទិញផ្ទះរបស់ក្រុមហ៊ុន។
ក្រុមហ៊ុនបានបញ្ជាក់ថា៖ «ការចោទប្រកាន់ក្រុមហ៊ុនថា គំរាមកំហែងវាប្រាស់ចាកពីការពិត [ក្រុមហ៊ុន]មានតែបង្កើនការការពារ ដាក់សន្តិសុខឱ្យច្រើន មើលការចេញចូលហើយហ្នឹង ទុកឲ្យពួកគាត់ធ្វើអ្វីដែលពួកគិតថាធ្វើទៅតាមសិទ្ធរបស់ពួកគាត់សិនចុះ ពីព្រោះ យើងអត់ចង់ប៉ះពារជាមួយអ្នកតវ៉ា»។
ក្រុមហ៊ុនបានបន្ថែមថា៖ «យើងគ្រាន់តែបានរឹតបណ្តឹងសុវត្ថិភាពខាងក្រុមហ៊ុន ជៀសវាងការចេញចូលរញ៉េរញ៉ៃ ដែលកន្លងមកមាន ការបើកដៃឱ្យអ្នកក្រៅចេញចូលថតនេះថតនោះ បង្កើតជាព័ត៌មានបំភ្លើសមួយចំនួន»។
ក្រុមហ៊ុនជីប ម៉ុង លែន បានបញ្ជាក់ដែរថា ក្រុមហ៊ុននៅតែរក្សាជំហរអភិវឌ្ឍន៍ស្រះទឹកនោះ បើទោះជាប្រជាពលរដ្ឋមួយចំនួនតវ៉ាក៏ដោយ ព្រោះស្រះទឹកនោះបានបម្រើផលប្រយោជន៍តិចណាស់ សម្រាប់ពលរដ្ឋដែលរស់នៅក្បែរនោះ។ ក្រុមហ៊ុន គ្រោងនឹងកែប្រែស្រះទឹកនេះ ឱ្យក្លាយទៅជាសួនឧទ្យានបៃតងចម្រុះដោយមានដើមឈើជាច្រើន កន្លែងហាត់ប្រាណ កន្លែងលេងសម្រាប់កុមារ និងទីតាំងសម្រាប់លំហែអារម្មណ៍ ដោយមានកន្លែងបាញ់ទឹក ហៅថាគម្រោង “Central Park”។
ពាក់ព័ន្ធនឹងករណីនេះ ប្រជាពលរដ្ឋរស់នៅទីកក្រុងរណហ្គ្រេនភ្នំពេញប្រមាណ ១៤០នាក់ ក៏បានស្នើក្រសួងរៀបចំដែនដី ក្រសួងបរិស្ថាន និងរដ្ឋបាលរាជធានីភ្នំពេញ ជួយអន្តរាគមន៍រក្សាទុក និងទប់ស្កាត់ការលុបស្រះទឹកនេះដែរ កាលពីថ្ងៃទី២២ ខែកញ្ញា។
រដ្ឋបាលរាជធានីភ្នំពេញ កាលពីថ្ងៃចន្ទម្សិលមិញ បានចេញសេចក្តីជូនដំណឹងមួយឆ្លើយតបនឹងការស្នើនេះថា រដ្ឋបាលរាជធានីភ្នំពេញ ពុំមានមូលដ្ឋានច្បាប់គ្រប់គ្រាន់ក្នុងការទប់ស្កាត់ការលុបស្រះទឹកនោះឡើយ។
រដ្ឋបាលរាជធានីភ្នំពេញ បន្តថា តាមការចុះស្រាវជ្រាវ និងពិនិត្យឯកសារពាក់ព័ន្ធ គឺស្រះទឹកនោះ ជាកម្មសិទ្ធិរបស់ លោកឧកញ៉ា លាង ឃុន និង លោកឧកញ៉ា លាង ម៉េង ដែលបានទិញពីក្រុមហ៊ុន វ៉ាយ អិល ភី គ្រុប។
រដ្ឋបាលរាជធានីភ្នំពេញ បញ្ជាក់ថា៖ «ការអន្តរគមន៍រក្សាទុក និងទប់ស្កាត់ការលុបស្រះទឹក ខាងលើរបស់រដ្ឋបាលរាជធានីភ្នំពេញ ក្លាយជាទង្វើរំលោភមាត្រា៨៥ និងមាត្រា៨៨ នៃច្បាប់ភូមិបាល ហេតុដូច្នេះរដ្ឋបាលរាជធានីភ្នំពេញ ពុំមានមូលដ្ឋានច្បាប់គ្រប់គ្រាន់ ក្នុងការអន្តរាគមន៍រក្សាទុក និងទប់ស្កាត់បានឡើយ»។
អ្នកនាំពាក្យក្រសួងបរិស្ថាន លោក នេត្រ ភក្ត្រា មានប្រសាសន៍ថា ក្រសួងបានទទួលញត្តិនោះហើយ ហើយក្រសួងនឹងពិនិត្យលើសំណើនេះនិងសម្រេចទៅតាមនីតិវិធី។
លោក អ៊ិន ចាន់នី ប្រធាននាយកប្រតិបត្តិធនាគារអេស៊ីលីដា ដែលមានផ្ទះនៅទីក្រុងរណបហ្គ្រេនភ្នំពេញ និងធ្លាប់ចូលរួមការតវ៉ា បានថ្លែងថា ពួកគាត់នឹងបញ្ឈប់រាល់សកម្មភាពទាមទារឱ្យលុបស្រះទឹកនេះ ហើយនឹងធ្វើការពិភាក្សារកដំណោះស្រាយជាមួយក្រុមហ៊ុន។
កាលពីល្ងាចថ្ងៃចន្ទម្សិលមិញ ប្រជាពលរដ្ឋបានឱ្យដឹងថា កម្លាំងនគរបាល និងកងរាជអាវុធហត្ថខណ្ឌសែនសុខ ដែលប្រដាប់ដោយអាវុធប្រមាណ ៣០នាក់ បានដើរដកហូត និងហែកបដា ដែលប្រជាពលរដ្ឋបានចងនៅតាមរបងផ្ទះ។
អ្នកស្រី ពរ ពន្ធណារាយ ជាប្រជាពលរដ្ឋរស់នៅក្នុងទីក្រុងរណបហ្គ្រេនភ្នំពេញ បានចាត់ទុកការដាក់កម្លាំងប្រដាប់ដោយអាវុធ ចុះមកដកហូតបដានេះថា ជាការគំរាមកំហែង និងបង្កការភ័យខ្លាចដល់ប្រជាពលរដ្ឋដែលតវ៉ា។
អ្នកស្រីថា៖ «ខ្ញុំជាប្រជាពលរដ្ឋរស់នៅក្នុងហ្នឹង ហើយគាត់អត់មានបានមកសួរផងហ្នឹង។ គាត់មកដល់ គាត់ចាប់ហែកហើយនិយាយបំភ្លើស»។
អ្នកស្រីបន្ថែមថា៖ «ខ្ញុំពិតជាសោកស្តាយមែនទេដែលទិញផ្ទះនេះ រស់នៅជាង១០ឆ្នាំហើយ មិនដែលមានបញ្ហាបែបនេះទេ ទើបតែក្រុមហ៊ុនថ្មីជីបម៉ុងមកធ្វើចឹង មកបំភិតបំភ័យ អ្នកដែលរស់នៅពីមុន អត់ល្អសោះតែម្តង ខ្ញុំអត់គាំទ្រទេដែលក្រុមហ៊ុនថ្មីធ្វើចឹង»។
លោក ម៉ូវ ម៉ានិត អភិបាលខណ្ឌសែនសុខ បានបដិសេធធ្វើការអត្ថធិប្បាយពាក់ពាក់ករណីនេះ។
នាយិកាប្រតិបត្តិមជ្ឈមណ្ឌលសិទ្ធិមនុស្សកម្ពុជា អ្នកស្រីចក់ សុភាព លើកឡើងថា តាមច្បាប់ជាតិ និងអន្តរជាតិ ប្រជាពលរដ្ឋ មានសិទ្ធសេរីភាពក្នុងការបញ្ចេញមតិ និងប្រមូលផ្តុំដោយសន្តិវិធី ហើយអាជ្ញាធរគួរបង្កបរិយាកាសអំណោយផល និងមិនគួរមានការគំរាមកំហែងដល់ការអនុវត្តសិទ្ធិរបស់ពលរដ្ឋនោះទេ។
អ្នកស្រីបានបញ្ជាក់ថា៖ «ខ្ញុំសង្ឃឹមថា អ្នកអភិជនដែលមានបំណងការពារស្រះបែបនេះ នឹងមិនត្រូវបានគេចោទប្រកាន់ស្រដៀងគ្នានឹងយុវជន ឬសកម្មជនកន្លងមកនេះទេ ព្រោះការចូលរួមការពារបរិស្ថាន គួរត្រូវបានសាទរ ហើយការលើកកង្វល់ឬស្នើឱ្យមានដំណោះស្រាយណាមួយពីអាជ្ញាធរ ឬភាគីពាក់ព័ន្ធ មិនគួរត្រូវបានចាត់ទុកជាបទល្មើសនោះឡើយ»៕
