នគរបាលប្រឆាំងភេរវកម្មមួយរូបនៃក្រសួងមហាផ្ទៃ ត្រូវបានកោះហៅទៅសាកសួរនៅថ្ងៃនេះ បន្ទាប់ពីមានបណ្ដឹងចោទថា បានយកកាំភ្លើងខ្លីភ្ជង់ថៅកែហាងគុយទាវមួយអំឡុងពេលផឹកស៊ី។
ក្នុងបណ្ដឹងមួយដែលត្រូវបានដាក់ទៅសាលាដំបូងរាជធានីភ្នំពេញកាលពីថ្ងៃម្សិលមិញនេះ ថៅកែហាងគុយទាវអង្គរជុំ ស្ថិតនៅក្នុងខណ្ឌទួលគោក លោក ជុយ សុខហេង បានចោទប្រកាន់ប្រធានការិយាល័យប្រឆាំងភេរវកម្មនៃក្រសួងមហាផ្ទៃ លោក ថ្លាង ភិនរ៉ា ថាបានប្រើប្រាស់កាំភ្លើងខ្លីគំរាមបាញ់សម្លាប់រូបលោកនិងភរិយាអំឡុងពេលផឹកស៊ីជុំគ្នា។
ភ្ជាប់ជាមួយបណ្ដឹងនោះ វីដេអូពីកាមេរ៉ាសុវត្ថិភាពរយៈពេលប្រហែល៣នាទី បង្ហាញបុរសម្នាក់ស្ថិតក្នុងសម្លៀកបំពាក់ស៊ីវិល បានឈររួមតុអាហារមួយជាមួយមនុស្ស៣នាក់ផ្សេងទៀត ហើយបន្ទាប់មក បុរសរូបនោះបានដកកាំភ្លើងយកមកអាមេ និងបញ្ចេញកាយវិការចង្អុលទៅអ្នករួមតុ។
អ្នកនាំពាក្យសាលាដំបូងរាជធានីភ្នំពេញ លោក គុជ គឹមឡុង បានប្រាប់ថា ស្ថាប័នអយ្យការបានទទួលពាក្យបណ្ដឹងប្រឆាំងនឹងមន្ត្រីនគរបាលរូបនេះរួចហើយ ហើយលោកប្រាប់ឱ្យរង់ចាំចំណាត់ការបន្តចេញដោយតុលាការនាពេលខាងមុខ។
ក្រៅពីប្ដឹងទៅតុលាការ ថៅកែហាងគុយទាវអង្គរជុំ ក៏បានដាក់បណ្ដឹងទៅរដ្ឋមន្ត្រីក្រសួងមហាផ្ទៃ លោក ស ខេង ផងដែរ។
វីអូឌីមិនអាចស្នើសុំការឆ្លើយតបពីអ្នកនាំពាក្យក្រសួងមហាផ្ទៃ លោក ខៀវ សុភ័គ បានទេនៅថ្ងៃនេះ ដោយទូរសព្ទចូលគ្មានអ្នកទទួល។
អ្នកនាំពាក្យនគរបាលជាតិ លោក ឆាយ គឹមខឿន បានប្រាប់វីអូឌីនៅថ្ងៃនេះថា អគ្គស្នងការនគរបាលជាតិ លោក នេត សាវឿន បានបញ្ជាឱ្យកោះហៅលោក ថ្លាង ភិនរ៉ា ទៅសាកសួរហើយ។
មន្ត្រីនគរបាលរូបនេះប្រាប់ថា សកម្មភាពនៅក្នុងវីដេអូកាមេរ៉ាសុវត្ថិភាព បង្ហាញពីទង្វើខុសច្បាប់របស់មន្ត្រីក្រសួងមហាផ្ទៃ ដែលលោកថា អាចនឹងរងពិន័យរដ្ឋបាលនិងផ្លូវច្បាប់ផងដែរ។ ប៉ុន្តែ លោក គឹមខឿន បដិសេធផ្ដល់ព័ត៌មានលម្អិតជុំវិញករណីនេះ។
លោក ឆាយ គឹមខឿន ប្រាប់ថា៖ «បើគាត់ត្រូវគ្នា ក៏គាត់ត្រូវទទួលទោសក្នុងនាមបំពានទៅលើវិន័យកងកម្លាំង។ ទីពីរ បើមិនឯកភាពគ្នាទេ ស្រេចតែភាគី បើគេរុញទៅតុលាការ យើងអនុវត្តនីតិវិធីតាមបណ្តឹងអាជ្ញា»។
អ្នកស្រី ពៅ ឌីណា អាយុ៣០ឆ្នាំ ដែលជាភរិយារបស់ថៅកែហាងគុយទាវអង្គរជុំ ប្រាប់ថា សមត្ថកិច្ចមិនទាន់បានកោះហៅអ្នកស្រីនិងស្វាមីចូលបំភ្លឺនៅឡើយទេ ក្រោយពីក្រុមគ្រួសារអ្នកស្រីដាក់បណ្ដឹងទៅនគរបាលជាតិកាលពីថ្ងៃម្សិលមិញនេះ។ អ្នកស្រី ពៅ ឌីណា បានអំពាវនាវទៅសមត្ថកិច្ចឱ្យចាត់វិធានការទៅលើលោក ថ្លាង ភិនរ៉ា ដើម្បីផ្ដល់យុត្តិធម៌ជូនក្រុមគ្រួសារអ្នកស្រី។
អ្នកស្រី ពៅ ឌីណា ប្រាប់ថា៖ «[គាត់]ដកកាំភ្លើងហើយគាត់អាមេ គាត់ឈរបញ្ជូលគ្រាប់។ ដល់ពេលឃើញបញ្ជូលគ្រាប់ បង[អ្នកផឹកជាមួយ]នៅជិតហ្នឹង គាត់ភ័យ។ គាត់ថា បើចង់បាញ់វា[បាញ់ប្តីខ្ញុំ] បាញ់ខ្ញុំមក។ [ជនបង្ក] អត់ទេ! ខ្ញុំត្រូវបាញ់ទាំងពីរនាក់ប្តីប្រពន្ធឱ្យងាប់តែម្តង ហើយខ្ញុំដើរចូលគុកតែម្តង។ ទាំងខ្ញុំអត់ដឹងអ្វីសោះ ខ្ញុំចង់ឱ្យសមត្ថកិច្ចជួយរកយុត្តិធម៌ឱ្យខ្ញុំ អនុវត្តតាមច្បាប់»។
ថៅកែហាងគុយទាវអង្គរជុំ ក៏បានដាក់បណ្ដឹងទៅគណៈមេធាវីផងដែរ ដោយសារលោក ថ្លាង ភិនរ៉ា ក៏ជាសមាជិកមួយរូបនៃគណៈមេធាវីផងដែរ។
បញ្ជីគណៈមេធាវីកម្ពុជាដែលវីអូឌីបានមើលឃើញនៅថ្ងៃនេះ បង្ហាញថា មន្ត្រីនគរបាលរូបនេះក៏ជាមេធាវីមួយរូប ប៉ុន្តែបានស្នើសុំមិនប្រកបវិជ្ជាជីវៈ។
លោក ថ្លាង ភិនរ៉ា បានបដិសេធឆ្លើយតបនៅថ្ងៃនេះ នៅពេលវីអូឌីស្វែងរកការបកស្រាយពីលោក។
អគ្គលេខាធិការរងគណៈមេធាវីកម្ពុជា លោក លីវ សុវណ្ណា បានប្រាប់ថា គណៈមេធាវីបានទទួលបណ្ដឹងរួចហើយ ហើយក៏ត្រូវបានចាត់បញ្ជូនទៅក្រុមប្រឹក្សាវិន័យផងដែរ។
តំណាងគណៈមេធាវីរូបនេះបញ្ជាក់ថា មេធាវីណាម្នាក់ដែលជាសមាជិករបស់គណៈមេធាវី នឹងត្រូវលុបឈ្មោះចេញពីបញ្ជីគណៈមេធាវី ប្រសិនបើត្រូវបានតុលាការរកឃើញមានទោស។
លោក លីវ សុវណ្ណា ប្រាប់ថា៖ «បើសិនជាយើងមានសេចក្តីសម្រេចស្ថាពររបស់តុលាការ ថាគាត់ត្រូវបានផ្តន្ទាទោសក្នុងរឿងព្រហ្មទណ្ឌ កម្រិតពិន័យតាមច្បាប់យើង ទណ្ឌកម្មអាចលុបឈ្មោះចេញពីបញ្ជីមេធាវី»។
ប្រសិនបើត្រូវបានតុលាការផ្ដន្ទាទោស មន្ត្រីនគរបាលរូបនេះត្រូវប្រឈមមុខទោសជាប់ពន្ធនាគារពី៦ខែទៅ២ឆ្នាំ និងពិន័យប្រាក់ចន្លោះពី១លានរៀលដល់៤លានរៀល ក្រោមមាត្រា២៣៣នៃក្រមព្រហ្មទណ្ឌ។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ លោក អំ សំអាត សង្កេតឃើញថា មួយរយៈនេះ មានមន្ត្រីសមត្ថកិច្ចមួយចំនួនយកកំាំភ្លើងទៅគំរាមកំហែងនិងភ្ជង់ប្រជាពលរដ្ឋដោយខុសច្បាប់ ប៉ុន្តែភាគច្រើន ថ្នាក់ដឹកនាំក្រសួងបានត្រឹមតែដាក់ទណ្ឌកម្មវិន័យតែប៉ុណ្ណោះ។ ករណីនេះ លោកថា បើរកឃើញបទល្មើសព្រហ្មទណ្ឌ ហើយបានត្រឹមតែដាក់ទណ្ឌកម្មវិន័យ ដោយមិនបញ្ជូនទៅតុលាការចាត់វិធានការច្បាប់បន្ត នឹងធ្វើឱ្យប៉ះពាល់ដល់មុខមាត់ស្ថាប័ននោះ។
លោក អំ សំអាត ប្រាប់ថា៖ «បើសិនជារកទៅឃើញមានបទល្មើសព្រហ្មទណ្ឌ មិនបញ្ជូនទៅតុលាការដើម្បីអនុវត្តច្បាប់ទេ វាជាគំរូអាក្រក់មួយ វាអាចនឹងប៉ះពាល់កិត្តិយសរបស់កងកម្លាំងទាំងមូល យើងត្រូវតែអនុវត្តច្បាប់»៕
