អាជ្ញាធរខេត្តកណ្ដាល អះអាងថា ភាគីវៀតណាមបានសង់សំណង់រឹងឡើងដល់ទៅ១០ទីតាំងហើយនៅតាមបណ្តោយព្រំដែនដែលប្រទេសទាំងពីរមិនទាន់ឯកភាពគ្នា ស្ថិតក្នុងខេត្តកណ្តាល ខណៈជាង១០ទីតាំងផ្សេងទៀតជាតង់កៅស៊ូ។
ស្នងការនគរបាលខេត្តកណ្ដាល បានរាយការណ៍កាលពីចុងខែសីហាថា វៀតណាមបានសាងសង់ជម្រករឹងមាំធ្វើពីឈើសសរថ្ម កម្ពស់៣ម៉ែត្រ ទំហំ៥ម៉ែត្រគុណនឹង៤ម៉ែត្រ ដំបូលប្រក់ស័ង្កសី ស្ថិតនៅចម្ងាយប្រមាណ១២០ម៉ែត្រពីខ្សែបន្ទាត់ព្រំដែនកម្ពុជា-វៀតណាមដែលមិនទាន់ឯកភាពគ្នា។
ក្នុងបទសម្ភាសកាលពីដើមខែនេះ អភិបាលខេត្តកណ្ដាល លោក គង់ សោភ័ណ្ឌ បានប្រាប់ថា សំណង់រឹងចំនួន៦កន្លែង ស្ថិតនៅតាមបណ្ដោយព្រំដែនរវាងប្រទេសទាំងពីរក្នុងខេត្តកណ្ដាល ត្រូវបានភាគីវៀតណាមកែប្រែពីជម្រកតង់។
ប៉ុន្តែលោក គង់ សោភ័ណ្ឌ ប្រាប់វីអូឌីនៅថ្ងៃនេះថា វៀតណាមបានសាងសង់សំណង់រឹងមាំបែបនេះឡើងដល់១០ទីតាំង ហើយសម្រាប់ជម្រកជាតង់វិញមានចំនួន១៧ទីតាំង នៅតាមខ្សែបន្ទាត់ព្រំដែនដែលមិនទាន់ឯកភាពគ្នា។
លោក គង់ សោភ័ណ្ឌ ប្រាប់ថា៖ «ជាក់ស្ដែង គាត់រើអាតង់កៅស៊ូគាត់ហ្នឹង កន្លែងដែលគាត់ធ្វើជាតង់កៅស៊ូប្ដូរទៅជាប្រក់ស័ង្កសី តង់កៅស៊ូវាទាបៗ គាត់ប្ដូរទៅជាសសរ ហើយសសរខ្លះជាឈើ សសរខ្លះជាថ្ម ហើយប្រក់ស័ង្កសី»។
អភិបាលខេត្តរូបនេះបន្តថា ភាគីកម្ពុជានៅតែទទូចឱ្យវៀតណាមរុះរើសំណង់រឹងមាំនិងតង់ទាំង២៧ទីតាំង នៅតាមបណ្ដោយខ្សែបន្ទាត់ព្រំដែន ស្ថិតក្នុងស្រុកលើកដែក និងស្រុកកោះធំចេញវិញ ប៉ុន្តែភាគីវៀតណាមតែងតែស្នើសុំឱ្យកម្ពុជាទុកពេលមួយរយៈទៀត ដើម្បីទប់ស្កាត់ជំងឺកូវីដ១៩។
ប្រធានគណៈកម្មាធិការចម្រុះកិច្ចការព្រំដែនកម្ពុជា លោក វ៉ា គឹមហុង ប្រាប់ថា ស្ថាប័នលោកមិនទាន់មានសេចក្ដីសម្រេចថ្មីឆ្លើយតបទៅវៀតណាមនៅឡើយទេ ។
លោក វ៉ា គឹមហុង ប្រាប់ថា៖ «ខ្ញុំមិនទាន់មានវិធានការអីនៅឡើយទេ យើងកំពុងសិក្សាពីដំណើរការទៅមុខទៀត»។
អ្នកនំាពាក្យក្រសួងការបរទេសកម្ពុជា លោក កុយ គួង ប្រាប់តាមប្រព័ន្ធតេឡេក្រាមនៅថ្ងៃនេះថា ក្រសួងកំពុងរង់ចាំការបញ្ជាក់ពីទីតាំងសំណង់ទាំងនោះពីគណៈកម្មការព្រំដែនចម្រុះសិន។
ប្រធានក្រុមប្រឹក្សាឃ្លាំមើលកម្ពុជា មានមូលដ្ឋាននៅក្រៅប្រទេស លោក ម៉ែន ណាត យល់ថា វៀតណាមនៅតែប្រព្រឹត្តទង្វើដដែលនេះ ដោយសារតែកម្ពុជាមិនបានយកករណីនេះប្ដឹងទៅសហគមន៍អន្តរជាតិនោះឡើយ។
លោក ម៉ែន ណាត ប្រាប់ថា៖ «លោក ហ៊ុន សែន ជាអធិបតី ត្រូវហៅគណៈកម្មាធិការនិងក្រសួងការបរទេស ត្រូវជំនុំគ្នា ដើម្បីធ្វើពាក្យបណ្ដឹងវៀតណាមពីការរំលោភបូរណភាពទឹកដីនិងការគំរាមកំហែងកម្ពុជា ទោះបីជាសង់សំណង់រឹងក៏ដោយ ទន់ក៏ដោយ ដើម្បីឱ្យស្របទៅគោលការណ៍សមាគមអាស៊ាន ស្របតាមកិច្ចព្រមព្រៀងទីក្រុងប៉ារីស និងស្របយន្តកាលអន្តរជាតិ ដែលមានតុលាការយុត្តិធម៌អន្តរជាតិជាមូលដ្ឋាន។ ដូច្នេះ បើយើងធ្វើច្បាប់អន្តរជាតិ ប្ដឹងតាមយន្តកាលអន្តរជាតិ យើងធានាបាននូវការគ្មានសង្គ្រាមរវាងប្រទេស»។
កន្លងទៅ កម្ពុជាធ្លាប់បានកោះហៅឯកអគ្គរដ្ឋទូតវៀតណាមប្រចាំកម្ពុជាឱ្យបំភ្លឺ ក្រោយពីយោធាវៀតណាមបានចល័តទីតាំងឈរជើងបោះតង់តាមបណ្តោយព្រំដែនក្នុងតំបន់មិនទាន់ឯកភាពគ្នា។
ចំណែកគណៈកម្មាធិការទទួលបន្ទុកកិច្ចការព្រំដែនកម្ពុជា ក៏បានបញ្ជាក់កាលពីថ្ងៃទី១១ ខែមិថុនាដែរថា ចាប់តាំងពីផ្ទុះជំងឺកូវីដ១៩មក ភាគីវៀតណាមបានបោះតង់នៅតាមបណ្តោយព្រំដែនកម្ពុជា-វៀតណាម ទាំងតំបន់មិនទាន់ឯកភាពនិងតំបន់ឯកភាពគ្នារួច មានចំនួន២៥៦ទីតាំង៕
