អាជ្ញាធររាជធានីភ្នំពេញ នៅព្រឹកថ្ងៃចន្ទនេះ បានរារាំងប្រជាពលរដ្ឋជាង១០០០នាក់ ដែលមានបញ្ហាដីធ្លី មិនឱ្យដើរទៅកាន់ភូមិគ្រឹះលោកនាយករដ្ឋមន្ត្រី ហ៊ុន សែន ខណៈពលរដ្ឋទាំងនោះ ព្យាយាមទៅសុំការអន្តរាគមន៍រឿងវិវាទដីធ្លី។
ប្រជាពលរដ្ឋទាំងនោះ មកពីខេត្តចំនួន៤ រួមមាន ខេត្តកោះកុង ស្វាយរៀង ព្រះសីហនុ និងត្បូងឃ្មុំ។
ពួកគាត់បាននាំគ្នាមកប្រមូលផ្តុំនៅមុខក្រសួងរៀបចំដែនដី ក្នុងខណ្ឌចំការមន និងគ្រោងបន្តដំណើរដោយថ្មើរជើងទៅកាន់ភូមិគ្រឹះលោកនាយករដ្ឋមន្ត្រី ហ៊ុន សែន ក្បែរវិមានឯករាជ្យ ប៉ុន្តែត្រូវបានអាជ្ញាធរដាក់កម្លាំងរារាំង និងរុញច្រានឱ្យពួកគេឱ្យទៅលើចិញ្ចើមផ្លូវវិញ ក្រោមហេតុផលបញ្ចៀសការកកស្ទះចរាចរណ៍។
អ្នកសារព័ត៌មានវីអូឌី ដែលចុះយកព័ត៌មាននេះ បានឱ្យដឹងដែរថា ក្នុងអំឡុងពេលមានការរារាំង និងរុញច្រាននោះ មានស្ត្រីម្នាក់បានសន្លប់ផងដែរ។
អាជ្ញាធររាជធានីភ្នំពេញ ដែលស្ថិតនៅទីតាំងប្រមូលផ្តុំ បានប្រកាសតាមឧឃោសនស័ព្ទថា ការតវ៉ារបស់ពលរដ្ឋធ្វើឡើងដោយខុសច្បាប់ និងតម្រូវឱ្យពួកគេឡើងទៅលើចិញ្ចើមផ្លូវមុខក្រសួងវិញ ដើម្បីកុំឱ្យកកស្ទះចរាចរណ៍នៅកំណាត់ផ្លូវមុនីវង្ស។
អ្នកស្រី ផាវ ញ៉ើង តំណាងពលរដ្ឋមកពីខេត្តកោះកុង បានឱ្យដឹងថា ការដែលពួកគាត់ទៅប្រមូលផ្តុំមុខក្រសួង ក្នុងគោលបំណងសុំឱ្យក្រសួងជួយដោះស្រាយបញ្ចប់ទំនាស់ដីធ្លីរបស់ពួកគាត់ និងអភិវឌ្ឍន៍ផ្លូវ ព្រមទាំងប្រមូលផ្តុំដើម្បីអបអរទិវាសនិ្តភាពពិភពលោក លើកទី៣៩ ក្រោមប្រធានបទ “គ្មានសិទ្ធិដីធ្លី គ្មានសន្តិភាព”។
អ្នកស្រីថា៖ «សូមឱ្យឯកឧត្តម ជា សុផារ៉ា [រដ្ឋមន្ត្រីក្រសួងរៀបចំដែនដី]ជួយដោះស្រាយឲ្យពួកយើង បើមិនបានដី ពួកយើងមិនទៅវិញទេ»។
វីអូឌី ពុំអាចសុំការបញ្ជាក់ពីតំណាងក្រសួងរៀបចំដែនដី និងអាជ្ញាធររាជធានីភ្នំពេញ បាននៅឡើយទេ នៅព្រឹកនេះ៕