តំណាងរដ្ឋាភិបាលកម្ពុជាប្តេជ្ញាប្រាប់អង្គការសហប្រជាជាតិ ក្នុងការលើកកម្ពស់និងការពារសិទ្ធិដល់មនុស្សគ្រប់រូប ដោយឥតងាករេ។
ក្នុងបទអន្តរាគមន៍ របស់ឯកអគ្គរាជទូត និងតំណាងអចិន្ត្រៃយ៍កម្ពុជានៅអង្គការសហប្រជាជាតិលោក អាន សុខខឿន លើកឡើងថា កម្ពុជាប្តេជ្ញាចិត្ត និងក្នុងការលើកកម្ពស់ការគោរពសិទ្ធិមនុស្ស និង បើកទូលាយក្នុងការធ្វើកិច្ចការនេះជាមួយភាគីផ្សេងៗ។
លោក អាន សុខខឿន៖«កម្ពុជាសូមបញ្ជាក់ជាថ្មីនូវការប្តេជ្ញាចិត្តឥតងាករេរបស់ខ្លួន ក្នុងការលើកកម្ពស់ និងការពារសិទ្ធិមនុស្សសម្រាប់គ្រប់រូប និងផ្តល់សារៈសំខាន់យ៉ាងខ្លាំងចំពោះការចូលរួម យ៉ាងសកម្មរបស់គ្រប់ភាគីពាក់ព័ន្ធទាំងអស់»។
តំណាងរបស់កម្ពុជាក៏បានលើកឡើងថា ការផ្តល់សិទ្ធិឱ្យអតីតមន្ត្រីគណបក្សសង្គ្រោះជាតិបានចូលធ្វើនយោបាយវិញជាបន្តបន្ទាប់នោះ ក៏បង្ហាញថា កម្ពុជាឱ្យតម្លៃខ្ពស់លើពហុយោបល់ផងដែរ។
អ្នកនាំពាក្យឧត្តមស្នងការអង្គការសហប្រជាជាតិ លោកស្រី រ៉ាវីណា ស្សាមដាសានី (Ravina Shamdasani) លើកឡើងកាលពីថ្ងៃ១១ ខែកញ្ញា ថា មន្ត្រីរបស់ខ្លួនបានឃើញផ្ទាល់ភ្នែក នូវការប្រើប្រាស់កម្លាំងមិនចាំបាច់ និងជ្រុលហួសហេតុរបស់កងកម្លាំងសន្តិសុខប្រឆាំងនឹងក្រុមអ្នកតវ៉ាជាស្ត្រី យ៉ាងតិចចំនួន ៥លើកផ្សេងគ្នា ក្នុងរយៈពេលប៉ុន្មានសប្តាហ៍ចុងក្រោយនេះ៕
