មន្ត្រីសុខាភិបាលខេត្តបាត់ដំបង បានបញ្ជូនសំណាកព្រះសង្ឃចំនួន៤៦អង្គ គង់នៅវត្តស្វាយដង្គំ ស្រុកឯកភ្នំ មកកាន់មន្ទីរពិសោធន៍នៅរាជធានីភ្នំពេញ ដើម្បីធ្វើតេស្តរកអាការរោគ ក្រោយពីព្រះសង្ឃទាំងនោះមានអាការក្តៅខ្លួនជិតមួយសប្តាហ៍មកហើយ។
ប្រធានមន្ទីរសុខាភិបាលខេត្តបាត់ដំបង លោក រឿន ប៊ុនរ៉េត មានប្រសាសន៍ប្រាប់វីអូឌីនៅថ្ងៃចន្ទនេះថា មានករណីព្រះសង្ឃចំនួន៤៦អង្គ ដែលមានព្រះជន្មពី១១ទៅ១៩ព្រះវស្សា ដែលនិមិន្តមកពីតាមខេត្តនានា ដើម្បីសិក្សានៅសាលាពុទ្ធិកបឋមសិក្សាក្នុងវត្តស្វាយដង្គំ មានអាការក្តៅខ្លួន ក្អក ហៀរសំបោរ រយៈពេល៦ថ្ងៃមកហើយ។
លោកបន្តថា បន្ទាប់ពីទទួលបានព័ត៌មាននេះ អាជ្ញាធរខេត្តបានចុះទៅពិនិត្យនិងយកសំណាកព្រះសង្ឃទាំងនោះជាបន្តបន្ទាប់កាលពីយប់ថ្ងៃម្សិលមិញនិងនៅថ្ងៃចន្ទ បញ្ជូនមកមន្ទីរពិសោធន៍នៅរាជធានីភ្នំពេញ ដើម្បីរកមូលហេតុ ដោយលទ្ធផលអាចនឹងដឹងនៅថ្ងៃស្អែក។
អនុប្រធានមន្ទីរសុខាភិបាលខេត្តបាត់ដំបង វេជ្ជបណ្ឌិត អ៊ុក វិទ្យា បានមានប្រសាសន៍បន្ថែមថា តាមការពិនិត្យអាការ មន្ត្រីសុខាភិបាលបានសន្និដ្ឋានជាបឋមថា ព្រះសង្ឃទាំងនោះឆ្លងជំងឺផ្តាសាយ ហើយបច្ចុប្បន្នមន្ទីរបានរៀនចំតាមវិធានការសុខាភិបាលហើយ។
លោកថា៖ «ព្រះសង្ឃប្រាំមួយអង្គហ្នឹង គឺមានអាការរោគក្តៅ ក្អក ឈឺបំពង់ក អ៊ីចឹងអាចជា [ជំងឺ] ផ្តាសាយ ដោយសារព្រះសង្ឃទាំង៤៦អង្គ ជាអង្គក្មេងៗ។ ហើយព្រះអង្គនិមន្តមកវត្តហ្នឹង គឺមកដើម្បីសិក្សានៅសាលាពុទ្ធិកបឋមសិក្សា ហើយក៏មានជំងឺផ្តាសាយឆ្លងគ្នា អ៊ីចឹងក្រុមការងារបានចុះពិនិត្យមើលហើយ»។
លោក អ៊ុក វិទ្យា បានបញ្ជាក់ថា បច្ចុប្បន្ន អាការរបស់ព្រះសង្ឃទាំង៤៦អង្គមិនធ្ងន់ធ្ងរទេ ខណៈកម្តៅមានចន្លោះពី៣៧ទៅ៣៧,៨អង្សារ និងកំពុងស្ថិតក្រោមការព្យាបាលនិងការបន្តតាមដានយ៉ាងយកចិត្តទុកដាក់ពីក្រុមគ្រូពេទ្យ។
លោកបន្ថែមថា៖ «យើងតាមដានព្យាបាលលោក [ព្រះសង្ឃ] ទៅ តាមរោគសញ្ញាសិនទៅ ហើយដាក់ព្រះអង្គឱ្យនៅដាច់ដោយឡែកពីគ្នា ពាក់ម៉ាស់ពាក់អីទៅ មិនអនុញ្ញាតឱ្យទៅសូត្រមន្តឬឡើងទៅសាលាឆាន់ ឆាន់រួមជាមួយព្រះសង្ឃដទៃទៀតទេ»។
កាលពីដើមខែកញ្ញានេះ អ្នកជាប់ឃុំចំនួន១៤៧នាក់នៅក្នុងពន្ធនាគារខេត្តព្រះវិហារ មានអាការក្តៅខ្លួនខ្លាំង ក្អក និងហៀរសំបោរផងដែរ ហើយករណីនេះ ត្រូវបានមន្ត្រីសុខាភិបាលបញ្ជាក់ថា ពួកគេឆ្លងជំងឺគ្រុនផ្តាសាយធំ (Influenza A)៕
