កម្ពុជាចាត់ទុកថាអ្នកនាំពាក្យឧត្តមស្នងការអង្គការសហប្រជាជាតិ ប្រចាំទីក្រុងហ្សឺណែវ ប្រទេសស្វីស មានកំហុសឆ្គងក្នុងការធ្វើសេចក្តីសន្និដ្ឋានដែលអាចបណ្តាលឱ្យមានការភាន់ច្រឡំបកស្រាយថា កម្ពុជាមានការរំលោភសិទ្ធិមនុស្ស។
ករណីនេះធ្វើឡើងបន្ទាប់ពីអ្នកនាំពាក្យឧត្តមស្នងការអង្គការសហប្រជាជាតិ លោកស្រី រ៉ាវីណា ស្សាមដាសានី (Ravina Shamdasani) លើកឡើងកាលពីថ្ងៃ១១ ខែកញ្ញា ថា មន្ត្រីរបស់ខ្លួនបានឃើញផ្ទាល់ភ្នែក នូវការប្រើប្រាស់កម្លាំងមិនចាំបាច់ និងជ្រុលហួសហេតុរបស់កងកម្លាំងសន្តិសុខប្រឆាំងនឹងក្រុមអ្នកតវ៉ាជាស្ត្រី យ៉ាងតិចចំនួន ៥លើកផ្សេងគ្នា ក្នុងរយៈពេលប៉ុន្មានសប្តាហ៍ចុងក្រោយនេះ។
ក្នុងសេចក្តីថ្លែងការណ៍ព័ត៌មានរបស់ស្ថានបេសកកម្មអចិន្ត្រៃយិ៍របស់កម្ពុជា ប្រចាំអង្គការសហប្រជាជាតិ និងអង្គការអន្តរជាតិនានានៅទីក្រុងហ្សឺណែវ កាលពីថ្ងៃទី១១ ខែកញ្ញានេះថា ការអនុវត្តសេរីភាពបញ្ចេញមតិ បង្កើតសមាគម ការប្រមូលផ្តុំដោយសន្តិវិធី ការចាប់ខ្លួន ឬឃុំខ្លួន ត្រូវអនុវត្តស្របតាមច្បាប់ជាតិ និងអន្តរជាតិ ពោលកម្ពុជាពុំអនុញាតឲ្យមានការចាប់ខ្លួនតាមតែអំពើចិត្តនោះឡើយ។
បន្ថែមពីនេះ បុគ្គលដែលមានជម្លោះផ្លូវច្បាប់ មានឱកាសពេញលេញចូលរួមសវនាការដោយយុត្តិធម៌ ដើម្បីបង្ហាញពីភស្តុតាងដោះបន្ទុក ចំពោះការចោទប្រកាន់ក្នុងប្រព័ន្ធតុលាការ ដែលជាផ្នែកមួយទទួលបានសិទ្ធិជំនុំជំរះត្រឹមត្រូវ ធានាដោយរដ្ឋធម្មនុញ្ញកម្ពុជា។
ករណីនេះ កម្ពុជាចាត់ទុកការអះអាងរបស់អ្នកនាំពាក្យឧត្តមស្នងការអង្គការសហប្រជាជាតិនោះថា ធ្វើការសន្និដ្ឋានខុសឆ្គង អាចធ្វើឲ្យសាធារណៈជនមានការភាន់ច្រឡំ ហើយត្រូវបានគេបកស្រាយថា ជាការជ្រៀតជ្រែកក្នុងប្រព័ន្ធ យុត្តិធម៌របស់រដ្ឋអធិបតេយ្យ។
សេចក្តីថ្លែងការណ៍ដដែល ជំរុញទៅអ្នកនាំពាក្យឧត្តមស្នងការអង្គការសហប្រជាជាតិរូបនោះ ផ្តល់តម្លៃទំនាក់ទំនងពិតប្រាកដជាមួយរដ្ឋាភិបាលកម្ពុជា ដើម្បីកុំឲ្យសាធារណៈជនមានការភាន់ច្រឡំថា កម្ពុជារំលោភសិទ្ធិមនុស្ស និងរក្សាការទុកចិត្ត សន្យានុម័ត និងឯករាជ្យរបស់ស្ថាប័នអង្គការសហប្រជាជាតិទទួលបន្ទុកសិទ្ធិមនុស្សមួយនេះផងដែរ។
លោក រ៉ុង ឈុន សមាជិកក្រុមប្រឹក្សាឃ្លាំមើលកម្ពុជា ដែលតែងតែនិយាយរិះគន់រដ្ឋាភិបាល ពីបញ្ហាព្រំដែនកម្ពុជា-វៀតណាម ត្រូវបានអាជ្ញាធរប្រមាណជិត៣០នាក់ កាលពីថ្ងៃទី៣១ ខែកក្កដា ឆ្នាំ២០២០។
ក្រោយមកនៅកំឡុងខែសីហា ឆ្នាំ២០២០ យុវជនដែលគាំទ្រមួយចំនួន បាននាំគ្នាធ្វើបាតុកម្មដោយសន្តិវិធីទាមទារឲ្យរដ្ឋាភិបាលដោះលែងលោក រ៉ុង ឈុន វិញ ប៉ុន្តែសមត្ថកិច្ចបានចាប់ខ្លួនក្រុមយុវជនបន្តបន្ទាប់ ចំនួន ៦នាក់ទៀត នឹងចោទប្រកាន់ថា ញុះញង់ឱ្យមានការប្រព្រឹត្តបទឧក្រិដ្ឋជាអាទិ៍ ពាក់ព័ន្ធនឹងបញ្ហាព្រំដែន។
ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស លោកស្រី រ៉ាវីណា ស្សាមដាសានី (Ravina Shamdasani) ក៏បានអំពាវនាវឲ្យរដ្ឋាភិបាលដោះលែងសកម្មជនសិទ្ធិមនុស្ស និងសកម្មជនបរិស្ថានទាំងអស់ ជាបន្ទាន់ ដោយឥតលក្ខខណ្ឌ ហើយបញ្ឈប់ការបំភិតបំភ័យមកលើតួអង្គសង្គមស៊ីវិល និងអំពាវនាវឲ្យកងកម្លាំងសន្តិសុខ បញ្ឈប់ការប្រើប្រាស់កម្លាំងដោយមិនចាំបាច់ និងជ្រុលហួសហេតុពេកទៅលើក្រុមអ្នកតវ៉ាដោយសន្តិវិធី៕
