សមាគម សម្ព័ន្ធនិស្សិតបញ្ញវន្តខ្មែរ ថ្កោលទោសអាជ្ញាធរ ដែលចាប់ខ្លួនសកម្មជនការពារសិទ្ធិមនុស្ស និង អ្នកតវ៉ារឿងព្រំដែនមួយចំនួនថា ធ្វើដោយបំពានច្បាប់ជាតិ និងច្បាប់អន្តរជាតិ។
ក្នុងសេចក្តីថ្លែងការណ៍របស់សមាគម សម្ព័ន្ធនិស្សិតបញ្ញវន្តខ្មែរ បានចេញផ្សាយកាលពីម្សិលមិញថា កាលពីថ្ងៃទី៦ និងថ្ងៃទី១០ ខែកញ្ញានេះ សមត្ថកិច្ចបានចាប់ខ្លួនអនុប្រធានសមាគមសម្ព័ន្ធនិស្សិតបញ្ញវន្តខ្មែរ លោក មាន ព្រហ្មមុន្នី និងសមាជិកម្នាក់ទៀត លោក មួង សុភក្រណា ឃុំខ្លួននៅពន្ធនាគារ និងចោទប្រកាន់ថា «ញុះញង់ឱ្យប្រព្រឹត្តបទឧក្រិដ្ឋជាអាទិ៍»។
ការចាប់ខ្លួននេះ ធ្វើឡើងបន្ទាប់ពីពួកគេនាំគ្នាតស៊ូមតិ ទាមទារឲ្យដោះលែងលោក រ៉ុង ឈុន និងអ្នកគាំទ្រលោកមួយចំនួនទៀត ដែលរិះគន់រដ្ឋាភិបាលរឿងព្រំដែនកម្ពុជា-វៀតណាម។
នៅថ្ងៃសៅរិ៍ម្សិលមិញ សមាគម សម្ព័ន្ធនិស្សិតបញ្ញវន្តខ្មែរ បានចេញសេចក្តីថ្លែងការណ៍ ថ្កោលទោសអាជ្ញាធររដ្ឋាភិបាល ដែលចាប់ខ្លួនសកម្មជនការពារព្រំដែនទាំងនោះ ដោយពុំមានដីកាពីតុលាការ ជាការបំបាក់ស្មារតីយុវជនដែលលើកស្ទួយលទ្ធិប្រជាធិបតេយ្យ សេរីភាពបញ្ចេញមតិ នីតិរដ្ឋ ការពារបូរណភាពទឹកដី នឹងបំពានច្បាប់ជាតិ និងច្បាប់អន្តរជាតិ។
ករណីនេះ សមាគម អំពាវនាវទៅរដ្ឋាភិបាលទម្លាក់ការចោទប្រកាន់ និងការប៉ុនប៉ងចោទប្រកាន់ទាំងអស់ និងដោះលែងអ្នកទាំងពីរនាក់ រួមទាំងយុវជនមួយចំនួនទៀតដែលសកម្មនឹងការពារបូរណភាពទឹកដីឲ្យមានសេរីភាពវិញ ដើម្បីរក្សាកេរ្តិ៍ឈ្មោះ កិត្តិយសនៅលើឆាកនយោបាយតំបន់ និងអន្តរជាតិ។
បន្ថែមពីនេះ សមាគមដដែលបញ្ជាក់ថា រាល់ការធ្វើសកម្មភាពតស៊ូមតិរឿងការពារបូរណភាពទឹកដី មិនពាក់ព័ន្ធក្រុមនយោបាយ ឬអង្គភាពចាត់តាំងពីខាងក្រៅស្រុកដូចការលាបពណ៌នោះឡើយ ពោលអនុវត្តតាមលក្ខន្តិកៈរបស់ខ្លួន ដែលតម្កល់នៅក្រសួងមហាផ្ទៃ។
អនុប្រធានសមាគមសម្ព័ន្ធនិស្សិតបញ្ញវន្តខ្មែរ លោក មាន ព្រហ្មមុន្នី ក៏ត្រូវសមត្ថកិច្ចចាប់ខ្លួន កាលពីថ្ងៃទី៦ ខែកញ្ញា និងយុវជនម្នាក់ឈ្មោះ មួង សុភ័ក្រ ត្រូវបានសមត្ថកិច្ចចាប់ខ្លួន កាលពីថ្ងៃ១០ ខែកកញ្ញា វេលាម៉ោងជាង៣រសៀល នៅសង្កាត់ទន្លេបាសាក់ ខណ្ឌចំការមន ដោយអនុវត្តទៅតាមដីការបស់តុលាការ។ អ្នកទាំងពីរត្រូវបានចោទពីបទ«ញុះញង់បង្កឱ្យមានភាពវឹកវរក្នុងសង្គម»។
ចំណែក លោក រ៉ុង ឈុន សមាជិកក្រុមប្រឹក្សាឃ្លាំមើលកម្ពុជា ត្រូវបានសមត្ថកិច្ចចាប់ខ្លួន កាលពីថ្ងៃទី៣១ ខែកក្កដា និងត្រូវបានចៅក្រមស៊ើបសួរសាលាដំបូងរាជធានីភ្នំពេញ សម្រេចឃុំខ្លួនបណ្តោះអាសន្ននៅពន្ធនាគារព្រៃស នៅថ្ងៃបន្ទាប់ ក្រោមបទចោទថា ញុះញង់ឱ្យមានការប្រព្រឹត្តបទឧក្រិដ្ឋជាអាទិ៍ ពាក់ព័ន្ធនឹងបញ្ហាព្រំដែន។
រីឯ សកម្មជនជាយុវជនចំនួន ៦នាក់ទៀត ដែលអាជ្ញាធរបានចាប់ឃាត់ខ្លួន រួមមាន ឈ្មោះ ហ៊ុន វណ្ណៈ, ឈឿន ដារ៉ាវី, សំណាង, ឡាវី, សៀងហៃ និងគន្ធីន ដែលក្នុងចំណោមពួកគេភាគច្រើនជាសមាជិកក្រុមយុវជនថាវរៈ។
កាលពីថ្ងៃទី៩ ខែកញ្ញានេះ អង្គការ-សមាគមចំនួន៣៦ ក៏បានចេញសេចក្តីថ្លែងការណ៍រួមមួយបង្ហាញការសោកស្តាយចំពោះការចាប់ខ្លួន និងចោទប្រកាន់ទៅយុវជនវ័យក្មេងជាបន្តបន្ទាប់ពីសំណាក់អាជ្ញាធររដ្ឋ ក្នុងរយៈពេលប៉ុន្មានថ្ងៃចុងក្រោយនេះ។ អង្គការសង្គមស៊ីវិលទាំងនោះ បានអំពាវនាវឱ្យអាជ្ញាធរទម្លាក់ចោលបទចោទប្រកាន់ បញ្ឈប់ការបំភិតបំភ័យ និងបង្ក្រាបលើក្រុមយុវជនដែលជាសកម្មជនសិទិ្ធមនុស្សនិងបរិស្ថាន៕
