សមត្ថកិច្ចរាជធានីភ្នំពេញ បានចាប់ខ្លួនយុវជនម្នាក់ជាសមាជិកសមាគមសម្ព័ន្ធនិស្សិតបញ្ញវន្តខ្មែរ បញ្ជូនទៅសាលាដំបូងរាជធានីភ្នំពេញ ពាក់ព័ន្ធនឹងបទញុះញង់បង្កឱ្យមានភាពវឹកវរក្នុងសង្គម។
អ្នកនាំពាក្យស្នងការនគរបាលរាជធានីភ្នំពេញ លោក សាន សុខសីហា បានប្រាប់វីអូឌីនៅថ្ងៃសុក្រនេះថា សមត្ថកិច្ចបានចាប់ឃាត់ខ្លួនយុវជនម្នាក់ឈ្មោះ មួង សុភ័ក្រ កាលពីម៉ោងជាង៣រសៀលម្សិលមិញ នៅសង្កាត់ទន្លេបាសាក់ ខណ្ឌចំការមន ដោយអនុវត្តទៅតាមដីការបស់តុលាការពីបទ«ញុះញង់បង្កឱ្យមានភាពវឹកវរក្នុងសង្គម»។ តែយ៉ាងណា លោកពុំបានបញ្ជាក់លម្អិតពីមូលហេតុនៃចាប់ខ្លួនយុវជនរូបនេះទេ។
លោកថា៖ «នៅពេលដែលយើងឃាត់ខ្លួនតាមដីកា គឺយើងតែងតែនាំបញ្ជូនទៅតុលាការ អ៊ីចឹងទាក់ទងនីតិវិធីបន្តទៀត យើងរង់ចាំនីតិវិធីរបស់តុលាការ ខ្ញុំសុំបញ្ជាក់ប៉ុណ្ណឹង សូមសួរទៅខាងតុលាការបន្ត»។
វីអូឌី នៅពុំទាន់អាចសុំការបញ្ជាក់ពីអ្នកនាំពាក្យសាលាដំបូងរាជធានីភ្នំពេញ លោក គុជ គឹមឡុង ជុំវិញករណីនេះបាននៅឡើយទេ នៅថ្ងៃសុក្រនេះ។
លោក មួង សុភ័ក្រ ជាយុវជនម្នាក់ក្នុងចំណោមពលរដ្ឋជិត៥០នាក់ដែលព្យាយាមទៅតវ៉ាដោយអហិង្សានៅក្បែរទីលានប្រជាធិបតេយ្យ កាលពីថ្ងៃទី៧ ខែកញ្ញា ដើម្បីអំពាវនាវសុំឱ្យមានការដោះលែងប្រធានសហជីព លោក រ៉ុង ឈុន និងអ្នកជាប់ឃុំផ្សេងទៀត បើទោះអាជ្ញាធររាជធានីភ្នំពេញបានប្រកាសមិនអនុញ្ញាត។
អនុប្រធានសមាគមសម្ព័ន្ធនិស្សិតបញ្ញវន្តខ្មែរ លោក មាន ព្រហ្មមុន្នី ក៏ត្រូវសមត្ថកិច្ចចាប់ខ្លួន កាលពីថ្ងៃទី៦ ខែកញ្ញា ពាក់ព័ន្ធនឹងគម្រោងប្រមូលផ្តុំនេះដែរ និងត្រូវបានតុលាការសម្រេចឃុំខ្លួននៅពន្ធនាគារ ក្រោមការចោទពីបទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍»។
លោក មួង សូនី ប្រធានសមាគមសម្ព័ន្ធនិស្សិតបញ្ញវន្តខ្មែរ និងជាបងប្រុសរបស់លោក មួង សុភ័ក្រ ចាត់ទុកករណីចាប់ខ្លួនសមាជិករបស់ខ្លួនថា ជាការរំលោភសិទ្ធិមនុស្ស។
លោកថា៖ «រដ្ឋាភិបាលដូចជាចិត្តចង្អៀតចង្អល់ ហើយវាឆ្លុះបញ្ចាំងថា ប្រទេសយើងបានបាត់បង់ការគោរពសិទ្ធិមនុស្ស លទ្ធិប្រជាធិបតេយ្យកាន់តែជ្រៅទៅៗ»។
អនុប្រធានអង្គការការពារសិទ្ធិមនុស្សលីកាដូ លោក អំ សំអាត យល់ថា ការចាប់ខ្លួននិងចោទប្រកាន់យុវជនជាង១០នាក់ជាបន្តបន្ទាប់ពីសំណាក់អាជ្ញាធររដ្ឋ ពុំបានផ្តល់ផលចំណេញនោះទេ ប៉ុន្តែបែរជាធ្វើឱ្យកម្ពុជារងនូវការរិះគន់ពីសហគមន៍អន្តរជាតិទៅវិញ។
លោកថា៖ «យើងឃើញហើយថ្មីៗ អ្នករាយការណ៍ពិសេសរបស់ឧត្តមប្រឹក្សាអង្គការសហប្រជាជាតិទទួលបន្ទុកសិទ្ធិមនុស្សសម្រាប់កម្ពុជា គេសម្ដែងការព្រួយបារម្ភនិងរិះគន់អំពីការចាប់ខ្លួនជាបន្តបន្ទាប់ហ្នឹង អីចឹងការចាប់ខ្លួនហ្នឹង នាំឱ្យគេកត់សម្គាល់បន្ថែមទៀតពាក់ព័ន្ធបញ្ហាសិទ្ធិមនុស្សនៅកម្ពុជាយើង។ វាអត់ឃើញផលចំណេញ វាដូចអត់មានទេ ផ្ទុយទៅវិញ វាជាការរំលោភបំពានសេរីភាពជាមូលដ្ឋានរបស់ពលរដ្ឋ»។
កាលពីថ្ងៃពុធ អង្គការ-សមាគមចំនួន៣៦ ក៏បានចេញសេចក្តីថ្លែងការណ៍រួមមួយបង្ហាញការសោកស្តាយចំពោះការចាប់ខ្លួន និងចោទប្រកាន់ទៅយុវជនវ័យក្មេងជាបន្តបន្ទាប់ពីសំណាក់អាជ្ញាធររដ្ឋ ក្នុងរយៈពេលប៉ុន្មានថ្ងៃចុងក្រោយនេះ។ អង្គការសង្គមស៊ីវិលទាំងនោះ បានអំពាវនាវឱ្យអាជ្ញាធរទម្លាក់ចោលបទចោទប្រកាន់ បញ្ឈប់ការបំភិតបំភ័យ និងបង្ក្រាបលើក្រុមយុវជនដែលជាសកម្មជនសិទិ្ធមនុស្សនិងបរិស្ថាន៕