អ្នកជំនាញសិទ្ធិមនុស្សអង្គការសហប្រជាជាតិ អ្នកស្រី រ៉ូណា ស្មីត និយាយថា អ្នកស្រីកំពុងតាមដានយ៉ាងដិតដល់ពីបញ្ហាសិទ្ធិមនុស្សនៅកម្ពុជា ខណៈអ្នកតវ៉ាដោយសន្តិវិធីមួយចំនួនរួមទាំងព្រះសង្ឃផង ត្រូវអាជ្ញាធរកម្ពុជាចាប់ខ្លួនជាបន្តបន្ទាប់នាពេលថ្មីៗនេះ។
អ្នកស្រី រ៉ូណា ស្មីត បាននិយាយលើទំព័រហ្វេសប៊ុកកាលពីថ្ងៃអង្គារម្សិលមិញថា អ្នកស្រីមានការព្រួយបារម្ភករណីចាប់ខ្លួនសកម្មជនបរិស្ថានចំនួនបីរូប ដែលត្រូវបានចោទប្រកាន់ពីបទ «ញុះញង់ឱ្យប្រព្រឹត្តបទឧក្រិដ្ឋ និងបង្កើតភាពវឹកវរក្នុងសង្គម»។
អ្នកស្រី រ៉ូណា ស្មីត បន្តថា បុគ្គលមួយចំនួនទៀត រាប់ទាំងព្រះសង្ឃមួយអង្គផង ក៏ត្រូវបានចាប់ខ្លួននិងឃុំខ្លួនចាប់តាំងពីថ្ងៃសុក្រសប្តាហ៍មុនមក។
អ្នកជំនាញសិទ្ធិមនុស្សរបស់អង្គការសហប្រជាជាតិ ក្រើនរំឭកថា សិទ្ធិសេរីភាពក្នុងការបញ្ចេញមតិ បង្កើតសមាគម និងការជួបជុំដោយសន្តិវិធី ត្រូវបានការពារដោយគោលការណ៍សិទ្ធិមនុស្សអន្តរជាតិ ក៏ដូចជារដ្ឋធម្មនុញ្ញកម្ពុជា។
អ្នកស្រីថា លើកទឹកចិត្តដល់អាជ្ញាធរកម្ពុជាឱ្យធានាសិទ្ធិទាំងនេះ ហើយបង្កើតបរិយាកាសមួយដែលបុគ្គលម្នាក់ៗអាចអនុវត្តសិទ្ធិទាំងនេះបានឡើងវិញ។
អ្នកស្រី រ៉ូណា ស្មីត ថា៖ «ខ្ញុំកំពុងតាមដានព្រឹត្តិការណ៍ទាំងនេះយ៉ាងដិតដល់នៅក្នុងប្រទេសកម្ពុជា»។
កាលពីថ្ងៃចន្ទដើមសប្ដាហ៍នេះ ក្រសួងមហាផ្ទៃបានបញ្ជាទៅអាជ្ញាធរឱ្យចាត់វិធានការក្រុមយុវជនខ្មែរថាវរៈ និងក្រុមយុវជនចលនាមាតាធម្មជាតិ ដោយចាត់ទុកថា ការចេញតវ៉ារបស់ពួកគេជាការញុះញង់ធ្វើឱ្យប៉ះពាល់ដល់សណ្តាប់ធ្នាប់សាធារណៈនិងបង្កភាពចលាចលវឹកវរក្នុងសង្គម។
គិតត្រឹមដើមខែកញ្ញានេះមក មនុស្ស៩នាក់ហើយត្រូវបានចាប់ខ្លួននិងដាក់ឃុំ មានទាំងព្រះសង្ឃ កើត សារ៉ាយ ផង ត្រូវបានផ្សឹកក្រោមបទ «ញុះញង់ឱ្យបង្កភាពវឹកវរដល់សន្តិសុខសង្គម»។
តំណាងកម្ពុជានៅក្រុមប្រឹក្សាសិទ្ធិមនុស្សអង្គការសហប្រជាជាតិ នៅទីក្រុងហ្សឺណែវ បាននិយាយក្នុងលិខិតចុះថ្ងៃទី៨ ខែកញ្ញានេះថា ការលើកឡើងរបស់អ្នកស្រី រ៉ូណា ស្មីត ជាការទទួលបានរបាយការណ៍មិនគ្រប់ជ្រុងជ្រោយ។
តំណាងជាន់ខ្ពស់របស់កម្ពុជា រៀបរាប់ថា៖ «ការអនុវត្តច្បាប់នៅប្រទេសកម្ពុជាដែលសំដៅការពារពលរដ្ឋគោរពច្បាប់ និងធានាសន្តិភាព សណ្ដាប់ធ្នាប់សង្គម និងសុខភាពសាធារណៈសម្រាប់បុគ្គលគ្រប់រូប»។
អ្នកនាំពាក្យគណៈកម្មាធិការសិទ្ធិមនុស្សកម្ពុជា លោក កត្តា អ៊ន បានច្រានចោលការលើកឡើងរបស់អ្នកជំនាញសិទ្ធិមនុស្សរបស់អង្គការសហប្រជាជាតិ ដោយថា រដ្ឋធម្មនុញ្ញកម្ពុជាបានធានាសិទ្ធិបញ្ចេញមតិ ប៉ុន្តែច្បាប់កំពូលនេះក៏បានចែងពីដែនកំណត់នៃសេរីភាពដែរ។
ផ្ទុយទៅវិញ លោកចោទថា ក្រុមអ្នកតវ៉ាទាំងនោះចេញធ្វើសកម្មភាពឱ្យមានរូបភាពប៉ះទង្គិចជាមួយអាជ្ញាធរ ហើយយករូបភាពនេះធ្វើជាការទាក់ទាញការចាប់អារម្មណ៍ពីមហាជន បម្រើផលប្រយោជន៍ឱ្យក្រុមប្រឆាំងដែលកំពុងត្រៀមធ្វើនយោបាយឡើងវិញ។
លោក កត្តា អ៊ន ប្រាប់ថា៖ «ពីព្រោះកម្ពុជាយើងសព្វថ្ងៃនេះកំពុងមានចរន្តពីអតីតគណបក្សប្រឆាំង ដូច្នេះហើយក្រុមរបស់ពួកគាត់រៀបសេណារីយ៉ូ ដើម្បីប្រកួតប្រជែងប្រជាប្រិយភាព គណបក្សទៅថ្ងៃមុខ»។
អ្នកនាំពាក្យសិទ្ធិមនុស្សរបស់រដ្ឋាភិបាលរូបនេះ អះអាងទៀតថា សារជំរុញណាមួយក្រោមហេតុផលសិទ្ធិមនុស្ស មិនឆ្លុះបញ្ចាំងការពិតរបស់កម្ពុជា មិនមានសម្ពាធអ្វីដល់ការសម្រេចចិត្តរបស់រដ្ឋាភិបាលទេ។
ប្រធានសមាគមគ្រូបង្រៀនកម្ពុជាឯករាជ្យ អ្នកស្រី អ៊ុក ឆាយ៉ាវី ដែលចូលរួមដាក់ញត្តិទៅស្ថានទូតនានាប្រឆាំកម្ពុជាថ្មីៗនេះ បាននិយាយថា ក្រុមអ្នកតវ៉ាមិនជាប់ពាក់ព័ន្ធរឿងនយោបាយទេ តែអ្នកស្រីថា អ្វីដែលបង្ខំចិត្តឱ្យពួកគេចេញតវ៉ាប្រឈមនឹងការបង្ក្រាបរបស់អាជ្ញាធរនោះ គឺចង់ឱ្យរដ្ឋាភិបាលធានាយុត្តិធម៌សង្គម។
អ្នកស្រី អ៊ុក ឆាយ៉ាវី ប្រាប់ថា៖ «សមាគមមើលឃើញថា ការដែលរដ្ឋាភិបាលធ្វើកន្លងមក ជាការរំលោភសិទ្ធិមនុស្ស ការគំរាមកំហែង។ អ៊ីចឹង សមាគមត្រូវតែធ្វើយ៉ាងណាឱ្យផ្តល់យុត្តិធម៌ដល់អ្នកដែលអត់មានកំហុសអី តែត្រូវអាជ្ញាធរចាប់»។
មន្ត្រីជាន់ខ្ពស់នៅសមាគមអាដហុកការពារសិទ្ធិមនុស្ស លោក នី សុខា និយាយថា រដ្ឋាភិបាលគួរដល់ពេលទទួលយកការពិត ហើយជំរុញការធ្វើកំណែទម្រង់ ដើម្បីបញ្ចៀសកម្ពុជាពីទណ្ឌកម្មសហគមន៍អន្តរជាតិ ដែលលោកថា ការច្រានចោលមតិរិះគន់ជុំវិញបញ្ហាសិទ្ធិមនុស្ស បានបង្ហាញលទ្ធផលនាំទៅដល់ការដកប្រព័ន្ធអនុគ្រោះពន្ធ EBA ២០ភាគរយពីសហភាពអឺរ៉ុប។
លោក នី សុខា ប្រាប់ថា៖ «ការច្រានចោលលទ្ធផលរបស់វា វាអត់បានលទ្ធផល វាគ្មានអីជាការរីកចម្រើនសម្រាប់ប្រទេសយើងទេ វាធ្វើឱ្យកម្ពុជាប្រាសចាកពីគន្លងប្រជាធិបតេយ្យឆ្ងាយទៅៗ ហើយអ្នកដែលទទួលផលលំបាកគឺប្រជាពលរដ្ឋខ្មែរយើងហ្នឹងហើយ»៕