មន្ត្រីជាន់ខ្ពស់ក្រសួងសុខាភិបាល ឱ្យដឹងថា មនុស្ស១៤៧នាក់នៅក្នុងពន្ធនាគារខេត្តព្រះវិហារបានឆ្លងជំងឺគ្រុនផ្តាសាយធំ (Influenza A)។
អ្នកនាំពាក្យក្រសួងសុខាភិបាល លោកស្រី ឱ វណ្ណឌីន បានឱ្យដឹងតាមបណ្តាញសង្គមតេឡេក្រាម នៅថ្ងៃអង្គារនេះថា អ្នកឆ្លងជំងឺផ្តាសាយធំនោះសរុបមាន១៤៧នាក់ ក្នុងនោះមានស្រ្តី១៩នាក់។
លោកស្រីបន្តថា ពួកគេកំពុងដាក់ក្នុងបន្ទប់ដាច់ដោយឡែក ដោយផ្តល់ការព្យាបាលនិងបានយកវត្ថុសំណាកដើម្បីធ្វើតេស្តរកវីរុសកូវីដ-១៩។
ចំណែកអ្នកសង្ស័យឆ្លងជំងឺផ្តាសាយធំ១១នាក់ លោកស្រីថា ត្រូវបានដាក់ឱ្យនៅបន្ទប់ដាច់ដោយឡែកដែរ និងអ្នកដែលមិនសង្ស័យឆ្លងជំងឺចំនួន៣២៦នាក់ (ស្រ្តី២០នាក់) ត្រូវបានដាក់ក្នុងបន្ទប់ដាច់ដោយឡែកផ្សេងៗគ្នា។
លោកស្រី ឱ វណ្ណឌីន បានបន្ថែមថា លទ្ធផលវិភាគវត្ថុសំណាករបស់ពួកគេដែលទទួលបានពីវិទ្យាស្ថានស្រាវជ្រាវសុខភាពសាធារណៈ បង្ហាញថា អវិជ្ជមានវីរុសកូវីដ-១៩ទាំងអស់គ្នា ហើយថា ករណីជំងឺផ្តាសាយធំ (Influenza A) ជាជំងឺអាចឆ្លងបន្តគ្នា ប្រសិនបើបុគ្គលម្នាក់ៗមិនបានអនុវត្តកិច្ចការពារខ្លួនបានត្រឹមត្រូវទេនោះ។
ប្រធានមន្ទីរសុខាភិបាលខេត្តព្រះវិហារ លោក គួង ឡូ មានប្រសាសន៍ថា ប្រធានពន្ធនាគារខេត្ត បានជូនដំណឹងទៅមន្ទីរសុខាភិបាលខេត្តកាលពីថ្ងៃចន្ទម្សិលមិញ ក្រោយពីមានអ្នកជាប់ឃុំជាច្រើននាក់មានអាការក្តៅខ្លួននិងក្អក។
លោកថា៖ «អាការរបស់គាត់ [អ្នកជាប់ឃុំ] គឺគាត់ក្តៅខ្លួន ពេលដែលយើងចុះទៅ អ្នកខ្លះក្តៅ៣៨អង្សានិងខ្លះ៣៩អង្សា មានហៀរសំបោរនិងក្អក បើនិយាយមែនទែនទៅជាអាការផ្តាសាយធំ»។
លោកបន្តថា តាមរយៈការចុះពិនិត្យនិងស្រាវជ្រាវរបស់អ្នកជំនាញសុខាភិបាល អ្នកជំងឺទាំងនោះ បានឆ្លងជំងឺគ្រុនផ្ដាសាយធំពីអ្នកជាប់ឃុំដូចគ្នានិងបានឆ្លងតៗគ្នា។
តែយ៉ាងណា លោកថា ស្ថានភាពសុខភាពរបស់អ្នកជំងឺទាំងនោះមានសភាពល្អប្រសើរជាបណ្តើរៗហើយនិងគ្មានអ្នកឆ្លងថ្មីនោះទេ ក្រោយមានការតាមដានដោយយកចិត្តទុកដាក់ពីក្រុមគ្រូពេទ្យរបស់មន្ទីរសុខាភិបាលខេត្ត និងការដាក់ចេញនូវវិធានការភ្លាមៗដោយការដាក់អ្នកជំងឺឱ្យនៅដាច់ដោយឡែកនិងការធ្វើអនាម័យ។
មន្ត្រីជាន់ខ្ពស់សមាគមការពារសិទ្ធិមនុស្សអាដហុក លោក នី សុខា បានបង្ហាញការព្រួយបារម្ភ ចំពោះសុខភាពអ្នកជាប់ឃុំក្នុងពន្ធនាគារ ខណៈស្ថានភាពពន្ធនាគារនៅកម្ពុជានៅមិនទាន់គោរពបានពេញលេញនូវលក្ខខណ្ឌសិទ្ធិអ្នកជាប់ឃុំនៅឡើយ ទាំងរបបអាហារ អនាម័យ និងសេវាថែទាំសុខភាព និងភាពចង្អៀតណែន។
លោកថា៖ «យើងដឹងហើយថា ទោះបីគាត់ [អ្នកជាប់ឃុំ] ជាប់ពន្ធនាគារ ទាំងអ្នកកាត់ទោសហើយក៏ដោយនិងអ្នកមិនទាន់កាត់ទោសក៏ដោយ ក៏គាត់នៅតែទទួលបានសិទ្ធិមួយ គេហៅថាសិទ្ធិនៃការថែទាំសុខភាពហ្នឹងឱ្យបានត្រឹមត្រូវដែរ»។
អ្នកឃ្លាំមើលសិទ្ធិមនុស្សរូបនេះ ផ្តល់ជាយោបល់ថា ដើម្បីធានាលក្ខខណ្ឌសិទ្ធិអ្នកជាប់ឃុំនិងទប់ស្កាត់ការផ្ទុះនូវជំងឺឆ្លងនានាក្នុងពន្ធនាគារ ស្ថាប័នពាក់ព័ន្ធរបស់រដ្ឋគួរសហការគ្នាបង្កើនប្រសិទ្ធភាពនៃការទប់ស្កាត់កុំឱ្យមានការឆ្លងរីករាលដាលក្នុងពន្ធនាគារផ្សេងទៀត។
រដ្ឋមន្ត្រីក្រសួងមហាផ្ទៃ លោក ស ខេង ក្នុងពិធីមួយកាលពីថ្ងៃទី១០ ខែសីហា បានបង្ហាញពីការព្រួយបារម្ភចំនួនអ្នកជាប់ឃុំបន្តកើនឡើងយ៉ាងគំហុកដោយសារបទល្មើសគ្រឿងញៀន ដែលថាបញ្ហានេះអាចបង្កផលប៉ះពាល់ដល់សុខភាពរបស់ពួកគេ ខណៈអ្នកជាប់ឃុំទូទាំងប្រទេសមានចំនួនជិត៤ម៉ឺននាក់។
អង្គការលើកលែងទោសអន្តរជាតិ (Amnesty International) កាលពីថ្ងៃទី១៣ ខែឧសភា ឆ្នាំ២០២០នេះ បានចេញរបាយការណ៍វាយតម្លៃថា ការកើនឡើងចំនួនអ្នកជាប់ឃុំ ជំរុញឱ្យមានការកើនឡើងការរំលោភសិទ្ធិមនុស្ស។ Amnesty ថា ការប្រើមធ្យោបាយឃុំឃាំងហួសកម្រិត បង្កឱ្យមានហានិភ័យដល់សេវាសុខភាពសាធារណៈនិងបង្កើតឱកាសឱ្យមានអំពើពុករលួយ៕