សំណុំរឿងកំណើនកុមារឈឺជំងឺស្លេកស្លាំងដោយកង្វះជាតិដែកធ្ងន់ធ្ងរ បានកើតឡើងតាំងពីខែមេសាមកម៉្លេះ។ អត្ថបទស៊ើបអង្កេតរបស់វីអូឌីដែលចេញផ្សាយកាលពីថ្ងៃទី២០ ខែឧសភា រកឃើញថា ជាង៩០%ក្នុងចំណោមកុមារ៣៤នាក់ដែលរងគ្រោះដោយសារជំងឺនេះ បានបៅទឹកដោះគោម៉ាក នុតទ្រីលែតស៍១ (Nutrilatt 1)។
កាលពីខែកក្កដា វីអូឌីក៏បានចេញផ្សាយអត្ថបទមួយទៀតដែលរៀបរាប់ដំណើរការដាក់ពាក្យបណ្ដឹងរកយុត្តិធម៌របស់ក្រុមឪពុកម្ដាយកុមាររងគ្រោះទៅកាន់ក្រសួងសុខាភិបាលនិងក្រសួងពាណិជ្ជកម្ម។
ទឹកដោះគោនុតទ្រីលែតពិតជាខ្វះជាតិដែក
ក្រុមឪពុកម្ដាយកុមារដែលធ្លាក់ខ្លួនឈឺជំងឺស្លេកស្លាំងដោយកង្វះជាតិដែកធ្ងន់ធ្ងរ បានដាក់ពាក្យប្ដឹងទៅកាន់អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ នៃក្រសួងពាណិជ្ជកម្មកាលពីថ្ងៃទី១៧ ខែកក្កដា ដើម្បីស្វែងរកការត្រួតពិនិត្យគុណភាពទឹកដោះគោដែលជាមូលហេតុបង្កជំងឺ។
អង្គភាពជំនាញនៃក្រសួងពាណិជ្ជកម្ម បានយកទឹកដោះគោនុតទ្រីលែតស៍លេខ១ (Nutrilatt 1) ទៅពិសោធនៅមន្ទីរពិសោធន៍ឯករាជ្យមួយឈ្មោះ Eurofins Food Testing Singapore Pte Ltd ដែលមានមូលដ្ឋាននៅប្រទេសសិង្ហបុរី។
សេចក្ដីប្រកាសព័ត៌មានចេញផ្សាយនៅយប់ថ្ងៃទី២៦ ខែសីហា របស់អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ លើកឡើងថា ផ្អែកតាមលទ្ធផលវិភាគ បង្ហាញថា បរិមាណជាតិដែកនិងជាតិស័ង្កសីជាក់ស្ដែងដែលមាននៅក្នុងសំណាកផលិតផលម្សៅទឹកដោះគោនុតទ្រីលែតស៍ (ដែលមានលេខកូដ ៤៨៧, ៤៨៨, ៥៣៦, ៥៣៧, ៥៣៨ និង ៥៣៩) មានកម្រិតទាបជាងឆ្ងាយយ៉ាងខ្លាំងពីបរិមាណដែលបានបញ្ជាក់លើស្លាកផលិតផល ពោលគឺកម្រិតជាតិដែកមានចំនួន២០ដងតិចជាងចំនួនជាតិដែកដែលបានបញ្ជាក់លើស្លាកផលិតផល។ ចំណែកឯជាតិស័ង្កសីវិញមានចំនួនតែជាងពាក់កណ្ដាលប៉ុណ្ណោះទៅនឹងអ្វីដែលបានបញ្ជាក់លើស្លាកសញ្ញា។
អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ បានលើកឡើងក្នុងរបាយការណ៍លទ្ធផលពិសោធន៍ជាង៤០ទំព័រនោះថា៖ «ផលិតផលនុតទ្រីលែត មិនបានបំពេញតម្រូវការអប្បបរមាលើកម្រិតជាតិដែកដែលមានកំណត់ក្នុងស្ដង់ដារ Codex[សុវត្ថិភាពអាហារសម្រាប់មនុស្សគ្រប់រូបនៅគ្រប់ទីកន្លែង] នោះទេ។ ជាក់ស្ដែង ផលិតផលនេះស្ទើរតែគ្មានជាតិដែកសោះ ពោលគឺកម្រិតជាតិដែកមានត្រឹមតែ <០,២៥មីលីក្រាម/១០០ក្រាមប៉ុណ្ណោះ»។
អង្គភាពនេះបន្តថា ស្ដង់ដារអន្តរជាតិគឺតម្រូវការជាតិដែកយ៉ាងតិចណាស់ ២,២៨៦មីលីក្រាម/១០០ក្រាម សម្រាប់ទារកអាយុ០ខែដល់៦ខែ (ទឹកដោះគោម្សៅលេខ១) និង ៤,៧២មីលីក្រាម/១០០ក្រាម សម្រាប់កុមារអាយុពី៦ខែដល់១២ខែ (ទឹកដោះគោម្សៅលេខ២)។
ក្រុមហ៊ុនច្រានចោលលទ្ធផលពិសោធន៍ ខណៈអង្គភាពជំនាញវាយបកវិញ
លទ្ធផលពិសោធន៍ដែលចេញដោយមន្ទីរពិសោធន៍នៅសិង្ហបុរីនោះ ត្រូវបានបើកបង្ហាញនៅចំពោះមុខតំណាងក្រសួងសុខាភិបាល តំណាងអង្គការសុខភាពពិភពលោក តំណាងអង្គការយូនីសែហ្វ តំណាងអង្គការហេឡែនឃីលឺ តំណាងក្រុមហ៊ុនម្សៅទឹកដោះគោនុតទ្រីលែត និងតំណាងមាតាបិតាទារករងគ្រោះដោយសារជំងឺ កាលពីព្រឹកថ្ងៃទី២៦ ខែសីហា។
បើទោះបីជាលទ្ធផលបង្ហាញបែបនេះក្ដី ក្រុមហ៊ុននុតទ្រីលែតម៉ាស្ទ័រអិលអឹម បានចេញលិខិតបដិសេធចំពោះលទ្ធផលរបស់អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ។ ក្រុមហ៊ុននេះហៅលទ្ធផលនេះថា ជាលទ្ធផលឯកតោភាគីរបស់អង្គភាពអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ។
អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ បញ្ជាក់តបទៅក្រុមហ៊ុនវិញថា ស្ថាប័នេះមិនមែនធ្វើការប្រកាសលទ្ធផលខាងលើជាលក្ខណៈឯកតោភាគី ដូចក្រុមហ៊ុនបានប្រកាសឡើយ។ ស្ថាប័នរដ្ឋនេះបញ្ជាក់បន្ថែមទៀតថា មន្ទីរពិសោធន៍នៃក្រសួងពាណិជ្ជកម្ម ពុំដែលធ្វើការពិសោធន៍និងទទួលស្គាល់ជាផ្លូវការនូវផលិតផលម្សៅទឹកដោះគោម៉ាក Nutrilatt ទាល់តែសោះ។
ប្រភពដដែលថា លទ្ធផលវិភាគគំរូម្សៅទឹកដោះគោម៉ាក Nutrilatt ដែលបានធ្វើការប្រកាសជាលទ្ធផលវិភាគដែលបានធ្វើឡើងដោយមន្ទីរពិសោធន៍ឯករាជ្យនិងទទួលស្គាល់ជាអន្តរជាតិ ដំណើរការប្រកាសលទ្ធផលនេះធ្វើឡើងដោយមានការចូលរួមនិងអង្កេតយ៉ាងម៉ត់ចត់ពីភាគីពាក់ព័ន្ធជាច្រើន ដូចជា តំណាងក្រុមហ៊ុន Nutrilatt តំណាងមាតាបិតាទារករងគ្រោះចំនួន១៩នាក់ តំណាងមាតាបិតាទារកដែលកំពុងប្រើប្រាស់ម្សៅទឹកដោះគោ Nutrilatt ចំនួន៣នាក់ តំណាងអង្គការអន្តរជាតិធ្វើការលើផ្នែកសុខភាពទារកនិងកុមារ ដូចជា អង្គការសុខភាពពិភពលោក WHO, អង្គការ UNICEF, អង្គការ Hellen Keller International និងតំណាងមជ្ឈមណ្ឌលគាំពារមាតានិងទារកនៃក្រសួងសុខាភិបាល ។
ចំណាត់ការបន្ត
អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ ប្រកាសទុកពេល១សប្ដាហ៍ដើម្បីឱ្យក្រុមហ៊ុននុតទ្រីលែតឆ្លើយតបចំពោះឪពុកម្ដាយកុមារនិងទារកដែលរងគ្រោះ។
អគ្គនាយកនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ នៃក្រសួងពាណិជ្ជកម្ម លោក ផាន់ អូន ថ្លែងប្រាប់វីអូឌីថា ចំណាត់ការបន្តនឹងធ្វើឡើងនៅក្រោយថ្ងៃទី៣ ខែកញ្ញា ដែលជាថ្ងៃកំណត់តម្រូវឱ្យថ្នាក់ដឹកនាំក្រុមហ៊ុនឆ្លើយតបចំពោះមាតាបិតាកុមាររងគ្រោះ។
មាតាកុមារីរងគ្រោះព្រោះជំងឺស្លេកស្លាំងកង្វះជាតិដែកធ្ងន់ធ្ងរ អ្នកស្រី គង់ ច័ន្ទម៉ាលីស មានប្រសាសន៍ថា ក្រុមឪពុកម្ដាយកុមាររងគ្រោះទាមទារឱ្យក្រុមហ៊ុនទទួលខុសត្រូវចំពោះមុខឪពុកម្ដាយទារកនិងអតិថិជនទាំងអស់។
អ្នកស្រី គង់ ច័ន្ទម៉ាលីស មានប្រសាសន៍ថា៖ «ពួកខ្ញុំរង់ចាំមើលសិនថាថ្ងៃទី៣ហ្នឹង ក្រុមហ៊ុននិយាយយ៉ាងម៉េចទៀត? ពួកយើងអត់បញ្ចប់ស្រួលៗទេបង! កូនៗពួកយើងមិនទាន់ជាស្រួលបួលផង។ ខ្ញុំគិតថា ទៅថ្ងៃមុខ បើមិនមានដំណោះស្រាយ នោះអាចនឹងមានបណ្ដឹងទៅដល់តុលាការ»។
អ្នកស្រី ម៉ាលីស អំពាវនាវឱ្យសាធារណជនទាំងអស់តាមដាននិងឃ្លាំមើលចំពោះសំណុំរឿងទឹកដោះគោនុតទ្រីលែត ដើម្បីសុវត្ថិភាពកុមារកម្ពុជា។
អនុប្រធានប្រចាំប្រទេសនៃអង្គការ Hellen Keller International លោក ហួ គ្រឿន មានប្រសាសន៍ថា សំណុំរឿងទឹកដោះគោគ្មានស្តង់ដារនិងប៉ះពាល់ដល់កុមារនេះ ជារឿងដែលស្ថាប័នពាក់ព័ន្ធគួរយកចិត្តទុកដាក់។ លោកបន្តថា កម្ពុជាមានច្បាប់ការពារអ្នកប្រើប្រាស់រួចហើយ ហេតុនេះអាជ្ញាធរក៏អាចមានមូលដ្ឋានដោះស្រាយបញ្ហានេះបានដែរ។
លោក ហួ គ្រឿន និយាយថា៖ «ច្បាប់ប្រទេសកម្ពុជាយើងមានហើយ ឧទាហរណ៍ថា អាហ្នឹង(ជាតិដែក)នៅលើស្លាកមានប៉ុននេះ ហើយជាក់ស្តែងពិសោធន៍ឃើញប៉ុណ្ណោះ ច្បាប់ចែងថាត្រូវធ្វើយ៉ាងម៉េច ស្ថាប័នជំនាញរបស់រដ្ឋគាត់ធ្វើអ៊ីចឹងទៅគឺបានហើយ។ បើច្បាប់មានហើយ អាជ្ញាធរគួរចាត់ការទៅតាមហ្នឹងទៅ! នេះជាយោបល់ផ្ទាល់ខ្លួនរបស់ខ្ញុំទេ»៕
