ប្រជាពលរដ្ឋជាង៥០នាក់មកពីខេត្តកណ្តាលនិងខេត្តតាកែវ ដែលរងផលប៉ះពាល់ពីគម្រោងអភិវឌ្ឍន៍ព្រលានយន្តហោះអន្តរជាតិភ្នំពេញថ្មី នៅថ្ងៃអង្គារនេះ បានប្រមូលផ្តុំគ្នានៅក្បែរភូមិគ្រឹះលោកនាយករដ្ឋមន្ត្រី ហ៊ុន សែន នៅក្រុងតាខ្មៅ ដើម្បីសុំឱ្យលោកជួយដោះស្រាយផលប៉ះពាល់ជូនពួកគេ។
អ្នកស្រី អ៊ុន សឿន អាយុ៦៨ឆ្នាំ មកពីខេត្តតាកែវ ប្រាប់វីអូឌីកន្លែងប្រមូលផ្តុំថា គម្រោងអភិវឌ្ឍន៍ព្រលានយន្តហោះថ្មីនេះ បានធ្វើឱ្យប៉ះពាល់ដីស្រែពលរដ្ឋចំនួន២៥០នាក់ នៅឃុំពុតស ស្រុកបាទី ដោយអ្នកខ្លះប៉ះពាល់កន្លះហិកតានិងខ្លះទៀតមួយហិកតា។
ស្រ្តីរូបនេះឱ្យដឹងទៀតថា កន្លងមក ក្រុមហ៊ុនបានដោះស្រាយជាគោលនយោបាយ ដោយផ្តល់សំណងចន្លោះពី៣ដុល្លារទៅ៨ដុល្លារក្នុងមួយម៉ែត្រការ៉េ ប៉ុន្តែសំណងនេះពួកគាត់ពុំអាចទទួលយកបានទេ ដោយពួកគាត់ទាមទារសំណងតាមតម្លៃទីផ្សារនិងសុំបើកប្រព័ន្ធប្រឡាយទឹកឱ្យពួកគាត់មានទឹកសម្រាប់បង្កបង្កើនផលឡើងវិញ។
អ្នកស្រីបន្ថែមថា៖ «សុំឱ្យសម្តេច [ហ៊ុន សែន] ជួយដោះស្រាយកូនចៅឱ្យបានតម្លៃសមរម្យ ដើម្បីឱ្យកូនចៅបានលុយអាចទៅទិញដីបានសម្រាប់បង្កបង្កើនផល ចិញ្ចឹមកូនចៅតទៅមុខទៀត កុំឱ្យដូចពាក្យមន្ត្រីសុរិយោដី លោកថា ដីហ្នឹងបើយើងអត់លក់៨ដុល្លារហ្នឹងទេ រដ្ឋនឹងដកយក»។
ពលរដ្ឋនៅឃុំពុតសម្នាក់ទៀត អ្នកស្រី ក្រាញ់ ចាន់ឌី និយាយថា គម្រោងអភិវឌ្ឍន៍ព្រលានយន្តហោះភ្នំពេញថ្មី បានធ្វើឱ្យប៉ះពាល់ទាំងដីជាប់ក្នុងព្រលាននិងដីនៅក្រៅព្រលាន។ អ្នកស្រីបញ្ជាក់ថា ដីក្រៅព្រលានគឺពលរដ្ឋមិនអាចបង្កបង្កើនផលបានទេ ដោយសារអាជ្ញាធរបិទប្រព័ន្ធប្រឡាយទឹក ខណៈដីក្នុងព្រលានគេឱ្យតម្លៃថោក។
អ្នកស្រីបន្ថែមថា៖ «ឥលូវគេបិទស្ទឹង គេទប់ទឹក អត់ទម្លាក់ទឹកឱ្យពួកយើង ហើយអត់មានទឹកធ្វើស្រែទៀត ឥលូវកំពុងពិបាកចិត្ត ដេកគិតរហូត ព្រោះខ្ញុំមានដីតែប៉ុណ្ណឹង ហើយត្រូវចិញ្ចឹមកូន៥នាក់ ហើយខ្លួនឈឺទៀត»។
ក្រៅពីពលរដ្ឋនៅខេត្តតាកែវនេះ ក៏មានពលរដ្ឋមួយក្រុមទៀតនៅខេត្តកណ្តាល ដែលរងផលប៉ះពាល់ដោយសារគម្រោងអភិវឌ្ឍន៍ព្រលានយន្តហោះថ្មី ទៅប្រមូលផ្តុំនៅមុខភូមិគ្រឹះលោកនាយករដ្ឋមន្ត្រីផងដែរ ដើម្បីតាមដានញត្តិរបស់ពួកគេដែលធ្លាប់បានដាក់កន្លងមក។
អ្នកស្រី ឆន ចាន់ថុល មកពីឃុំបឹងខ្យាង ស្រុកកណ្តាលស្ទឹង ខេត្តកណ្តាល និយាយថា ការដែលពួកគាត់ឡើងទៅសុំអន្តរាគមន៍ពីលោកនាយករដ្ឋមន្ត្រីជាថ្មីនេះ ដោយសារការដាក់ញត្តិរបស់ពួកគាត់នាពេលកន្លងមកនៅពុំទាន់មានការឆ្លើយតប។
អ្នកស្រីបន្ថែមថា៖ «រហូតមកដល់ថ្ងៃនេះ មានរយៈពេលច្រើនថ្ងៃហើយ អត់ឃើញខាងខេត្តគេជូនដំណឹងនិងហៅពួកយើងទៅដោះស្រាយទេ អីចឹងឥលូវបងប្អូនយើងមករកសម្តេចម្តងទៀត ដើម្បីសុំឱ្យសម្តេចជួយដោះស្រាយក្នុងរឿងហ្នឹង ព្រោះវាជាប់ពាក់ព័ន្ធច្រើនណាស់»។
ការប្រមូលផ្តុំដាក់ញត្តិរបស់ប្រជាពលរដ្ឋទាំងពីរក្រុមនេះ ត្រូវបានមន្ត្រីយាមនៅភូមិគ្រឹះលោកនាយករដ្ឋមន្ត្រី ដែលសុំមិនប្រាប់ឈ្មោះ បញ្ជាក់ថា មន្ត្រីបានទទួលញត្តិរបស់ពលរដ្ឋហើយនិងផ្តល់ដំណឹងដល់ពលរដ្ឋវិញក្នុងពេលឆាប់ៗនេះ។
មន្ត្រីយាមភូមិគ្រឹះនាយករដ្ឋមន្ត្រី និយាយថា៖ «អីចឹង! មីងៗអញ្ជើញទៅផ្ទះវិញចុះ ពីព្រោះមន្ត្រីយើងបានទទួលឯកសារហើយ អីចឹងមីងចាំទទួលលទ្ធផលចុះ! គាត់តេប្រាប់ មិនយូរទេ»។
វីអូឌី មិនអាចសុំការអត្ថាធិប្បាយពីអភិបាលខេត្តតាកែវ លោក អ៊ូច ភា និងអភិបាលខេត្តកណ្តាល លោក គង់ សោភ័ណ្ឌ បានទេ នៅថ្ងៃអង្គារនេះ។
ប៉ុន្តែលោក គង់ សោភ័ណ្ឌ ធ្លាប់បញ្ជាក់កាលពីពេលថ្មីៗនេះថា រដ្ឋបាលខេត្តនិងអាជ្ញាធរពាក់ព័ន្ធកំពុងពិចារណាដោះស្រាយករណីនេះហើយ។
ក្នុងលិខិតមួយរបស់រាជរដ្ឋាភិបាលកាលពីចុងឆ្នាំ២០១៧ បានឱ្យដឹងថា គម្រោងសាងសង់អាកាសយានដ្ឋានភ្នំពេញអន្តរជាតិថ្មី មានតម្លៃប្រមាណ១,៥០០លានដុល្លារ ស្ថិតលើផ្ទៃដីទំហំ២,៦០០ហិកតា ក្នុងភូមិសាស្ត្រស្រុកកណ្ដាលស្ទឹងនិងស្រុកស្អាង ខេត្តកណ្ដាល និងមួយផ្នែកនៃស្រុកបាទី ខេត្តតាកែវ៕