សម្ដេចអគ្គព្រះមហាសង្ឃរាជាធិបតី ទេព វង្ស ត្រូវបានបញ្ជូនទៅព្យាបាលព្រះរោគនៅប្រទេសវៀតណាម បន្ទាប់ពីព្រះអង្គដួលនៅក្នុងបន្ទប់ទឹករបួសធ្ងន់ កាលពីយប់ថ្ងៃ១៩ ខែសីហា។
ក្នុងលិខិតរបស់គណៈសង្ឃនាយកនៃព្រះរាជាណាចក្រកម្ពុជា ចុះផ្សាយកាលពីថ្ងៃទី២០ ខែសីហាថា សម្ដេចអគ្គព្រះមហាសង្ឃរាជាធិបតី ទេព វង្ស បានដួលនៅក្នុងបន្ទប់ទឹក ដោយប៉ះពាល់ព្រះកាយផ្នែកខាងឆ្វេង ធ្វើឱ្យដៃ និងជើងកម្រើកមិនរួច ព្រមទាំងប៉ះពាល់ដល់ព្រះកេស និងមានឈាមកកនៅក្នុងព្រះកេស កាលពីថ្ងៃទី១៩ ខែសីហា វេលាម៉ោង៩ និង៤០នាទីយប់ ។
ករណីនេះ គណៈសង្ឃនាយក បានស្នើទៅអគ្គលេខាធិការបក្សកុម្មុយនីស្តវៀតណាម និងជាប្រធានាធិបតី នៃសាធារណៈរដ្ឋសង្គមនិយមវៀតណាម លោក NGUYEN PHU TRONG អនុញាតឲ្យសម្តេចសង្ឃ ទេព វង្ស បានទៅព្យាបាលព្រះរោគនៅមន្ទីរពេទ្យរដ្ឋ ថងញ៉ិត របស់វៀតណាម ចាប់ពីថ្ងៃទី២១ ខែសីហា។ ប៉ុន្តែមិនទាន់កំណត់ថ្ងៃត្រឡប់មកកម្ពុជាវិញនោះទេ។
បន្ថែមពីនេះ លិខិតដដែលបញ្ជាក់ថា តាមគោលការណ៍របស់ក្រសួងសុខាភិបាលនៃប្រទេសវៀតណាម បានតម្រូវឲ្យស្នាក់នៅដាច់ដោយឡែក១៤ថ្ងៃ ក្នុងគ្រាមានអាសន្ននៃជំងឺកូវីដ១៩ផងដែរ៕
