អ្នកនាំពាក្យក្រសួងយុត្តិធម៌របស់កម្ពុជា លោក ជិន ម៉ាលីន បានលើកឡើងដោយមិនបញ្ចេញឈ្មោះថា ក្រុមណាមួយព្យាយាមស្នើឱ្យជប៉ុនដាក់សម្ពាធកម្ពុជាពាក់ព័ន្ធបញ្ហាសិទ្ធិមនុស្ស នឹងបរាជ័យយ៉ាងអាម៉ាស់។
ការបង្ហាញទស្សនៈរបស់មន្ត្រីជាន់ខ្ពស់នៅក្រសួងយុត្តិធម៌កម្ពុជានេះ ធ្វើឡើងមុន ១ថ្ងៃនៃដំណើរទស្សនកិច្ចផ្លូវការណ៍របស់រដ្ឋមន្ត្រីការបរទេសថ្មីជប៉ុន លោក តូសឺមីតស៊ូ ម៉ូតេហ្គិ(Toshimitsu Motegi)មកកាន់កម្ពុជា។
លោក ជិន ម៉ាលីន សរសេរនៅលើហ្វេសប៊ុករបស់លោកកាលពីថ្ងៃម្សិលមិញថា ឆ្លងតាមបទពិសោធន៍នៃការសិក្សា និងរស់នៅប្រទេសជប៉ុនជាច្រើនឆ្នាំកន្លងមក លោកថា រដ្ឋាភិបាលជប៉ុនមានគោលនយោបាយការបរទេសជួយដល់ប្រទេសដ៏ទៃដោយផ្តោតលើការអភិវឌ្ឍជាធំ គោរពនូវអធិបតេយ្យភាព និងមិនជ្រៀតជ្រែកចូលកិច្ចការផ្ទៃក្នុងរបស់ប្រទេសដទៃឡើយ។
អ្នកនាំពាក្យរូបនេះអះអាងថា៖ «ដូច្នេះ ការដែលក្រុមណាមួយព្យាយាមស្នើសុំឱ្យជប៉ុនដាក់សម្ពាធ និងជ្រៀតជ្រែកចូលកិច្ចការផ្ទៃក្នុងរបស់កម្ពុជាដែលជារដ្ឋអធិបតេយ្យ នឹងច្បាស់ជាទទួលរងនូវភាពបរាជ័យយ៉ាងអាម៉ាស់ជាក់ជាមិនខាន»។
ក្រុមសិទ្ធិមនុស្សអន្តរជាតិ បានជំរុញទៅប្រមុខការទូតជប៉ុនឱ្យលើកយកបញ្ហាសិទ្ធិមនុស្សមកជជែកជាមួយសមភាគីកម្ពុជាអំឡុងដំណើរទស្សនកិច្ចរបស់លោកមកកាន់កម្ពុជានៅចុងសប្ដាហ៍នេះ។
ក្រសួងការបរទេសកម្ពុជា ប្រកាសថា រដ្ឋមន្ត្រីការបរទេសជប៉ុន លោក តូសឺមីតស៊ូ ម៉ូតេហ្គិ (Toshimitsu Motegi) នឹងមកបំពេញទស្សនកិច្ចផ្លូវការរយៈពេល ៣ថ្ងៃនៅកម្ពុជា ចាប់ពីថ្ងៃទី២១ ដល់ថ្ងៃទី២៣ ខែសីហានេះ។
ក្រសួងឱ្យដឹងដែរថា ក្នុងដំណើរទស្សនកិច្ចនោះ លោក តូសឺមីតស៊ូ ម៉ូតេហ្គិ មានគម្រោងជួបលោកនាយករដ្ឋមន្ត្រី ហ៊ុន សែន និងរដ្ឋមន្ត្រីការបរទេសលោក ប្រាក់ សុខុន។
ប៉ុន្តែ ពីរថ្ងៃមុនដំណើរទស្សនកិច្ចរបស់ភាគីជប៉ុនមកកាន់កម្ពុជាអង្គការឃ្លាំមើលសិទ្ធិមនុស្ស (Human Rights Watch) បានផ្ញើលិខិតទៅប្រមុខការទូតជប៉ុន ជំរុញឱ្យលើកយកបញ្ហាសិទ្ធិមនុស្សទៅជជែកជាមួយមេដឹកនាំកម្ពុជា។
Human Rights Watch លើកឡើងថា៖ «កម្ពុជាកំពុងប្រឈមមុខនឹងវិបត្តិសិទ្ធិមនុស្ស» មានការបង្ក្រាបសកម្មជន ប្រព័ន្ធផ្សព្វផ្សាយឯករាជ្យ និងការរំលាយចោលគណបក្សសង្គ្រោះជាតិ។
អង្គការឃ្លាំមើលសិទ្ធិមនុស្សអន្តរជាតិដែលមានមូលដ្ឋាននៅសហរដ្ឋអាមេរិកមួយនេះ បន្តថា រដ្ឋាភិបាលកម្ពុជាដែលដឹកនាំដោយគណបក្សប្រជាជនកម្ពុជារបស់លោកនាយករដ្ឋមន្ត្រី ហ៊ុន សែន បានអនុម័តច្បាប់នានា ដែលគាប់សង្កត់ទៅលើសិទ្ធិសេរីភាពនៃការបញ្ចេញមតិ ការប្រមូលផ្ដុំដោយសន្តិវិធី និងសេរីភាពសមាគម។
HRW ជំរុញទៅរដ្ឋមន្ត្រីការបរទេសថ្មីរបស់ជប៉ុន លោក ម៉ូតេហ្គិ ឱ្យលើកឡើងពីបញ្ហាសិទ្ធិមនុស្សនៅកម្ពុជា ដូចជា ទាមទារឱ្យដោះលែងដោយឥតលក្ខខណ្ឌនូវសកម្មជន អ្នកការពារសិទ្ធិមនុស្ស អ្នកសារព័ត៌មាន និងសមាជិកគាំទ្របក្សប្រឆាំង។
អតីតគណបក្សសង្គ្រោះជាតិមានអ្នកគាំទ្រជាង ៤០ភាគរយត្រូវបានតុលាការកំពូលកម្ពុជាចេញសាលដីការំលាយកាលចុងឆ្នាំ២០១៧។
មន្ត្រីបក្សនេះ ១១៨នាក់ ត្រូវបានហាមធ្វើនយោបាយរយៈពេល ៥ឆ្នាំ អាសនៈជាប់ឆ្នោតចំនួន ៥០០៧នៅក្រុមប្រឹក្សាឃុំសង្កាត់ និងអាសនៈក្នុងសភាចំនួន ៥៥ ត្រូវបានរឹបអូសចែកឱ្យទៅគណបក្សផ្សេង។
ចំណែកប្រធានគណបក្សនេះ គឺលោក កឹម សុខា ក៏ត្រូវចាប់ឃុំខ្លួន ក្រោមបទចោទថា ឃុបឃិតជាមួយសហរដ្ឋអាមេរិកចង់ផ្តួលរំលំរដ្ឋាភិបាលដែលដឹកនាំដោយលោក ហ៊ុន សែន៕
