សមត្ថកិច្ចរាជធានីភ្នំពេញ បានចាប់ឃាត់ខ្លួនប្រធានគណបក្សខ្មែរឈ្នះ លោក សួង សុភ័ណ្ឌ នៅរសៀលថ្ងៃសុក្រនេះ តាមដីការបស់តុលាការ ក្រោយពីគណបក្សមួយនេះបានចុះទៅពិនិត្យបង្គោលព្រំដែនរវាងកម្ពុជា-វៀតណាមដែលបោះរួចនៅខេត្តត្បូងឃ្មុំ។
កាលពីថ្ងៃទី១០ ខែសីហា លោក សួង សុភ័ណ្ឌ បានដឹកនាំសមាជិកចុះទៅពិនិត្យស្ថានភាពនៃការបោះបង្គោលព្រំដែនរវាងកម្ពុជានិងវៀតណាម នៅស្រុកពញាក្រែក ខេត្តត្បូងឃ្មុំ ជាទីតាំងដែលលោក រ៉ុង ឈុន បានលើកឡើងពីរបាយការណ៍របស់ពលរដ្ឋ ដែលថា បាត់បង់ទឹកដីកម្ពុជាទៅលើវៀតណាម។
នៅថ្ងៃបន្ទាប់ មន្ត្រីរដ្ឋាភិបាលបានព្រមានចាត់វិធានការផ្លូវច្បាប់ចំពោះអ្នកតវ៉ារឿងបោះបង្គោលព្រំដែន ដោយថា ដើម្បីទប់ស្កាត់ចលាចលក្នុងសង្គម។
អ្នកនាំពាក្យស្នងការដ្ឋាននគរបាលរាជធានីភ្នំពេញ លោក សាន សុខសីហា ប្រាប់វីអូឌីតាមតេឡេក្រាម (Telegram) ថា សមត្ថកិច្ចបានចាប់ខ្លួនប្រធានគណបក្សខ្មែរឈ្នះ លោក សួង សុភ័ណ្ឌ នៅខណ្ឌទួលគោក រាជធានីភ្នំពេញ នៅម៉ោងប្រមាណ១រសៀលថ្ងៃនេះ ហើយបច្ចុប្បន្នត្រូវបាននាំខ្លួនមកសាកសួរនៅស្នងការដ្ឋាននគរបាលរាជធានីភ្នំពេញ។
លោកថា៖ «ពិតជាមានការចាប់ខ្លួនលោក សួង សុភ័ណ្ឌ នៅខណ្ឌទួលគោក ពីបទល្មើសជាក់ស្តែងពាក់ព័ន្ធនឹងការបំភ្លៃការពិតអំពីបញ្ហាព្រំដែន»។
អ្នកនាំពាក្យសាលាដំបូងរាជធានីភ្នំពេញ លោក គុជ គឹមឡុង បានប្រាប់ក្រុមអ្នកសារព័ត៌មានតាមតេឡេក្រាម(Telegram)ថា ការចាប់ខ្លួន លោក សួង សុភ័ណ្ឌ ជាបទល្មើសជាក់ស្តែង ទាក់ទងនឹងការញុះញង់បំភ្លៃការពិតលើបញ្ហាព្រំដែន និងការចោទប្រកាន់មួលបង្កាច់ទម្លាក់កំហុសលើគណៈកម្មាធិការព្រំដែនកម្ពុជាថា ប្រព្រឹត្តបទល្មើសក្បត់ជាតិ។
ប្រធានក្រុមប្រឹក្សាឃ្លាំមើលកម្ពុជា និងសមាជិកក្រុមប្រឹក្សាភិបាលនៃចលនានិស្សិត លោក ម៉ែន ណាត មានប្រសាសន៍ថា អ្នកដែលហ៊ាននិយាយការពិតពាក់ព័ន្ធនឹងរឿងព្រំដែន បានរងនូវការចាប់ខ្លួន និងចោទប្រកាន់ពីសំណាក់អាជ្ញាធរ និងរដ្ឋាភិបាល ជាបន្តបន្ទាប់។
លោកថា៖ «ក្រុមសកម្មជនណាក៏ដោយ ដែលចុះមើលព្រំដែន ហើយនិយាយការពិត អំពីការបោះបង្គោលព្រំដែនមិនប្រក្រតីហ្នឹង ដែលធ្វើឱ្យបាត់ដីខ្មែរហ្នឹង ត្រូវរងនូវការចោទប្រកាន់ពីអាជ្ញាធរ និងរដ្ឋាភីបាល។ អីចឹងហើយបានយើងធ្វើការទាមទារឱ្យដោះលែងអ្នកទាំងនោះ ឱ្យមានសេរីភាពឡើងវិញ ដើម្បីឱ្យគាត់អនុវត្តសិទ្ធិឱ្យស្របទៅតាមរដ្ឋធម្មនុញ្ញ»។
កាលពីថ្ងៃទី៣១ ខែកក្កដា លោក រ៉ុង ឈុន សមាជិកក្រុមប្រឹក្សាឃ្លាំមើលកម្ពុជា ក៏ត្រូវបានសមត្ថកិច្ចរាជធានីភ្នំពេញចាប់ខ្លួន និងបញ្ជូនទៅសាលាដំបូងរាជធានីភ្នំពេញនៅថ្ងៃបន្ទាប់ ក្នុងនោះ ចៅក្រមស៊ើបសួរសម្រេចឃុំខ្លួនរូបលោកជាបណ្តោះអាសន្ននៅពន្ធនាគារព្រៃស ក្រោមបទចោទថា «ញុះញង់ឱ្យមានការប្រព្រឹត្តបទឧក្រិដ្ឋជាអាទិ៍» ពាក់ព័ន្ធនឹងបញ្ហាព្រំដែន៕
