ក្រុមយុវជននិងប្រជាពលរដ្ឋមួយចំនួនដែលព្យាយាមទៅប្រមូលផ្តុំនៅមុខសាលាដំបូងរាជធានីភ្នំពេញ បានប៉ះទង្គិចគ្នាជាមួយអាជ្ញាធរ ខណៈដែលចៅក្រមស៊ើបសួរសាលាដំបូង បន្តនីតិវិធីសួរនាំលោក រ៉ុង ឈុន បន្ថែមនៅព្រឹកថ្ងៃព្រហស្បតិ៍នេះ ។
ក្រុមយុវនខ្មែរថាវរៈ សាច់ញាតិលោក រ៉ុង ឈុន និងសកម្មជនប្រមាណ៥០នាក់ រួមទាំងប្រធានគណបក្សខ្មែរឈ្នះ លោក សួង សុភ័ណ្ឌ បាននាំគ្នាទៅប្រមូលផ្តុំនៅមុខសាលាដំបូងរាជធានីភ្នំពេញ ដើម្បីទាមទារឱ្យស្ថាប័នមួយនេះដោះលែងលោក រ៉ុង ឈុន ប៉ុន្តែត្រូវបានអាជ្ញាធរនិងសន្តិសុខខណ្ឌ៧មករា រារាំងនិងរុញច្រានចេញពីទីនោះ។
លោក សួង សុភ័ណ្ឌ ប្រធានគណបក្សខ្មែរឈ្នះ បានមានប្រសាសន៍ថា ក្រុមយុវជននិងប្រជាពលរដ្ឋទាំងនោះ គ្រាន់តែមកចង់តាមដានដំណើរការនិងនីតិវិធីរបស់តុលាការលើករណីលោក រ៉ុង ឈុន ប៉ុណ្ណោះ ប៉ុន្តែត្រូវបានអាជ្ញាធរធ្វើការរារាំងនិងបង្ក្រាបពួកគាត់ទៅវិញ។ ករណីនេះ លោកបានបង្ហាញការសោកស្តាយចំពោះទង្វើរបស់អាជ្ញាធរខណ្ឌ ដែលបានបង្ក្រាបទៅលើពលរដ្ឋដែលតវ៉ាដោយសន្តិវិធីនេះ។
លោកថា៖ «អាជ្ញាធរ [ដែលជា] តំណាងរដ្ឋាភិបាលតែងតែព្យាយាមថាខ្លួនឯងគោរពច្បាប់ អនុវត្តច្បាប់ ប៉ុន្តែជាក់ស្តែងបែរជារំលោភច្បាប់និងបង្ក្រាប [ទៅលើ] អ្នកតាមដាន […] ដូច្នេះទង្វើអាក្រក់ទាំងនេះជារឿងគួរឱ្យខ្មាសអន្តរជាតិ»។
លោក រ៉ុង វណ្ណ ក្មួយប្រុសរបស់លោក រ៉ុង ឈុន បានចាត់ទុកសកម្មភាពរារាំងរបស់អាជ្ញាធរខណ្ឌ ថាជាការរំលោភសិទ្ធិបញ្ចេញមតិរបស់ប្រជាពលរដ្ឋ។
លោកថា៖ «ខ្ញុំមានការឈឺចាប់ដែលគាត់ [អាជ្ញាធរ] មកធ្វើបែបនេះលើប្រជាពលរដ្ឋ ពួកគាត់ស៊ីប្រាក់ខែរដ្ឋ គួរតែការពារប្រជាពលរដ្ឋ ប៉ុន្តែបែរជាមកធ្វើបាបប្រជាពលរដ្ឋទៅវិញ […] សូមស្នើឱ្យអាជ្ញាធរគោរពច្បាប់ជាជាងគោរពបទបញ្ជា»។
ក្នុងហេុតការណ៍នោះក៏បណ្តាលឱ្យយុវជនខ្មែរថាវរៈម្នាក់ បានរងរបួសដៃនិងជើងនៅពេលដែលអាជ្ញាធរបានរុញច្រានបណ្តាលឱ្យដួល។ អាជ្ញាធរនិងក្រុមសន្តិសុខខណ្ឌ៧មករា បានប្រាប់ទៅកាន់ក្រុមប្រមូលផ្តុំទាំងនោះថា ការដែលពួកគេរារាំងមិនឱ្យមានការប្រមូលផ្តុំនៅមុខសាលាដំបូងនោះ គឺដើម្បីរក្សាសណ្តាប់ធ្នាប់សាធារណៈនិងបញ្ចៀសការកកស្ទះចរាចរណ៍។
លោកថា៖ «យើងរៀបចំសណ្តាប់ធ្នាប់ កុំឱ្យកកស្ទះចរាចរណ៍»។
កាលពីថ្ងៃទី៣ ខែសីហា រដ្ឋបាលរាជធានីភ្នំពេញ បានចេញសេចក្តីណែនាំមួយដោយគូសបញ្ជាក់ថា សកម្មភាពជួបជុំប្រមូលផ្តុំនៅមុខសាលាដំបូងនោះ បានធ្វើឱ្យប៉ះពាល់ដល់ប្រក្រតីភាពសង្គម សណ្តាប់ធ្នាប់សាធារណៈ លំហូរចរាចរណ៍ និងប្រាសចាសពីគោលការណ៍ច្បាប់ស្តីពីការធ្វើបាតុកម្មដោយសន្តិវិធី។
រដ្ឋបាលរាជធានីភ្នំពេញបានបន្តថា រាល់ការជួបប្រជុំប្រមូលផ្តុំតវ៉ាទាំងអស់ ត្រូវជូនដំណឹងជាលាយលក្ខណ៍អក្សរទៅកាន់រដ្ឋបាលរាជធានីភ្នំពេញ ស្របតាមច្បាប់និងការណែនាំនានាស្តីពី ការបង្ការ-ទប់ស្កាត់ការរីករាលដាលការចម្លងវីរុសកូវីដ១៩។
រដ្ឋបាលរាជធានីភ្នំពេញ បានបញ្ជាក់ថា៖ «រាល់សកម្មភាពជួបប្រជុំប្រមូលផ្តុំដែលគ្មានការជូនដំណឹងជាលាយលក្ខណ៍អក្សរមករដ្ឋបាលរាជធានីភ្នំពេញ ត្រូវចាត់ទុកជាទង្វើខុសច្បាប់ ដែលអាជ្ញាធរមានសមត្ថកិច្ចត្រូវចាត់វិធានការតាមច្បាប់ជាធរមាន»។
គួរបញ្ជាក់ថា លោក រ៉ុង ឈុន សមាជិកក្រុមប្រឹក្សាឃ្លាំមើលកម្ពុជា ត្រូវបានចៅក្រមស៊ើបសួរសាលាដំបូងរាជធានីភ្នំពេញ សម្រេចឃុំខ្លួនបណ្តោះអាសន្ននៅពន្ធនាគារព្រៃស រាជធានីភ្នំពេញ កាលពីថ្ងៃទី១ ខែសីហា ឆ្នាំ២០២០ ក្រោមបទចោទថា ញុះញង់ឱ្យមានការប្រព្រឹត្តបទឧក្រិដ្ឋជាអាទិ៍ពាក់ព័ន្ធនឹងបញ្ហាព្រំដែន៕
