មន្ត្រីក្រសួងបរិស្ថានបានថ្លែងថា ប្រជាពលរដ្ឋនៅរាជធានីភ្នំពេញប្រើប្រាស់ថង់ប្លាស្ទិកជាង១០លានថង់ក្នុងមួយថ្ងៃ ប៉ុន្តែក្រសួងអះអាងថា នឹងរកវិធានការទប់ស្កាត់ឱ្យទាន់ពេលដើម្បីការពារកុំឱ្យប៉ះពាល់ដល់បរិស្ថានកាន់តែធ្ងន់ធ្ងរ។
សន្និសីទសារព័ត៌មានស្ដីពី«ការប្រែប្រួលអាកាសធាតុ និងផលប៉ះពាល់មកលើប្រទេសកម្ពុជា» អ្នកនាំពាក្យក្រសួងបរិស្ថាន លោក នេត្រ ភក្ត្រា ថ្លែងនៅព្រឹកថ្ងៃនេះថា ប្រជាពលរដ្ឋនៅរាជធានីភ្នំពេញ ប្រើប្រាស់ថង់ប្លាស្ទិកជាង១០លានថង់ក្នុងមួយថ្ងៃ។ មន្ត្រីរូបនោះបង្ហាញការព្រួយបារម្ភថា បើទុកឱ្យដល់ឆ្នាំ២០៥០ កាកសំណង់ថង់ប្លាស្ទិកនៅលើភពផែនដីនឹងកើនដល់៣៤ប៊ីលានតោន ហើយកាន់តែធ្វើឱ្យប៉ះពាល់ដល់បរិស្ថានកាន់តែធ្ងន់ធ្ងរ។
ករណីនេះ លោក នេត្រ ភក្ត្រា អះអាងថា នឹងពង្រឹងការអនុវត្តអនុក្រឹត្យរបស់រដ្ឋាភិបាលស្តីពីការគ្រប់គ្រងប្លាស្ទិក ដើម្បីទប់ស្កាត់កុំឱ្យប៉ះពាល់ដល់បរិស្ថាន។
លោក នេត្រ ភក្ត្រា អះអាងថា៖ «ដើម្បីចូលរួមកាត់បន្ថយ យើងត្រូវធ្វើអ្វី នៅក្នុងនោះរដ្ឋាភិបាលបានដាក់ឱ្យអនុវត្តអនុក្រឹត្យស្តីពីការគ្រប់គ្រងថង់ប្លាស្ទិក អញ្ចឹងបានយើងឃើញនៅតាមទីផ្សារទំនើបមួយចំនួនបានដាក់តម្លៃបន្ថែម៤០០រៀលទៅលើការប្រើប្រាស់ប្លាស្ទិក ហើយយើង ហើយយើងឃើញថា ការដាក់កំណត់តម្លៃនេះ ការអប់រំផង ជាការកាត់បន្ថយឱ្យថយផង ហើយការកាត់បន្ថយនេះមានកម្រិតរហូតដល់ជាង៣០% ចន្លោះពី៣០%ទៅ៤០% នៅតាមទីផ្សារទំនើបដែលយើងបានដាក់ពាក្យបណ្តឹង»។
បន្ថែមពីនេះ លោកបញ្ជាក់ថា ក្រសួងនឹងបញ្ជូនក្រុមការងារចុះស្រាវជ្រាវប្រមូលសំណល់ប្លាស្ទិកពីខេត្តនៅឯនាយសមុទ្រ រួមមាន ខេត្តកែប កំពត និងខេត្តព្រះសីហនុជាដើម ដើម្បីទប់ស្កាត់កុំឱ្យហូរចូលសមុទ្រធ្វើឱ្យប៉ះពាល់ដល់បរិស្ថានផងដែរ។
សាស្ត្រាចារ្យដេប៉ាតឺម៉ង់បរិស្ថាននៃសាកលវិទ្យាល័យភូមិន្ទភ្នំពេញ លោក ស្ពាន់ វិន ប្រាប់ថា ដើម្បីទប់ស្កាត់កាកសំណល់ប្លាស្ទិកបាន រដ្ឋាភិបាលត្រូវពង្រឹងការអនុវត្តច្បាប់និងធ្វើការអប់រំដល់ក្មេងៗជំនាន់ក្រោយ ទើបទទួលបានផលវិជ្ជមាន។
សាស្ត្រាចារ្យ ស្ពាន់ វិន មានប្រសាសន៍ថា៖ «យើងជំរុញនិងការអនុវត្តច្បាប់គ្រប់គ្រងថង់ប្លាស្ទិកនៅក្នុងផ្សារឬក៏ម៉ាតឱ្យបានច្រើន ហើយទីពីរ ជំរុញនូវការកែច្នៃថង់ប្លាស្ទិកតាមរយៈនៃការជំរុញ និងការដាក់តម្លៃប្រើ វិធានការសេដ្ឋកិច្ច ដើម្បីជំរុញឱ្យអ្នកផលិតគាត់ផលិតនូវថង់ប្លាស្ទិកដែលងាយនឹងមានការកែឆ្នៃឡើងវិញ ហើយអាចគេប្រើសម្រាប់ជាប្រយោជន៍សម្រាប់ប្រើឡើងវិញ ហើយទីបី ជំរុញក្នុងការអប់រំទៅលើអ្នកជំនាន់ក្រោយ ក្មេងនៅសាលារៀន ឱ្យយល់ដឹងពីការចូលរួមនិងកាត់បន្ថយ»។
របាយការណ៍សិក្សាមួយដែលបង្ហាញក្នុងវេទិកាស្ដីពីកាកសំណល់នៅកម្ពុជាកាលពីខែវិច្ឆិកា ឆ្នាំ២០១៩ និយាយថា ប្រទេសកម្ពុជាទាំងមូលបង្កើតកាកសំណល់សំរាមជាង១ម៉ឺនតោនជារៀងរាល់ថ្ងៃ ឬជាង៣លាន៦សែនតោននៅក្នុងមួយឆ្នាំ។
បើតាមសេចក្ដីប្រកាសព័ត៌មានដដែលនេះ គ្រាន់តែរាជធានីភ្នំពេញមួយ បានបង្កើតឱ្យមានកាកសំណល់ក្នុងបរិមាណចន្លោះពី២ពាន់ទៅដល់៣ពាន់តោនជារៀងរាល់ថ្ងៃ ដែលក្នុងនោះមាន៦00តោនគឺជាកាកសំណល់ប្លាស្ទិក។
តួលេខដែលផ្ដល់ដោយទីលានចាក់សំរាមនៅរាជធានីភ្នំពេញ បង្ហាញថា ក្នុងខែសីហា ឆ្នាំ២០១៩ កន្លងទៅ សំរាមប្រមូលបាននៅភ្នំពេញ មានចំនួនជិត៣ពាន់តោនក្នុង១ថ្ងៃ ខណៈដែលទីលានចាក់សំរាមនេះអាចទ្រទ្រង់សំរាមបានដល់ត្រឹមឆ្នាំ២០៣០៕