ពលរដ្ឋប្រមាណ១០នាក់ តំណាងឱ្យ៣៦គ្រួសារ មកពីស្រុកស្ទោងនិងស្រុកកំពង់ស្វាយ ខេត្តកំពង់ធំ បានស្នើលោកនាយករដ្ឋមន្ត្រី ហ៊ុន សែន ជួយអន្តរាគមន៍ដោះស្រាយវិវាទដីធ្លី ដោយពួកគាត់បានចោទអាជ្ញាធរថា បានឃុបឃិតជាមួយឈ្មួញក្លែងបន្លំឯកសារយកដីរបស់ពួកគាត់ធ្វើកម្មសិទ្ធិ។
ក្នុងញត្តិដាក់ទៅខុទ្ទកាល័យនាយករដ្ឋមន្ត្រីនៅព្រឹកថ្ងៃចន្ទនេះ ក្រុមប្រជាពលរដ្ឋបានចោទថា លោក ភិន សំអុល អតីតមេឃុំដំរីស្លាប់ លោក គី សាវុថា អភិបាលរងស្រុកកំពង់ស្វាយ និងលោក សៀន ឆេងកូ ជាឈ្មួញដី បានឃុបឃិតគ្នាក្លែងបន្លំឯកសារយកដីធ្លីអ្នកភូមិជាបន្តបន្ទាប់តាំងពីឆ្នាំ២០១៥មក ក្នុងទំហំដីសរុបជាង៧៤ហិកតា។
ញត្តិដដែលនេះបានបញ្ជាក់ថា ដីដែលមានជម្លោះនោះជាប្រភេទដីស្រែដែលអ្នកភូមិបានចូលទៅអាស្រ័យផលតាំងពីឆ្នាំ១៩៧៩ និងមានលិខិតបញ្ជាក់ការកាន់កាប់ពីអាជ្ញាធរមូលដ្ឋានត្រឹមត្រូវ។
លោក សយ សៀ ដែលអះអាងថាជាតំណាងពលរដ្ឋ បានប្រាប់វីអូឌីក្រោយដាក់ញត្តិថា លោក គី សាវុថា បានបង្ខិតបង្ខំឱ្យពលរដ្ឋទទួលយកសំណងបន្តិចបន្តួចនិងបានគំរាមកំហែងចាប់ខ្លួនពលរដ្ឋណាដែលហ៊ានតវ៉ាថែមទៀត។
លោកបន្តថា អភិបាលរងស្រុករូបនេះក៏បានដាក់កម្លាំងសមត្ថកិច្ចចុះការពារដីជម្លោះ ដោយមិនឱ្យប្រជាពលរដ្ឋណាចូលអាស្រ័យបានឡើយ ប៉ុន្តែបានអនុញ្ញាតឱ្យឈ្មួញដី ឈ្មោះ សៀន ឆេងកូ អាចដាក់គ្រឿងចក្រឈូសឆាយនិងបង្កបង្កើនផលបានទៅវិញ។
លោកបន្ថែមថា៖ «ឥលូវពួកខ្ញុំចូលទៅក្នុងដីទំនាស់នោះអត់បានទេ [បើសិនចូល]តែចូល គាត់[អភិបាលរងស្រុក]ឱ្យប៉ូលិសចាប់។ គេឱ្យប៉ូលិសនិងសន្តិសុខភូមិចេញមកការពារដីហ្នឹងទាំងអស់ អីចឹងហើយបានជាពួកខ្ញុំចេះតែភ័យ ហើយឡើងមកសុំឱ្យសម្តេច[ហ៊ុន សែន]ជួយ»។
អ្នកស្រី ប៊ុន នាន រស់នៅឃុំព្រះដំរី ស្រុកស្ទោង ដែលអះអាងថាបានបាត់បង់ដំណាំស្រូវអស់៥ហិកតា ដោយសារការឈូសឆាយពីសំណាក់អាជ្ញាធរស្រុកនិងឈ្មួញដីកាលពីឆ្នាំ២០១៩ បាននិយាយថា កន្លងមក អ្នកភូមិធ្លាប់ដាក់ញត្តិសុំកិច្ចអន្តរាគមន៍ពីអាជ្ញាធរថ្នាក់ខេត្ត ក្រសួងរៀបចំដែនដី និងស្ថាប័នផ្សេងៗទៀតដែរ ប៉ុន្តែរហូតពេលនេះ នៅតែពុំមានដំណោះស្រាយនៅឡើយ។
អ្នកស្រីបន្ថែមថា៖ «សូមឱ្យសម្តេច [ហ៊ុន សែន] ជួយដល់ពួកខ្ញុំផង កុំឱ្យខ្ញុំស៊ីបបរដូចជំនាន់ ប៉ុល ពត ទៀត! ព្រោះខ្ញុំមានដីតែបន្តិចបន្តួចនេះសម្រាប់បង្កបង្កើនផល សូមសម្តេចជួយពួកខ្ញុំឱ្យបានដីធ្វើស្រែចិញ្ចឹមកូនចៅបន្តទៀតផង»។
មន្ត្រីខុទ្ទកាល័យនាយករដ្ឋមន្ត្រី គឺលោក គង់ ចំរើន បានទទួលញត្តិពីតំណាងប្រជាពលរដ្ឋនិងបានចារលិខិតមួយទៀតឱ្យតំណាងពលរដ្ឋយកទៅដាក់នៅសាលាខេត្តកំពង់ធំផងដែរ។
អភិបាលរងស្រុកកំពង់ស្វាយ លោក គី សាវុថា និងអតីតមេឃុំដំរីស្លាប់ លោក ភិន សំអុល និងឈ្មួញដី បានច្រានចោលទាំងស្រុងចំពោះការចោទប្រកាន់របស់ប្រជាពលរដ្ឋទាំងនោះ។
លោក គី សាវុថា បានលើកឡើងថា ពលរដ្ឋដែលកំពុងតវ៉ានេះជាអ្នកសុំដីរបស់លោក សៀន ឆេងកូ ដើម្បីអាស្រ័យផលជាច្រើនឆ្នាំមកហើយ ប៉ុន្តែបែរជាយកដីនោះធ្វើជាកម្មសិទ្ធិនិងបានប្តឹងម្ចាស់ដីថែមទៀត។
លោកបញ្ជាក់ថា៖ «អីចឹងបានថា! ពួកគាត់ប្តឹងក៏ប្តឹងទៅ ចោទប្រកាន់ខ្ញុំម៉េចក៏ចោទទៅ សុំឱ្យមន្ត្រីខុទ្ទកាល័យសម្តេចចុះមកវាយតម្លៃមក បើខ្ញុំខុសនោះ»។
បើតាមអភិបាលរងស្រុករូបនេះ អាជ្ញាធរក៏ធ្លាប់បានសម្របសម្រួលដោះស្រាយស្ទើរចប់ទាំងស្រុងហើយ គឺនៅសល់តែពលរដ្ឋប្រមាណ៣ទៅ៤គ្រួសារប៉ុណ្ណោះដែលមិនព្រមទទួលយកការដោះស្រាយ ដោយសារតែពួកគេស្តាប់តាមការញុះញង់ពីបុគ្គលមួយចំនួន។
អភិបាលខេត្តកំពង់ធំ លោក សុខ លូ បានមានប្រសាសន៍ថា អាជ្ញាធរខេត្តបានទទួលបណ្តឹងពីក្រុមប្រជាពលរដ្ឋហើយ ហើយលោកនឹងចាត់មន្ត្រីចុះស្រាវជ្រាវឱ្យបានច្បាស់លាស់ ដើម្បីដោះស្រាយបញ្ចប់វិវាទក្នុងពេលឆាប់ៗខាងមុខនេះ។
លោកថា៖ «និយាយរួមឱ្យតែមានពាក្យបណ្តឹងមក គឺយើងនឹងចាត់ក្រុមការងារទៅដោះស្រាយជាក់ស្តែងដល់មូលដ្ឋានតែម្តង ហើយសម័យនេះហើយគ្មានអ្នកណាទៅយកដីពួកគាត់ទេ»។
មន្ត្រីសម្របសម្រួលគម្រោងធុរកិច្ច និងសិទ្ធិមនុស្សនៃមជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត មានប្រសាសន៍ថា ការដែលពលរដ្ឋនាំគ្នាដាក់ញត្តិនៅខុទ្ទកាល័យនាយករដ្ឋមន្ត្រីនេះ ទំនងជាពួកគាត់អស់ជំនឿលើការដោះស្រាយរបស់អាជ្ញាធរថ្នាក់ក្រោមជាតិ ហើយក្រសួងស្ថាប័នពាក់ព័ន្ធគួរតែធ្វើការស៊ើបអង្កេតនិងបង្ហាញតម្លាភាពនៃការដោះស្រាយ បើមិនដូច្នោះទេ ពលរដ្ឋនៅតែបន្តឡើងទៅតវ៉ាដល់ថ្នាក់ជាតិដដែល៕