មនុស្សមួយចំនួនដែលប៉ះពាល់ស្រ្តីមានផ្ទុកកូវីដ១៩នៅខេត្តកណ្តាល ត្រូវបានមន្ទីរសុខាភិបាលហៅមកធ្វើតេស្ត។ នេះបើតាមការបញ្ជាក់របស់ប្រធានមន្ទីរសុខាភិបាលខេត្តកណ្ដាល លោក គុយ ប៊ុនធឿន ដែលថ្លែងប្រាប់វីអូឌីនៅថ្ងៃទី១០ ខែសីហា។
ប្រធានមន្ទីរសុខាភិបាលខេត្តកណ្ដាល លោក គុយ ប៊ុនធឿន ឱ្យដឹងថា លទ្ធផលតេស្តលើសមាជិកគ្រួសាររបស់ស្ត្រីរូបនោះ បង្ហាញថា ពួកគេទាំង៩នាក់នោះមិនមានផ្ទុកកូវីដ១៩ទេ។
លោកថា ជំនាញសុខាភិបាលកំពុងធ្វើរឿងនេះដោយយកចិត្តទុកដាក់ ដើម្បីបង្ការការរីករាលដាលនៃមេរោគកូវីដ១៩។
លោក គុយ ប៊ុនធឿន មានប្រសាន៍ថា៖ «៩នាក់ហ្នឹងលទ្ធផលអវិជ្ជមានទាំង៩។ យើងបន្តស្រាវជ្រាវថា តើអ្នកណាខ្លះមានពាក់ព័ន្ធជិតស្និទ្ធជាមួយគាត់? ដើម្បីធ្វើតេស្ត ដើម្បីធ្វើតេស្តបន្តទៀតតាមនីតិវិធី តាមការផ្ដល់ព័ត៌មានពីក្រុមគ្រួសារគាត់ តាមការបញ្ជាក់គាត់»។
ទាក់ទងនឹងបញ្ហានេះ ចៅសង្កាត់សិត្បូ ក្រុងតាខ្មៅ លោក អ៊ុំ ឡេង បានសរសេររបាយការណ៍មួយដាក់ជូនអភិបាលក្រុងតាខ្មៅ ដោយបញ្ជាក់ថា ពលរដ្ឋជាច្រើននៅសិត្បូមានការបារម្ភបន្ទាប់ពីរកឃើញស្ត្រីឆ្លងមេរោគកូវីដ១៩។
ចៅសង្កាត់រៀបរាប់ក្នុងលិខិតថា ស្ត្រីរូបនោះមកដល់ផ្ទះកាលពីថ្ងៃទី៣០ ខែកក្កដា និងបានជួបមនុស្សជាច្រើន រាប់តាំងពីចែកប្រាក់ឱ្យក្មេងៗក្នុងភូមិ ធ្វើចង្ហាន់ប្រគេនព្រះសង្ឃនៅវត្ត ចែកប្រាក់ឱ្យចាស់ៗជាដើម។
ចៅសង្កាត់បន្ថែមថា សាម៉ីខ្លួនថែមទាំងហៅពេទ្យចាក់ថ្នាំនិងផ្សំថ្នាំលេប ព្រមទាំងទៅធ្វើតេស្តនៅមន្ទីរពេទ្យជ័យជម្នះទៀតផង។
ទោះជាយ៉ាងណាក្ដី ប្រធានមន្ទីរសុខាភិបាល លោក គុយ ប៊ុនធឿន លើកឡើងថា ការធ្វើរបាយការណ៍របស់ចៅសង្កាត់សិត្បូហាក់លឿនពេក ដែលអាចនាំឱ្យមានការយល់ច្រឡំ។ លោកអំពាវនាវឱ្យពលរដ្ឋថែរក្សាសុខភាពពីកូវីដ១៩និងជឿជាក់លើចំណាត់ការរបស់ផ្នែកសុខាភិបាល។
ក្រសួងសុខាភិបាលបញ្ជាក់ថា ស្ដ្រីដែលរកឃើញថាផ្ទុកមេរោគកូវីដ១៩នៅភូមិព្រែកត្រែង ឃុំសិត្បូ ក្រុងតាខ្មៅ ខេត្តកណ្ដាល ជាកងកម្លាំងមួកខៀវរបស់កម្ពុជាប្រចាំនៅអង្គការសហប្រជាជាតិ មកពីប្រទេសម៉ាលី ស្ថិតនៅតំបន់អាហ្វ្រិកកណ្ដាល។
គិតត្រឹមចន្ទនេះ កម្ពុជារកឃើញអ្នកឆ្លងមេរោគកូវីដ១៩ ចំនួន២៥១នាក់ ក្នុងនោះអ្នកជាសះស្បើយចំនួន២១៩នាក់៕
