ក្រសួងសុខាភិបាល ក្រើនរំលឹកដល់ប្រជាពលរដ្ឋទាំងអស់ រួមនិងអាជ្ញាធរមូលដ្ឋាន ត្រូវបង្កើនការចូលរួមចលនាលុបបំបាត់ជម្រកមូសខ្លា និងទប់ស្កាត់ការកកើតសត្វមូស ដើម្បីការពារសុខភាព ខណៈករណីសង្ស័យជំងឺគ្រុនឈីក បានកើនឡើងដល់ជាង២០០០ករណី នៅខេត្តចំនួន១៥។
យោងតាមសេចក្តីជូនដំណឹងរបស់ក្រសួងសុខាភិបាល នៅថ្ងៃសៅរ៍នេះ បានឱ្យដឹងថា គិតត្រឹមថ្ងៃទី០៦ ខែសីហា ការរកឃើញករណីសង្ស័យជំងឺគ្រុនឈីកសរុបមានចំនួន ២០៤៧នាក់ ដែលបានរាយការណ៍តាមរយៈប្រព័ន្ធឃ្លាំមើលជំងឺគ្រុនឈាមពីមន្ទីរសុខាភិបាលខេត្តចំនួន១៥ រួមមាន ប៉ៃលិន បន្ទាយមានជ័យ ឧត្តរមានជ័យ ព្រះវិហារ សៀមរាប កំពង់ចាម ត្បូងឃ្មុំ ស្ទឹងត្រែង កំពត ពោធិ៍សាត់ កណ្តាល កំពង់ធំ តាកែវ បាត់ដំបង និងខេត្តព្រះសីហនុ។
ក្រសួងបន្តថា អ្នកជំងឺប្រមាណ ៧២,៤០% នៃករណីសង្ស័យសរុប មានជំងឺគ្រុនឈីក។
ក្រសួងបញ្ជាក់ថា៖ «ចំនួនអ្នកឈឺ ៨០% នៃករណីសង្ស័យសុរប មកពីខេត្តបន្ទាយមានជ័យ សៀមរាប កំពង់ចាម និងតាកែវ។ អ្នកជំងឺប្រមាណ៩០%ក្នុងចំណោមអ្នកជំងឺសរុបបានជាសះស្បើយ ហើយនៅសល់១០%កំពុងបន្តការព្យាបាលនៅមន្ទីរពេទ្យរដ្ឋ»។
បើតាមក្រសួងសុខាភិបាល ក្នុងចំណោមករណីសង្ស័យជំងឺនេះ មាន ៥៨% (ស្មើនឹង១១៨៥នាក់) កើតមានលើមនុស្សពេញវ័យ, ចំនួន ៣០,៣% ជាកុមារអាយុលើសពី៥ឆ្នាំ និង១១,៧% ជាកុមារអាយុក្រោម៥ឆ្នាំ។
រដ្ឋមន្ត្រីក្រសួងសុខាភិបាល លោក ម៉ម ប៊ុនហេង បានក្រើនរំលឹក និងលើកទឹកចិត្តដល់ប្រជាពលរដ្ឋគ្រប់រូប និងអាជ្ញាធរមូលដ្ឋានថ្នាក់ក្រោមជាតិ ត្រូវបង្កើនការចូលរួមចលនាលុបបំបាត់ជម្រកមូសខ្លា និងទប់ស្កាត់ការកកើតឡើងវិញសត្វមូស ដោយត្រូវទម្លាប់រស់នៅស្អាត ធ្វើអនាម័យផ្ទះសម្បែង ផ្ទះមានពន្លឺចេញចូលគ្រប់គ្រាន់ លុបបំបាត់ព្រៃស៊ុបទ្រុបជុំវិញផ្ទះ និងត្រូវដាក់ថ្នាំអាបែតក្នុងពាងឬអាងឬវត្ថុស្តុកទឹកជាដើម។
លោកបន្តថា៖ «អំឡុងពេលថ្ងៃចាំបាច់ ត្រូវស្លៀកសំលៀកបំពាក់មានដៃវែងជើងវែង សម្រាន្តក្នុងមុងជាប្រចាំ ទាំងថ្ងៃទាំងយប់ និងមិនត្រូវអង្គុយលេងនៅជិតទីកន្លែងងងឹងៗនោះទេ។ ត្រូវសកម្មចូលរួមកម្ចាត់ដង្កូវទឹកនៅតាមទីកន្លែងឬវត្ថុដែលមានទឹកដក់ ដែលទុកចោលមិនប្រើប្រាស់»។
លោករដ្ឋមន្ត្រី បានបញ្ជាក់បន្ថែមថា ក្នុងករណីមានអាការៈមិនស្រួលខ្លួន ដូចជា ក្តៅខ្លួនលើសពី៣៨អង្សា ចេញកន្ទួលក្រហមលើខ្លួនប្រាណ ឬនៅដៃ ឬមានបញ្ហាសុខភាព ត្រូវប្រញាប់ទៅស្វែងរកការពិគ្រោះពិនិត្យព្យាបាលនៅតាមន្ទីរពេទ្យរដ្ឋដែលនៅជិតបំផុត។
ប្រធានមន្ទីរសុខាភិបាលខេត្តកំពង់ចាម លោកវេជ្ជបណ្ឌិត គឹម សួរភីរុណ បានមានប្រសាសន៍ថា ចាប់តាំងពីដើមឆ្នាំមក ក្នុងខេត្តកំពង់ចាម មានអ្នកកើតជំងឺគ្រុនឈីកសរុបចំនួន ២៩២នាក់ ក្នុងនោះ មានអ្នកសះស្បើយប្រមាណ ២៨០នាក់ និងអ្នកកំពុងសំរាកព្យាបាលប្រមាណ១២នាក់។
លោកបានបន្តថា បើទោះជាខេត្តនេះ នៅមិនទាន់មានអ្នកឈឺធ្ងន់ធ្ងរ ដោយសារជំងឺនេះក៏ដោយ ក៏អាជ្ញាធរខេត្ត ខិតខំចុះអប់រំ និងផ្សព្វផ្សាយដល់ប្រជាពលរដ្ឋ ឲ្យមានការយល់ដឹងពីការសំអាតបរិស្ថានជុំវិញផ្ទះ ព្រមទាំងលុបបំបាត់ទឹកដក់ក្បែរផ្ទះ និងត្រូវគេងក្នុងមុងជាដើម។
លោកប្រាប់ថា៖«យើងខិតខំទប់ស្កាត់បង្ការ! តែខ្ញុំជឿជាក់ថាវាអាចនឹងមានបន្តទៀត ព្រោះខែនេះជាខែរដូវវស្សា ចឹង!វាមានមូសមានអី អាចកើតមូសកើតអីឆ្លង តែមន្រ្តីសុខាភិបាលយើងខិតខំចូលរួម អប់រំ ផ្សព្វផ្សាយ និងដាក់អាបែតហើយដើម្បីទប់ស្កាត់ជំងឺនេះ»៕
វីអូឌីសូមធ្វើការកែតម្រូវកថាខណ្ឌទី៥៖« បើតាមក្រសួងសុខាភិបាល ក្នុងចំណោមករណីសង្ស័យជំងឺនេះ មាន ៨៥% (ស្មើនឹង១១៨៥នាក់) កើតមានលើមនុស្សពេញវ័យ…»។ ខ្លឹមសារដែលត្រឹមត្រូវគឺ«បើតាមក្រសួងសុខាភិបាល ក្នុងចំណោមករណីសង្ស័យជំងឺនេះ មាន ៥៨% (ស្មើនឹង១១៨៥នាក់) កើតមានលើមនុស្សពេញវ័យ…»៕
