រដ្ឋាភិបាលវៀតណាមបានបង្ហាញក្តីសង្ឃឹមថា ចាប់ពីដើមខែសីហានេះជាពេលដែលចាប់ផ្តើមអនុវត្តកិច្ចព្រមព្រៀងពាណិជ្ជកម្មមិនជាប់ពន្ធជាមួយអឺរ៉ុប នឹងទទួលបានការវិនិយោគកើនឡើង ជួយទាំងសេដ្ឋកិច្ចជាតិនិងបង្កើតការងារឱ្យពលរដ្ឋ។
នៅក្នុងកិច្ចព្រមព្រៀងពាណិជ្ជកម្មសេរីរវាងវៀតណាមនិងសហភាពអឺរ៉ុប (EVFTA) ដែលកាត់បន្ថយពន្ធនៃការនាំទំនិញឆ្លងដែនភាគីទាំងពីរបានរហូតដល់៩៩ភាគរយនោះ គឺចាប់ផ្តើមអនុវត្តពីថ្ងៃទី១ ខែសីហា ឆ្នាំ២០២០។ កិច្ចព្រមព្រៀងនេះមានសុពលភាពអនុវត្តន៍បានរយៈពេល១០ឆ្នាំ។
ប្រភេទទំនិញដែលវៀតណាមចាប់ផ្តើមនាំចេញទៅកាន់សហភាពអឺរ៉ុបរួមមាន ទូរសព្ទដៃ គ្រឿងអេឡិចត្រូនិច សម្លៀកបំពាក់ ទ្រនាប់ជើង និងផលិតផលកសិកម្ម។ ផលិតផលកសិកម្មផ្តោតពិសេសលើអង្ករ គ្រឿងសមុទ្រ និងកាហ្វេ។
ទីភ្នាក់ងារព័ត៌មានរដ្ឋវៀតណាម VNA ចុះផ្សាយនៅថ្ងៃទី៦ ខែសីហា កិច្ចព្រមព្រៀងវៀតណាមនិងអឺរ៉ុបនេះ បានផ្តល់ទំនុកចិត្តកាន់តែខ្លាំងថែមលើការវិនិយោគ ការបង្កើនផលិតផលក្នុងស្រុក និងនាំចេញ។ ការអនុវត្តកិច្ចព្រមព្រៀងនេះ ធ្វើឱ្យក្រុមអ្នកវិនិយោគមានឱកាសចំនេញច្រើននិងបង្កើនការវិនិយោគនៅក្នុងប្រទេសវៀតណាម ហើយក៏អាចបង្កើតការងារបានចំនួនច្រើនឡើងថែមទៀត។
បច្ចុប្បន្នក្រុមអ្នកវិនិយោគរបស់សហភាពអឺរ៉ុប កំពុងតែដំណើរការនៅក្នុងសេដ្ឋកិច្ចចំនួន១៨វិស័យ នៅក្នុងខេត្តចំនួន៥២ក្នុងចំណោមខេត្តទាំងអស់របស់វៀតណាមចំនួន៦៣។ ភាគច្រើនដែលអ្នកវិនិយោគរបស់អឺរ៉ុបធ្វើសកម្មភាពនៅវៀតណាម គឺផ្តោតលើអេឡិចត្រូនិចនិងអចលនទ្រព្យ។
រដ្ឋាភិបាលវៀតណាមព្យាករថា កិច្ចព្រមព្រៀងជាមួយអឺរ៉ុបនេះនឹងធ្វើឱ្យការនាំចេញទៅអឺរ៉ុបកើន៤២,៧ភាគរយ សេដ្ឋកិច្ចរបស់វៀតណាមរីកចម្រើនឡើង៤,៦ភាគរយបន្ថែមទៀត គិតត្រឹមឆ្នាំ២០២៥។ ចំណែកគណៈកម្មការអឺរ៉ុបព្យាករថា សេដ្ឋកិច្ចរបស់អឺរ៉ុបកើនឡើងចំនួន២៩,៥ប៊ីលានដុល្លារ បានពីការធ្វើពាណិជ្ជកម្មជាមួយវៀតណាម គិតត្រឹមឆ្នាំ២០៣៥។ នេះបើតាមរបាយការណ៍ចុះផ្សាយដោយ Vietnam Briefing។
វៀតណាមក្លាយជាប្រទេសទី២នៅតំបន់អាស៊ានដែលចុះកិច្ចព្រមព្រៀងជាមួយអឺរ៉ុបលើការធ្វើពាណិជ្ជកម្មសេរីបន្ទាប់ពីប្រទេសសិង្ហបុរី។ វៀតណាមក៏ក្លាយជាប្រទេសធំទី២គិតលើទំហំពាណិជ្ជកម្មជាមួយអឺរ៉ុប ដោយវ៉ាដាច់ប្រទេសឥណ្ឌូនេស៊ីនិងថៃ។
ដំណើរការចរចាស្វែងរកកិច្ចព្រមព្រៀងរវាងវៀតណាមនិងអឺរ៉ុបនេះ ចាប់ផ្តើមតាំងពីខែតុលាឆ្នាំ២០១០ ដែលដំណើរការចរចារីកចម្រើនរហូត តែដល់ឆ្នាំ២០១៥ទើបដំណើរការយឺតវិញព្រោះត្រូវលម្អិតលើពន្ធដែលត្រូវលុបចេញ។ ដំណើរការចរចាចាប់ផ្តើមស្ទុះលឿនជាថ្មីទៀតនៅអំឡុងខែវិច្ឆិកា ឆ្នាំ២០១៩ រហូតដល់ថ្ងៃទី១ ខែសីហា ឆ្នាំ២០២០ ទើបមានអនុវត្តន៍កិច្ចព្រមព្រៀងជាផ្លូវការ៕
អត្ថបទពាក់ព័ន្ធ
កិច្ចព្រមព្រៀងពាណិជ្ជកម្មសេរីអឺរ៉ុប-វៀតណាមចាប់អនុវត្តនៅដើមខែក្រោយ
វៀតណាមហាក់មិនបារម្ភ EU និង US ជ្រៀតជ្រែកកិច្ចការផ្ទៃក្នុង
