ពលរដ្ឋជាង២០នាក់តំណាងឱ្យជាង២០០គ្រួសារ នៅឃុំបឹងខ្យាង ស្រុកកណ្តាលស្ទឹង ខេត្តកណ្តាល ដែលអះអាងថា កំពុងរងផលប៉ះពាល់ដីធ្លីពីគម្រោងអភិវឌ្ឍន៍ព្រលានយន្តហោះអន្តរជាតិភ្នំពេញថ្មី បានប្រមូលផ្តុំគ្នានៅក្បែរភូមិគ្រឹះលោកនាយករដ្ឋមន្ត្រី ហ៊ុន សែន នៅក្រុងតាខ្មៅ ដើម្បីសុំឱ្យលោកជួយដោះស្រាយផលប៉ះពាល់ជូនពួកគេ។
អ្នកស្រី ឆន ចាន់ថុល មកពីភូមិកំពង់តាឡុង ឃុំបឹងខ្យាង បានប្រាប់វីអូឌីនៅកន្លែងតវ៉ានៅព្រឹកថ្ងៃសុក្រនេះថា ពលរដ្ឋចំនួន២០៣គ្រួសារ មានក្បាលដីសរុប៧៨៣ក្បាលដី មានជម្លោះរយៈពេល៣ឆ្នាំហើយជាមួយក្រុមហ៊ុន OCIC ដែលទទួលបានសិទ្ធិលើការអភិវឌ្ឍព្រលានយន្តហោះភ្នំពេញថ្មីពីរាជរដ្ឋាភិបាល។
អ្នកស្រីបន្តថា ការពន្យារពេលដោះស្រាយនេះ បានធ្វើឱ្យប៉ះពាល់ដល់ជីវភាពរបស់ពួកគាត់ ដោយសារមិនអាចចូលបង្កបង្កើនផល មិនអាចទិញលក់ និងដោះដូរដីនោះបានឡើយ ហើយក្រុមហ៊ុនក៏បាននិងកំពុងដាក់គ្រឿងចក្រឈូសឆាយប៉ះពាល់ដីធ្លីរបស់អ្នកភូមិផងដែរ។
អ្នកស្រីបន្ថែមថា៖ «ផលប៉ះពាល់គឺក្រុមហ៊ុនបានបង្ខាំងដីមិនឱ្យពួកយើងដាក់ដីហ្នឹងទៅឈ្មួញផ្សេងបាន។ គេទុកដីហ្នឹងតែម្តង។ យើងបង្កបង្កើនផលអត់បានទេ ព្រោះទឹកអត់គ្រប់គ្រាន់ ដោយសារមន្ទីរធនធានទឹកអត់ទម្លាក់ឱ្យប្រើប្រាស់ដូចកាលពីមុន។»
បើតាមស្រ្តីរូបនេះ កន្លងមក ក្រុមហ៊ុនបានដោះស្រាយជាគោលនយោបាយ ដោយផ្តល់សំណងចន្លោះពី៣ដុល្លារទៅ៨ដុល្លារក្នុងមួយម៉ែត្រការ៉េ ប៉ុន្តែសំណងនេះពួកគាត់ពុំអាចទទួលយកបានទេ។
អ្នកស្រីថា៖ «ដំណោះស្រាយ គឺពួកយើងចង់បានតម្លៃទីផ្សារឱ្យសមរម្យ តម្លៃបច្ចុប្បន្ន១ម៉ែត្រការ៉េ១០០ដុល្លារ»។
ពាក់ព័ន្ធនឹងការដាក់ញត្តិនេះ មន្ត្រីយាមផ្ទះរបស់លោកនាយករដ្ឋមន្ត្រី ហ៊ុន សែន មិនបានទទួលយកញត្តិពីក្រុមពលរដ្ឋនោះទេ ដោយបង្វែរឱ្យពលរដ្ឋយកញត្តិទៅដាក់នៅសាលាខេត្តកណ្តាលវិញ។
ក្នុងពេលប្រមូលផ្តុំនោះ បុរសម្នាក់ដែលមិនប្រាប់ឈ្មោះនិងអះអាងថាជាអ្នកយាមនៅភូមិគ្រឹះលោកនាយករដ្ឋមន្ត្រី ហ៊ុន សែន បានប្រាប់ទៅពលរដ្ឋថា មន្ត្រីនៅភូមិគ្រឹះទទួលតែញត្តិពលរដ្ឋមកពីខេត្តផ្សេងប៉ុណ្ណោះ។ ចំណែកពលរដ្ឋក្នុងខេត្តកណ្តាលជាមួយគ្នា គឺត្រូវរុញទៅអាជ្ញាធរខេត្តជាអ្នកពិនិត្យនិងដោះស្រាយ។
លោកបាននិយាយថា៖ «បងឯងមកអង្គុយនៅទីនេះ៥ឆ្នាំទៀត ក៏មិនមានដំណោះស្រាយដែរ គេមានរបៀបរបបធ្វើការតាមដំណាក់កាលរបស់គេ។ បើបងប្អូនមកផ្លូវកាត់អីចឹង ម៉េចកើត! អីចឹងគេចាំបាច់បង្កើតសាលាឃុំ សាលាស្រុក សាលាខេត្តធ្វើអី។»
អភិបាលខេត្តកណ្តាល លោក គង់ សោភ័ណ្ឌ មានប្រសាសន៍ថា រដ្ឋបាលខេត្តបានទទួលយកសំណើរបស់ប្រជាពលរដ្ឋទៅពិចារណាក្នុងការដោះស្រាយហើយ។
លោកបន្តថា៖ «សំណូមពររបស់បងប្អូនយើង គឺគាត់ទាមទារដោះស្រាយតាមតម្លៃទីផ្សារសព្វថ្ងៃ អីចឹងយើងនៅប្រឈមកន្លែងហ្នឹងបន្តិចទេ។ យើងនឹងពិនិត្យកិច្ចការនេះជាមួយក្រសួងរៀបចំដែនដីដែលលោកទទួលបន្ទុកផ្ទាល់ក្នុងការស្រាវជ្រាវនិងដោះស្រាយ»។
មេឃុំបឹងខ្យាង លោក ណៃ ចាន់ឌី ឱ្យដឹងថា គម្រោងអភិវឌ្ឍន៍ព្រលានយន្តហោះភ្នំពេញថ្មីនៅខេត្តកណ្តាល បានធ្វើឱ្យប៉ះពាល់ដីពលរដ្ឋជាង២ពាន់ក្បាលដី ប៉ុន្តែលោកពុំបានដឹងច្បាស់ពីចំនួនគ្រួសារទេ។
លោកបន្ថែមថា៖ «ការដោះស្រាយរបស់ថ្នាក់លើកន្លងមកហ្នឹងគឺពី៣ដុល្លារដល់៨ដុល្លារ ១ម៉ែត្រការ៉េ ដល់អីចឹងពលរដ្ឋគាត់អត់ព្រម»។
មន្ត្រីសម្របសម្រួលគម្រោងធុរកិច្ច និងសិទ្ធិមនុស្សនៃមជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត មានប្រសាសន៍ថា យោងតាមច្បាប់ រាល់ការអភិវឌ្ឍតម្រូវឱ្យមានការសិក្សាស្រាវជ្រាវ និងវាយតម្លៃផលប៉ះពាល់បរិស្ថាននិងសង្គម ហើយរាជរដ្ឋាភិបាលត្រូវចរចាដោះស្រាយផលប៉ះពាល់ដោយផ្តល់តម្លៃសមរម្យអាចទទួលយកបានទាំងអស់គ្នា។
លោកថា៖ «នៅពេលដែលចរចាតម្លៃសមរម្យមួយដែលគាត់[ពលរដ្ឋ]អាចទទួលយកបាន គាត់អាចទៅទិញផ្ទះ ទិញដីនៅកន្លែងផ្សេងបាន ដើម្បីធ្វើកសិកម្មទ្រទ្រង់ជីវភាពបាន នោះគាត់ទទួលយកហើយ ប៉ុន្តែប្រសិនបើដោះស្រាយឱ្យគាត់ក្នុងតម្លៃមួយកំណត់ដោយរដ្ឋអីចឹង ពេលដែលគាត់មិនអាចទទួលយកបាន អាហ្នឹងជាសិទ្ធិរបស់គាត់ក្នុងការទាមទារឱ្យរដ្ឋាភិបាលឬក៏ក្រុមហ៊ុនហ្នឹងត្រូវតែចរចាបន្តទៀត ដើម្បីដោះស្រាយតម្លៃមួយដែលគាត់អាចទទួលយកបាន»។
ក្នុងលិខិតមួយរបស់រាជរដ្ឋាភិបាល កាលពីចុងឆ្នាំ២០១៧ បានឱ្យដឹងថា គម្រោងសាងសង់អាកាសយានដ្ឋានភ្នំពេញអន្តរជាតិថ្មី មានតម្លៃ១,៥០០លានដុល្លារ ស្ថិតលើផ្ទៃដីទំហំ២,៦០០ហិកតា នៅភូមិសាស្ត្រស្រុកកណ្ដាលស្ទឹងនិងស្រុកស្អាង ខេត្តកណ្ដាល និងមួយផ្នែកនៃស្រុកបាទី ខេត្តតាកែវ៕
