ប្រជាពលរដ្ឋដែលមានបញ្ហាដីធ្លីជាង៧០០នាក់ បានប្រមូលផ្តុំនៅមុខសាលាខេត្តកោះកុងនៅថ្ងៃពុធនេះ ដើម្បីទាមទារឱ្យអាជ្ញាធរខេត្តពន្លឿនការដោះស្រាយបញ្ចប់វិវាទដីធ្លីជាមួយនឹងក្រុមហ៊ុនចំនួន២។
អ្នកស្រី ដេត ហួរ ដែលអះអាងថាជាតំណាងពលរដ្ឋមកពីស្រុកស្រែអំបិល បានប្រាប់វីអូឌីថា ប្រជាពលរដ្ឋចំនួន១៩៧គ្រួសារ រស់នៅឃុំជីខលើ មានជម្លោះដីធ្លីជាមួយក្រុមហ៊ុនហេងហ៊ុយតាំងពីឆ្នាំ២០០៧មកដល់បច្ចុប្បន្ន។ អ្នកស្រីបានបន្តថា ក្នុងអំឡុងពេលមានជម្លោះនេះ ក្រុមហ៊ុនបានដាក់គ្រឿងចក្រឈូសឆាយដីស្រែចម្ការរបស់ពួកគាត់ ដោយមិនបានដោះស្រាយសំណងឱ្យបានសមរម្យដល់ពួកគាត់ឡើយ។
អ្នកស្រីបាននិយាយថា៖ «លោក ហេង ហ៊ុយ [ម្ចាស់ក្រុមហ៊ុន] គាត់មិនបានឱ្យសំណងអីមកពួកយើងទេ គាត់បានត្រឹមតែគំរាមកំហែងនិងបង្ខិតបង្ខំឱ្យពលរដ្ឋទទួលយកសំណងតិចតួចប៉ុណ្ណោះ […] ពួកយើងមកសាលាខេត្តនេះជាលើកចុងក្រោយហើយ បើគាត់អត់មានដំណោះស្រាយសម្រាប់ពួកយើងទេ ពួកយើងនឹងឡើងទៅផ្ទះសម្តេច [នាយករដ្ឋមន្ត្រី] ជួយអន្តរាគមន៍»។
ក្រុមប្រជាពលរដ្ឋទាំងនោះបានស្នើឱ្យអាជ្ញាធរខេត្តកាត់ឆ្វៀលដីទំហំ៤២១ហិកតាចេញពីដីក្រុមហ៊ុន ដើម្បីបែងចែកទៅឱ្យប្រជាពលរដ្ឋវិញនិងសុំប័ណ្ណកម្មសិទ្ធិដីធ្លី។ នេះបើតាមការបញ្ជាក់របស់អ្នកស្រី ដេត ហួរ។
ចំណែកលោក ឈឹម សុផាន ដែលអះអាងថាជាតំណាងពលរដ្ឋ៧៤៣គ្រួសារ បាននិយាយថា ពួកគាត់មានជម្លោះដីធ្លីជាមួយក្រុមហ៊ុនស្ករអំពៅរបស់លោកឧកញ៉ា លី យ៉ុងផាត់ តាំងពីឆ្នាំ២០០៦មក និងធ្លាប់បានស្វែងរកកិច្ចអន្តរាគមន៍ពីអាជ្ញាធរពាក់ព័ន្ធនៅថ្នាក់ខេត្តនិងថ្នាក់ជាតិជាច្រើនលើកមកហើយ ប៉ុន្តែមកដល់ពេលនេះនៅតែពុំទាន់មានដំណោះស្រាយបញ្ចប់ករណីវិវាទដីធ្លីនេះនៅឡើយ។
តំណាងរូបនេះបន្តថា កន្លងមក ប្រជាពលរដ្ឋបានផ្ញើសាលាកប័ត្រព័ត៌មានក្បាលដីទៅរដ្ឋបាលខេត្ត ដើម្បីស្នើឱ្យរដ្ឋបាលខេត្តបញ្ជូនបន្តទៅក្រសួងរៀបចំដែនដី ពិនិត្យនិងរកដំណោះស្រាយ ប៉ុន្តែពុំទទួលបានលទ្ធផលណាមួយទេ។
លោកថា៖ «អីចឹងលទ្ធផលគឺអាជ្ញាធរខេត្តកោះកុងមិនបានបញ្ចូលសាលាកប័ត្រព័ត៌មានក្បាលដីដែលអាជ្ញាធរភូមិឃុំចុះហត្ថលេខាទៅក្រសួងរៀបចំដែនដីទេ គឺទើរត្រឹមខេត្ត។ ដូច្នេះពួកយើងសំណូមពរទៅលោកជំទាវអភិបាលខេត្ត បញ្ជូនឯកសារនិងដោះស្រាយដីធ្លីជូនពួកខ្ញុំដែលឧកញ៉ា លី យ៉ុងផាត់ បានរំលោភយក»។
អភិបាលខេត្តកោះកុង លោកស្រី មិថុនា ភូថង បានបដិសេធអត្ថាធិប្បាយ ដោយប្រាប់ថាជាប់ប្រជុំ។
ប៉ុន្តែបើតាមវីដេអូឃ្លីបរបស់ក្រុមប្រជាពលរដ្ឋដែលបានថតក្នុងកិច្ចប្រជុំរវាងតំណាងប្រជាពលរដ្ឋនិងអាជ្ញាធរខេត្ត លោក ទូ សាវុធ អភិបាលរងខេត្ត បានមានប្រសាសន៍ថា លោកនឹងពាំនាំសំណើរបស់ប្រជាពលរដ្ឋទៅកាន់អភិបាលខេត្តដើម្បីពិនិត្យ។
លោកថា៖ «លោកជំទាវ [អភិបាលខេត្ត] មានភារកិច្ចប្រជុំនៅភ្នំពេញ ដូច្នេះខ្ញុំជាអភិបាលរងខេត្ត ខ្ញុំទទួលយកសំណើនិងសំណូមពរពីបងប្អូន ហើយសំណើនិងសំណូមពរទាំងនេះ ខ្ញុំនឹងដាក់ជូនគាត់ឱ្យពិចារណាមើលនិងចាត់ចែងរកដំណោះស្រាយ»។
មន្រ្តីសម្របសម្រួលអង្គការការពារសិទ្ធិមនុស្សលីកាដូប្រចាំខេត្តកោះកុង លោក ហ៊ួរ អ៊ីន មានប្រសាសន៍ថា ជម្លោះដីធ្លីនៅខេត្តកោះកុងនៅតែបន្តកើនឡើង ដោយសារតែមានករណីខ្លះ ប្រជាពលរដ្ឋបានទទួលយកសំណងតិចតួចនិងដោយបង្ខំ ទើបធ្វើឱ្យពួកគាត់ផ្ទុះការតវ៉ាឡើងវិញ ខណៈវិវាទខ្លះទៀត អាជ្ញាធរខេត្តនិងថ្នាក់ជាតិ ហាក់មិនសូវយកចិត្តទុកដាក់ដោះស្រាយជូនពលរដ្ឋ ដែលធ្វើឱ្យជម្លោះអូសបន្លាយមកដល់បច្ចុប្បន្ន។
លោកថា៖ «ទំនាស់ដ៏រ៉ាំរ៉ៃមិនសូវបានដោះស្រាយ ពិតជាធ្វើឱ្យប៉ះពាល់យ៉ាងខ្លាំងដល់ស្ថានភាពសេដ្ឋកិច្ចគ្រួសាររបស់ពលរដ្ឋ។ ពួកគាត់ត្រូវចំណាយពេលវេលា ថវិកា និងជួនកាលឡើងមកតវ៉ា ត្រូវបានអាជ្ញាធររារាំងនិងរើសអើងថែមទៀត។ ហើយវាក៏ប៉ះពាល់ដល់មុខមាត់រដ្ឋាភិបាលដែលបានបង្ហាញថា រដ្ឋាភិបាលអត់មានឆន្ទៈឬសមត្ថភាពដោះស្រាយជម្លោះរវាងប្រជាពលរដ្ឋនិងក្រុមហ៊ុន ខណៈដែលខ្លួនជាអ្នកសម្រេចផ្តល់ដីឱ្យក្រុមហ៊ុនអភិវឌ្ឍន៍»។
បើតាមកំណត់ហេតុប្រជុំរវាងតំណាងពលរដ្ឋនិងអាជ្ញាធរខេត្តនៅព្រឹកថ្ងៃពុធនេះ ក៏មានពលរដ្ឋមកពីសហគមន៍ផ្សេងៗជាច្រើននាក់ បានចូលរួមប្រមូលផ្តុំតវ៉ានៅមុខសាលាខេត្តនេះដែរ ដោយពលរដ្ឋខ្លះបានស្នើទៅអាជ្ញាធរខេត្តជួយសម្របសម្រួលទៅសាលាដំបូងខេត្តឱ្យមានការដោះលែងនិងទម្លាក់ការចោទប្រកាន់លើពលរដ្ឋដែលរងការចោទប្រកាន់ដោយសារជម្លោះដីធ្លី និងពលរដ្ឋខ្លះទៀតស្នើសុំដីសង្គមកិច្ចពីរដ្ឋផងដែរ៕