មន្ត្រីសុខាភិបាលនិងអាជ្ញាធរខេត្តព្រៃវែង បានសម្រេចឱ្យមនុស្សចំនួន១១នាក់ជាសាច់ញាតិរបស់បុរសពីរនាក់ដែលរត់គេចចេញពីមណ្ឌលចត្តាឡីស័កនោះ ត្រូវធ្វើចត្តាឡីស័កនៅមូលដ្ឋានរបស់ពួកគេ ដើម្បីបង្ការការឆ្លងវីរុសកូវីដ១៩។
កាលពីថ្ងៃទី៣ ខែសីហា មានបុរសខ្មែរពីរនាក់ដែលបន្តជើងហោះហើរមកពីប្រទេសម៉ាឡេស៊ី បានរត់ចេញពីមណ្ឌលចត្តាឡីស័កនៅវិទ្យាល័យ ហ៊ុន សែន កំពង់លាវ ខេត្តព្រៃវែង ប៉ុន្តែត្រូវបានអាជ្ញាធរខេត្តរកឃើញនៅផ្ទះរបស់ពួកគេនៅយប់ថ្ងៃដដែលនោះ។ ពួកគេបានមកដល់កម្ពុជា កាលពីថ្ងៃទី២៣ ខែកក្កដា និងត្រូវបញ្ជូនទៅធ្វើចត្តាឡីស័កនៅខេត្តព្រៃវែង ជាទីដែលពួកគេរស់នៅ។
អនុប្រធានមន្ទីរសុខាភិបាលខេត្តព្រៃវែង លោក ហ៊ន់ រិទ្ធ បានប្រាប់វីអូឌីកាលពីថ្ងៃទី៤ ខែសីហាថា ក្រោយពីបាននាំខ្លួនបុរសទាំងពីរនាក់នេះមកកន្លែងចត្តាឡីស័កវិញនិងធ្វើការសាកសួររួចមក ក្រុមការងារចត្តាឡីស័កបានសម្រេចមិនផាកពិន័យពួកគេទេ ដោយសារតែពួកគេមានជីវភាពខ្វះខាត ប៉ុន្តែតម្រូវឱ្យធ្វើចត្តាឡីស័ករយៈពេល១៤ថ្ងៃឡើងវិញ។
លោកបន្តថា ក្នុងអំឡុងពេលដែលបុរសទាំងពីរបានរត់ចេញពីមណ្ឌលចត្តាឡីស័ក ពួកគេបានជួបនិងប៉ះពាល់ជាមួយសាច់ញាតិរបស់ពួកគេចំនួន១១នាក់ រួមមាន ម្តាយ អ៊ុំស្រី ភរិយា កូន និងបងប្អូនជាដើម ដែលករណីនេះ ក្រុមការងារបានសម្រេចឱ្យអ្នកទាំងនោះស្ថិតនៅក្រោមការធ្វើចត្តាឡីស័កនៅថ្នាក់ស្រុក។
លោក ហ៊ន់ រិទ្ធ បានបញ្ជាក់ថា៖ «មន្ត្រីសុខាភិបាលយើងនឹងធ្វើការតាមដានសុខភាពពួកគេ[អ្នកទាំង១១នាក់]ជាប្រចាំនិងតម្រូវឱ្យធ្វើចត្តាឡីស័កនៅថ្នាក់ស្រុក ដើម្បីបង្ការការឆ្លងជំងឺនេះ»។
អភិបាលរងខេត្តព្រៃវែង លោក ចាន់ ថា មានប្រសាសន៍ថា បើតាមចម្លើយរបស់បុរសទាំងពីរនាក់នោះ គឺកាលដែលពួកគេរត់ចេញពីមណ្ឌលចត្តាឡីស័កនោះ ដោយសារតែពួកគេបានធ្វើតេស្តបីដងមកហើយ ហើយលទ្ធផលអវិជ្ជមាន។
តែយ៉ាងណា លោកថា៖ «ពួកគាត់មិនយល់អំពីកាតព្វកិច្ចរបស់ខ្លួន ពួកគាត់មានកាតព្វកិច្ចនៅធ្វើចត្តាឡីស័កឱ្យគ្រប់ចំនួនថ្ងៃ[១៤ថ្ងៃ]តាមការណែនាំរបស់ក្រសួង ប៉ុន្តែពួកគាត់ធ្វេសប្រហែស ហើយនិងព្រហើន[…] គាត់អាងថាយកសំណាក៣ដងហើយ ឃើញអវជ្ជិមានរហូត ដូច្នេះគាត់យល់ថាគាត់អត់មានជំងឺនេះ ហើយគាត់រត់ចេញ»។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាល បានអំពាវនាវដល់ប្រជាពលរដ្ឋទាំងអស់ ដែលកំពុងធ្វើចត្តាឡីស័ក ត្រូវមានការអត់ធ្មត់និងអនុវត្តតាមគោលការណ៍វិធានសុខាភិបាល ដើម្បីសុខភាពផ្ទាល់ខ្លួននិងឱ្យប្រាកដថា ខ្លួនមិនពាំនាំនូវវីរុសកូវីដ១៩ទៅចម្លងដល់ក្រុមគ្រួសារនិងសហគមន៍។
លោកស្រីថ្លែងថា៖ «ដូច្នេះបើសិនជាបងប្អូនព្យាយាមរត់គេចពីការធ្វើចត្តាឡីស័កនេះ គឺជាកំហុសឆ្គង ហើយអាជ្ញាធរនិងមន្ទីរសុខាភិបាល នឹងធ្វើការសួរនាំនិងវាយតម្លៃទៅតាមកម្រិតនិងទំហំនៃទង្វើរបស់បងប្អូន»។
អ្នកនាំពាក្យរូបនេះ បានឱ្យដឹងដែរថា បើតាមអនុក្រឹត្យចុះថ្ងៃទី១៧ ខែកញ្ញា ឆ្នាំ២០១៥ ដែលមានចែងពីវិធានការសុខាភិបាលដើម្បីទប់ស្កាត់ការឆ្លងនិងរាលដាលជាអន្តរជាតិនៃជំងឺនៅតាមច្រកចេញចូល គឺអ្នកដែលរត់ចេញពីមណ្ឌលចត្តាឡីស័កនឹងត្រូវប្រឈមនឹងការពិន័យអន្តរការណ៍នូវទឹកប្រាក់ពី២សែនរៀលទៅ១លានរៀលទៅតាមទំហំនៃបទល្មើស ហើយក្នុងករណីអ្នកដែលរត់ពីមណ្ឌលចត្តាឡីស័កមានផ្ទុកវីរុសកូវីដ១៩ដែលអាចមានលទ្ធភាពចម្លងទៅអ្នកដទៃក្នុងសហគមន៍ នឹងត្រូវចាត់ចូលក្នុងបទល្មើសព្រហ្មទណ្ឌ៕