ក្រសួងសុខាភិបាលបានស្នើដល់អាជ្ញាធរនៅតាមបណ្តារាជធានី-ខេត្តទាំងអស់ បង្កើនការយាមកាមនៅតាមមណ្ឌលចត្តាឡីស័កឱ្យបានតឹងរ៉ឹងបន្ថែមទៀត ដើម្បីចៀសវាងមានអ្នករត់ចេញពីមណ្ឌលចត្តាឡីស័កបន្តទៀត។
អ្នកនាំពាក្យក្រសួងសុខាភិបាល លោកស្រី ឱ វណ្ណឌីន បានមានប្រសាសន៍នៅថ្ងៃទី៤ ខែសីហានេះថា ការងារគ្រប់គ្រងចត្តាឡីស័កគឺជាការងារអន្តរវិស័យ ដែលត្រូវធ្វើការងាររួមគ្នារវាងក្រសួង ស្ថាប័នពាក់ព័ន្ធនិងអាជ្ញាធរមានសមត្ថកិច្ច។
លោកស្រីបន្តថា បើទោះកន្លងមក ការងារចត្តាឡីស័កមានការសហការគ្នាយ៉ាងល្អពីអាជ្ញាធរពាក់ព័ន្ធ ប៉ុន្តែក៏នៅមានបុគ្គលដែលមានបំណងរត់ចេញពីការធ្វើចត្តាឡីស័កនេះ បានរិះរកគ្រប់នីតិវិធី ដើម្បីរត់ចេញ ដែលករណីនេះទាមទារឱ្យមានការពង្រឹងការងារយាមកាមនេះបន្ថែមទៀត។
លោកស្រីបានថ្លែងថា៖ «ស្នើសុំឱ្យអាជ្ញាធរមូលដ្ឋាន អាជ្ញាធរមានសមត្ថកិច្ច បង្កើននូវលទ្ធភាពយាមកាមឱ្យបានតឹងរ៉ឹងបន្ថែមទៀត ដើម្បីចៀសវាងនូវការរត់ចេញពីមណ្ឌលចត្តាឡីស័កនេះ»។
លោកស្រី ឱ វណ្ណឌីន ក៏បានអំពាវនាវដល់ប្រជាពលរដ្ឋទាំងអស់ដែលកំពុងធ្វើចត្តាឡីស័ក ត្រូវមានការអត់ធ្មត់និងអនុវត្តតាមគោលការណ៍វិធានសុខាភិបាល ដើម្បីសុខភាពផ្ទាល់ខ្លួននិងឱ្យប្រាកដថា ខ្លួនមិនពាំនាំនូវវីរុសកូវីដ១៩ទៅចម្លងដល់ក្រុមគ្រួសារនិងសហគមន៍។
លោកស្រីបានបន្ថែមថា៖ «យើងមានអនុក្រឹត្យលេខ១២៩ ក្រសួងសុខាភិបាល ស្នើអាជ្ញាធរបង្កើនការការពារមណ្ឌលចត្តាឡីស័ក ចុះថ្ងៃទី១៧ ខែកញ្ញា ឆ្នាំ២០១៥ ដូច្នេះបើសិនជាបងប្អូនព្យាយាមរត់គេចពីការធ្វើចត្តាឡីស័កនេះ គឺជាកំហុសឆ្គង ហើយអាជ្ញាធរនិងមន្ទីរសុខាភិបាល នឹងធ្វើការសួរនាំនិងវាយតម្លៃទៅតាមកម្រិតនិងទំហំនៃទង្វើរបស់យើង ហើយក្រុមការងារនឹងសម្រេចធ្វើការដាក់ពិន័យអន្តរការណ៍ទៅតាមនោះ»។
បើតាមអ្នកនាំពាក្យរូបនេះ អ្នកធ្វើចត្តាឡីស័កដែលរត់ចេញពីមណ្ឌលចត្តាឡីស័ក នឹងត្រូវពិន័យអន្តរការណ៍ពី២សែនរៀលទៅ១លានរៀលទៅតាមទំហំនៃបទល្មើស ហើយក្នុងករណីអ្នកដែលរត់ពីមណ្ឌលចត្តាឡីស័កមានផ្ទុកនូវវីរុសកូវីដ១៩ ដែលអាចមានលទ្ធភាពចម្លងទៅអ្នកដទៃក្នុងសហគមន៍ នឹងត្រូវចាត់ចូលក្នុងបទល្មើសព្រហ្មទណ្ឌ។
ការស្នើនេះបានធ្វើឡើងក្រោយពីមានបុរសជនជាតិខ្មែរពីរនាក់ដែលមកពីប្រទេសម៉ាឡេស៊ី បានរត់ចេញពីមណ្ឌលចត្តាឡីស័កនៅវិទ្យាល័យ ហ៊ុន សែន កំពង់លាវ ខេត្តព្រៃវែង កាលពីយប់ថ្ងៃទី៣ ខែសីហា ប៉ុន្តែត្រូវបានរកឃើញវិញនៅយប់ថ្ងៃដដែល។
ដោយឡែក កាលពីថ្ងៃទី១៧ ខែកក្កដា ក៏មានស្ត្រីខ្មែរសញ្ជាតិអាមេរិកម្នាក់ទៀត ធ្លាប់បានរត់ចេញពីមណ្ឌលចត្តាឡីស័កនៅសណ្ឋាគារមួយក្នុងរាជធានីភ្នំពេញនិងត្រូវបានមន្ត្រីសុខាភិបាលរកឃើញវិញនៅខេត្តកំពង់ចាម ហើយស្ត្រីរូបនោះត្រូវបានមន្ត្រីសុខាភិបាលខេត្តសម្រេចផាកពិន័យអន្តរការណ៍ចំនួន១លានរៀល។
អនុប្រធានមន្ទីរសុខាភិបាលខេត្តព្រៃវែង លោកវេជ្ជបណ្ឌិត ហ៊ន់ រិទ្ធ បានមានប្រសាសន៍ថា ក្រោយពីមានករណីមនុស្សពីរនាក់បានរត់គេចចេញពីមណ្ឌលចត្តាឡីស័កនេះ អាជ្ញាធរខេត្តបានណែនាំដល់កម្លាំងសមត្ថកិច្ចបន្ថែមកម្លាំងដើម្បីការពារបន្ថែមទៅតាមការស្នើរបស់ក្រសួង។
លោកបានថ្លែងថា៖ «ក្នុងកិច្ចប្រជុំព្រឹកមិញនេះ អភិបាលខេត្ត លោកបានស្នើសុំកម្លាំងសមត្ថកិច្ច កងរាជអាវុធហត្ថខេត្ត ដើម្បីការពារមណ្ឌលចត្តាឡីស័កបន្ថែម ហើយអាជ្ញាធរកំពុងពង្រឹងលើការងារនេះបន្ថែម»។
ចំណែកអភិបាលរងខេត្តព្រៃវែង លោក ចាន់ ថា បានឱ្យដឹងថា បុរស២នាក់ដែលបានរត់គេចពីមណ្ឌលចត្តាឡីស័កនៅខេត្តព្រៃវែងនោះ មានឈ្មោះ កំសត់ វិស័យ អាយុ២១ឆ្នាំ និងម្នាក់ទៀតឈ្មោះ ចន កំសាន អាយុ៣២ឆ្នាំ បានធ្វើចត្តាឡីស័ករយៈពេល១២ថ្ងៃមកហើយនិងបានធ្វើតេស្តរកវីរុសកូវីដ១៩ចំនួន៣ដងមកហើយ ដោយលទ្ធផលអវិជ្ជមាន។
លោកបន្តថា ពួកគេត្រូវបានអាជ្ញាធររកឃើញវិញនៅយប់ថ្ងៃដដែលនៅផ្ទះរបស់ពួកគេ ក្នុងភូមិបឹងជ័រ ឃុំព្រៃទទឹង និងភូមិព្រែកសណ្តែក ឃុំព្រែកចង្ក្រាន ស្រុកស៊ីធរកណ្តាល ហើយក៏ត្រូវបានបញ្ជូនទៅមណ្ឌលចត្តាឡីស័កវិញ។
បើតាមសេចក្តីប្រកាសព័ត៌មានរបស់ក្រសួងសុខាភិបាល គិតត្រឹមថ្ងៃទី០៤ ខែសីហា ឆ្នាំ២០២០ ចំនួនអ្នកឆ្លងជំងឺកូវីដ១៩ សរុបមានចំនួន២៤១នាក់ ក្នុងនោះមាន២០០នាក់បានជាសះស្បើយ និង៤១នាក់ទៀតកំពុងសម្រាកព្យាបាល៕