អាជ្ញាធរអះអាងថា ប្រជាសហគមន៍ខ្ទង់២០នាក់មានជម្លោះដីធ្លីជាមួយក្រុមហ៊ុនចិនមួយនៅស្រុកតំបែរ សមត្ថកិច្ចកំពុងបន្តសាកសួរទៀតនាថ្ងៃនេះនៅស្នងការដ្ឋាននគរបាលខេត្តត្បូងឃ្មុំ។
នាយករដ្ឋបាលសាលាខេត្តត្បូងឃ្មុំ លោក ម៉ៅ ឌុង ប្រាប់វីអូឌីថា កាលពីម្សិលមិញនេះ គឺសមត្ថកិច្ចបានឃាត់ខ្លួនពលរដ្ឋ២០នាក់ ដោយអះអាងថា ពលរដ្ឋទាំងនោះបានតវ៉ាប្រឆាំងមន្ត្រីរាជការចុះអនុវត្តដីការក្សាការពារដីធ្លីជូនក្រុមហ៊ុន។
លោក ម៉ៅ ឌុង បញ្ជាក់ថា រហូតមកដល់ម៉ោង៩ព្រឹកថ្ងៃអង្គារនេះ សមត្ថកិច្ចពុំទាន់ដោះលែងឬបញ្ជូនពលរដ្ឋណាម្នាក់ទៅតុលាការនៅឡើយទេ ដោយថា កំពុងស្ថិតក្រោមការសាកសួរនៅស្នងការដ្ឋាននគរបាលខេត្តត្បូងឃ្មុំនៅឡើយ។
កាលពីម្សិលមិញនេះ អ្នកភូមិ២០នាក់ដែលកំពុងមានជម្លោះដីធ្លីជាមួយក្រុមហ៊ុនចិន ហាម៉ឹនី វីន អ៊ិនវេសមេន ស្ថិតក្នុងឃុំត្រពាំងព្រីង ត្រូវបានសមត្ថកិច្ចចាប់ខ្លួនអំឡុងពេលអាជ្ញាធរចុះអនុវត្តដីការក្សាការពារដីធ្លីជូនក្រុមហ៊ុន ស្ថិតក្នុងភូមិស្រែប្រាំងនិងភូមិបុស្សស្នោរ។
លោក សែម ចំណាន ដែលអះអាងថាជាតំណាងពលរដ្ឋធ្លាប់ប្រាប់វីអូឌីថា អ្នកភូមិ១២៩គ្រួសារ មានដីរួមសហគមន៍៧៨៥ហិកតា មានជម្លោះជាមួយក្រុមហ៊ុន ហាម៉ឹនី វីន អ៊ិនវេសមេន តាំងពីឆ្នាំ២០១២៕