ក្មួយប្រុសលោក រ៉ុង ឈុន បានប្រាប់វីអូឌីនៅមុននេះបន្តិចថា ពូរបស់ខ្លួនត្រូវបានសមត្ថកិច្ចមានគ្នាប្រមាណ៣០នាក់ចាប់ខ្លួនទាំងយប់។
លោក រ៉ុង វិជ្ជា ដែលអះអាងថាជាក្មួយប្រុសរបស់លោក រ៉ុង ឈុន បានអះអាងថា សមត្ថកិច្ចបានមកឡោមព័ទ្ធផ្ទះរបស់ខ្លួន ហើយនាំខ្លួនលោក រ៉ុង ឈុន ទៅ ដោយមិនអនុញ្ញាតឱ្យសាច់ញាតិណាម្នាក់ទៅជាមួយនោះទេ។ លោកថា ពេលនេះលោកមិនទាន់ដឹងថា ពូរបស់លោកត្រូវបាននាំខ្លួនទៅណាទេ។
លោក រ៉ុង វិជ្ជា បានបញ្ជាក់ថា នៅពេលនាំខ្លួននោះ សមត្ថកិច្ចមិនបានបង្ហាញដីកាចាប់ខ្លួនទេ។
អ្នកនាំពាក្យអគ្គស្នងការនគរបាលជាតិ លោក ឆាយ គឹមឃឿន ថាលោកមិនទាន់ទទួលបានដំណឹងនេះនៅឡើយទេ។
លោក រ៉ុង ឈុន បច្ចុប្បន្នជាតំណាងក្រុមប្រឹក្សាឃ្លាំមើលកម្ពុជា ដែលតែងតែនិយាយពីបញ្ហាព្រំដែនប្រទេសកម្ពុជាជាមួយនឹងប្រទេសជិតខាង៕