កិច្ចព្រមព្រៀងពាណិជ្ជកម្មសេរីសហភាពអឺរ៉ុប-វៀតណាម ឬហៅកាត់ EVFTA នឹងចាប់មានសុពលភាពពីថ្ងៃទី១ ខែសីហាខាងមុខ ក្រោមការរំពឹងពីរដ្ឋាភិបាលក្រុងហាណូយថា វានឹងជួយជំរុញកំណើនការនាំទំនិញចេញទៅអឺរ៉ុប២០ភាគរយបន្ថែមទៀតនៅឆ្នាំ២០២០។
តាមរយៈកិច្ចព្រមព្រៀងនេះ សហភាពអឺរ៉ុប (EU) និងវៀតណាមអាចនាំទំនិញទៅនិងមកដោយរួចពន្ធនាំចូល៩៩ភាគរយ និងជួយកាត់បន្ថយរបាំងពន្ធត្រួតគ្នា ធានាកិច្ចការពារកម្មនិមិត្តសញ្ញាភូមិសាស្រ្ត និងបើកចំហទីផ្សារសេវាកម្មនិងលទ្ធកម្មសាធារណៈជាដើម។
ប្រភពពីគេហទំព័រព័ត៌មានធុរកិច្ច Just-Style ចុះផ្សាយនៅថ្ងៃម្សិលមិញ ឱ្យដឹងថា វៀតណាមចាត់ទុកអឺរ៉ុបគឺជាទីផ្សារសក្តានុពលដ៏សម្បូរបែបធំមួយសម្រាប់ទំនិញនាំចេញរបស់វៀតណាម និងជាប្រភពវិនិយោគបរទេសដ៏សំខាន់សម្រាប់ជំរុញកំណើនសេដ្ឋកិច្ចជាតិ។
តាមប្រភពដដែល រដ្ឋមន្រ្តីពាណិជ្ជកម្មនិងឧស្សាហកម្មវៀតណាមលើកឡើងថា កិច្ចព្រមព្រៀង EVFTA នឹងជំរុញកំណើននៃការនាំទំនិញចេញរបស់វៀតណាមទៅអឺរ៉ុប ទន្ទឹមនឹងការបើកឱកាសឱ្យវៀតណាមពង្រីកកិច្ចសហប្រតិបត្តិការជាមួយសមាជិកសហភាពអឺរ៉ុបទាំង២៧ប្រទេស។
តាមការវាយតម្លៃរបស់ធនាគារពិភពលោកនិងរដ្ឋាភិបាលក្រុងហាណូយ ក្រោមកិច្ចព្រមព្រៀងនេះ វៀតណាមនឹងអាចបង្កើនការនាំចេញទៅអឺរ៉ុប២០ភាគរយនៅឆ្នាំ២០២០ ហើយនឹងបង្កើនដល់៤០ភាគរយនៅឆ្នាំ២០២៥ ព្រមទាំងជួយបង្កើនកម្លាំងពលកម្មជំនាញ១២ភាគរយ និងប្រាក់ខែកម្មករទូទៅ១៣ភាគរយ។
តាមការប៉ាន់ប្រមាណដដែល កិច្ចព្រមព្រៀងដែលមានសុពលភាព១០ឆ្នាំនេះ នឹងជួយបង្កើនផលិតផលក្នុងស្រុកសរុប GDP របស់វៀតណាមពី២,១៨ភាគរយ ដល់៣,២៥ភាគរយ ពីឆ្នាំ២០២០ ដល់ឆ្នាំ២០២៣ និងដល់៤,៥៧ភាគរយ ទៅ៥,៣០ភាគរយ ពីឆ្នាំ២០២៤ ដល់ឆ្នាំ២០២៨។
វៀតណាមគឺជាដៃគូពាណិជ្ជកម្មធំបំផុតលំដាប់ទី២ក្នុងតំបន់អាស៊ានរបស់សហភាពអឺរ៉ុប បន្ទាប់ពីសិង្ហបុរី ដោយមានទំហំទឹកប្រាក់៥១,៥ពាន់លានអឺរ៉ូ នៅឆ្នាំ២០១៩ ដែលក្នុងនោះវៀតណាមនាំទំនិញទៅអឺរ៉ុបបានប្រមាណ៣៤,៤ពាន់លានអឺរ៉ូ ឯសហភាពអឺរ៉ុបនាំទំនិញទៅវៀតណាមវិញបានប្រមាណ១១,១ពាន់លានអឺរ៉ូ។
កន្លងមក វៀតណាមនិងសហភាពអឺរ៉ុប បានអនុគ្រោះពន្ធលើទំនិញចេញនិងចូលរវាងគ្នាប្រមាណជាង៤០ភាគរយ ប៉ុន្តែបន្ទាប់ពីកិច្ចព្រមព្រៀងថ្មីចូលជាធរមាន ភាគីទាំង២នឹងបើកឱ្យដៃគូនាំទំនិញចូលប្រទេសនិងតំបន់របស់ខ្លួនដោយមិនចាំបាច់បង់ពន្ធស្ទើរតែទាំងស្រុង។
តាមប្រភពពីគេហទំព័រគណៈកម្មការអឺរ៉ុបឱ្យដឹងថា ទំនិញសំខាន់ដែលអឺរ៉ុបនាំទៅវៀតណាមក្រោមកិច្ចព្រមព្រៀងមានដូចជា ផលិតផលបច្ចេកវិទ្យាជាន់ខ្ពស់ ដែលរាប់បញ្ចូលម៉ាស៊ីននិងបរិក្ខារអេឡិចត្រូនិក យន្តហោះ យានយន្ត និងថ្នាំពេទ្យ។ ឯទំនិញសំខាន់របស់វៀតណាមនាំទៅអឺរ៉ុបក្រោមកិច្ចព្រមព្រៀងនេះវិញ រួមមាន គ្រឿងបង្គុំទូរសព្ទ ផលិតផលអគ្គិសនី ផលិតផលស្បែកជើង កាត់ដេរ និងសម្លៀកបំពាក់ កាហ្វេ អង្ករ គ្រឿងសមុទ្រ និងគ្រឿងសង្ហារឹម។
វៀតណាម មានដៃគូកិច្ចសហប្រតិបត្តិការពាណិជ្ជកម្មសេរីជាមួយប្រទេសចំនួន៥១រួចមកហើយ គិតចាប់ពីឆ្នាំ១៩៩៣។ ប្រទេសទាំង៥១នោះ គឺឋិតក្នុងតំបន់អឺរ៉ុប អាស៊ី និងអាមេរិកឡាទីន។
ដោយឡែកថៃ ក៏កំពុងព្យាយាមបង្កើតកិច្ចព្រមព្រៀង FTA ជាមួយអឺរ៉ុបផងដែរ បន្ទាប់ពីគណៈកម្មការអឺរ៉ុបបានផ្អាកការចរចាជាមួយប្រទេសនេះ ក្រោយរដ្ឋប្រហារយោធាទម្លាក់រដ្ឋាភិបាលស្របច្បាប់ដឹកនាំដោយលោកស្រី យីងឡាក់ ស៊ីណាវ៉ាត្រា នៅឆ្នាំ២០១៤៕