ប្រជាពលរដ្ឋ ៣៣គ្រួសារនៅសហគមន៍មួយ ស្ថិតក្នុងខណ្ឌព្រែកព្នៅ រាជធានីភ្នំពេញ រកកិច្ចអន្តរាគមន៍ពីលោកនាយករដ្ឋមន្ត្រី ហ៊ុន សែន ឱ្យជួយដោះស្រាយវិវាទដីធ្លីជូនពួកគេ។
ប្រជាពលរដ្ឋប្រហែលជាង ៣០នាក់ នៅថ្ងៃនេះ បានប្រមូលផ្តុំគ្នាឈរលើកបដារូបថតលោកនាយករដ្ឋមន្ត្រី ហ៊ុន សែន និងភរិយារបស់លោក នៅមុខវត្តបុទុមវតី ជាកន្លែងដែលមន្ត្រីខុទ្ទកាល័យចាំទទួលញត្តិពីប្រជាពលរដ្ឋមានបញ្ហាផ្សេងៗ។
ញត្តិដែលដាក់ទៅខុទ្ទល័យ បានឱ្យដឹងថា ប្រជាពលរដ្ឋ ៣៣គ្រួសារ ត្រូវបានបុគ្គលម្នាក់ឈ្មោះ សុខ ហេង ប្តឹងទៅតុលាការ ដោយចោទថា អ្នកភូមិទាំងនេះ បានរំលោភយកដីរបស់ខ្លួនទំហំ ១,៦០០ម៉ែត្រការ៉េ ស្ថិតក្នុងភូមិស្វាយចេក សង្កាត់គោករកា។
ញត្តិដដែលបញ្ជាក់ថា អ្នកភូមិទាំងនោះ បានរស់នៅលើដីទំហំនោះតាំងពីឆ្នាំ ២០០៤ ក្រោយពីសាលារាជធានីភ្នំពេញ បានទុកដីនោះសម្រាប់បែងចែកឱ្យពួកគេនៅសហគមន៍ស្វាយចេកថ្មី ប៉ុន្តែ នៅឆ្នាំ២០២០នេះ បុគ្គលឈ្មោះ សុខ ហេង ចេញមកអះអាងថា ដីនោះជាដីរបស់ខ្លួន និងបានប្តឹងពលរដ្ឋទៅតុលាការថែមទៀត។
លោក ខៀវ ផល្លី ដែលអះអាងថា ជាតំណាងប្រជាពលរដ្ឋប្រាប់វីអូឌីបន្ថែមលើញត្តិថា ប្រជាសហគមន៍បានច្រានចោលការចោទប្រកាន់ពីបុគ្គល សុខ ហេង ដោយថា ដីទំហំ ១,៦០០ម៉ែត្ររ៉េនោះ ជាដីរបស់សហគមន៍ស្វាយចេកថ្មី។
លោក ខៀវ ផល្លី បន្ថែមថា៖ «សុំឱ្យសម្តេចជួយ និងរកយុត្តិធម៌ ពីព្រោះលោក សុខ ហេង បានប្តឹងប្រជាពលរដ្ឋពីបទលួចចូលកាន់កាប់អចលវត្ថុខុសច្បាប់ដែលជាដីរបស់គាត់។ ប្រជាពលរដ្ឋមិនបានទៅលួចទេ គឺពលរដ្ឋទៅនៅលើដីរបស់សហគមន៍ទេ។អ៊ីចឹង សុំឱ្យតុលាការ និងសម្តេចជួយចាត់វិធានការលើបុគ្គលម្នាក់នេះ»។
បើតាមលោក ខៀវ ផល្លី ញត្តិរបស់ប្រជាសហគមន៍ត្រូវបានទទួលយកដោយលោក គង់ ចំរើន មន្ត្រីខុទ្ទល័យនាយករដ្ឋមន្ត្រី ហ៊ុន សែន ប៉ុន្តែ លោក ផល្លី ថា លោក គង់ ចំរើន មិនសន្យាអ្វីជាមួយពលរដ្ឋនោះទេ។
វីអូឌីបានព្យាយាមសុំការឆ្លើយតបពី លោក សុខ ហេង តាមរយៈប្រព័ន្ធទូរស័ព្ទដែលផ្តល់ដោយអ្នកភូមិដែរ និងទូរស័ព្ទចូលច្រើនដងត្រូវបានចុចផ្តាច់វិញ។
អភិបាលរងខណ្ឌព្រែកព្នៅ លោក ជា ខេមា បានប្រាប់ថា លោកកំពុងជាប់រវល់ប្រជុំ ហើយមិនអាចបកស្រាយបាននោះឡើយ។ ចំណែកអ្នកនាំពាក្យសាលារាជធានីភ្នំពេញ លោក ម៉េត មាសភក្ដី បានលើកទូរស័ព្ទដែលវីអូឌីស្វែងរកការបកស្រាយនោះឡើយនៅថ្ងៃនេះ។
មន្ត្រីសម្របសម្រួលគម្រោងធុរកិច្ច និងសិទ្ធិមនុស្ស នៃមជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត មានប្រសាសន៍ថា ករណីនេះ ប្រជាពលរដ្ឋត្រូវរកឯកសារ និងប្រមូលភុស្ភតាងឱ្យបានច្បាស់លាស់ ដើម្បីបង្ហាញទៅស្ថាប័នពាក់ព័ន្ធឱ្យជួយដោះស្រាយ។
អ្នកសិទ្ធិមនុស្សរូបនេះ លើកឡើងថា បច្ចុប្បន្ន លោកសង្កេតឃើញបញ្ហាវិវាទដីធ្លីបានផ្ទុះឡើងវិញ ដោយសារអ្នកមានលុយមានអំណាចមួយចំនួនបានរំលោភយកដីធ្លីរបស់ប្រជាពលរដ្ឋ។
លោក វណ្ណ សុផាត បន្ថែមថា៖ «អ៊ីចឹង ប្រជាពលរដ្ឋហ្នឹងគួរតែស្វែងរកឯកសារឱ្យច្បាស់លាស់ជាភុស្ភតាងសម្រាប់យើងដាក់ទៅក្រសួងពាក់ព័ន្ធគេជួយដោះស្រាយ ជាពិសេសក្រសួងរៀបចំដែនដី ដើម្បីជួយពិនិត្យមើលរឿងហ្នឹង ពីព្រោះអីពលរដ្ឋអះអាងថា ដីហ្នឹងសាលារាជធានីភ្នំពេញបានរក្សាទុកឱ្យពួកគាត់ហើយ»។
ញត្តិអ្នកភូមិអះអាងថា ដីទំហំ ១,៦០០ម៉ែត្ររ៉េ គឺជាដីរបស់សាលារាជធានីភ្នំពេញទុកចែកជូនសហគមន៍ស្វាយចេកថ្មី ដោយសហគមន៍មានប័ណ្ណសំគាល់រួម និងផែនទី ហើយមានការឯកភាពពីមន្ទីររៀបចំដែនដីរាជធានីភ្នំពេញ និងអតីតអភិបាលរាជធានីភ្នំពេញលោក កែប ជុតិម៉ា កាលឆ្នាំ២០០៤៕