ប្រធានមន្ទីរសុខាភិបាលខេត្តត្បូងឃ្មុំ លោក កែវ វណ្ណៈ អះអាងថា បុរសកម្ពុជាម្នាក់បានស្លាប់នៅក្នុងមណ្ឌលចត្តាឡីស័ក ឬមណ្ឌលស្នាក់នៅដាច់ដោយឡែកមួយ ស្ថិតនៅក្នុងខេត្តត្បូងឃ្មុំ កាលពីយប់ថ្ងៃម្សិលមិញនេះ។
លោក កែវ វណ្ណៈ បានប្រាប់វីអូឌីនៅថ្ងៃនេះថា បុរសអាយុ២១ឆ្នាំដែលជាពលករធ្វើដំណើរតាមផ្លូវគោកត្រឡប់មកពីប្រទេសម៉ាឡេស៊ីឆ្លងកាត់ប្រទេសថៃចូលមកដល់ប្រទេសកម្ពុជាកាលពីថ្ងៃទី១៥ ខែកក្កដា តាមច្រកប៉ោយប៉ែតនោះ បានស្លាប់កាលពីយប់ថ្ងៃពុធម្សិលមិញនេះ នៅក្នុងមណ្ឌលចត្តាឡីស័កស្វាយឃ្លាំង ស្ថិតក្នុងស្រុកក្រូចឆ្មារ។
លោក កែវ វណ្ណៈ បានឱ្យដឹងថា ការស្លាប់របស់កម្ពុជារូបនេះត្រូវបានសន្និដ្ឋានជាបឋមថា បណ្ដាលមកពីខ្យល់គរ ដោយគាត់មានអាការត្រជាក់រាងកាយ សន្លប់បាត់ស្មារតី មុននឹងស្លាប់។ លោកបញ្ជាក់ថា ក្រោយទទួលមរណភាព ក្រុមវេជ្ជបណ្ឌិតបានយកសំណាកពីសពបុរសនោះ បញ្ជូនមកត្រួតពិនិត្យរកវីរុសកូរ៉ូណាជាថ្មីនៅឯវិទ្យាស្ថានប៉ាស្ទ័រ នៅរាជធានីភ្នំពេញ។
មន្ត្រីសុខាភិបាលរូបនេះ បានឱ្យដឹងថា បុរសកម្ពុជារូបនេះ ត្រូវបានដាក់ឱ្យស្ថិតក្រោមការត្រួតពិនិត្យដោយក្រុមគ្រូពេទ្យនៅក្រុងប៉ោយប៉ែតចាប់ពីថ្ងៃទី១៦ ខែកក្កដា ប៉ុន្តែរកមិនឃើញឆ្លងវីរុសកូរ៉ូណានោះឡើយ មុននឹងអនុញ្ញាតឱ្យធ្វើដំណើរដោយខ្លួនឯងទៅកាន់ស្រុកកំណើតស្ថិតនៅក្នុងខេត្តត្បូងឃ្មុំ នៅថ្ងៃទី១៩ ខែកក្កដា។
លោក កែវ វណ្ណៈ បន្ថែមថា បុរសកម្ពុជារូបនេះបានស្ម័គ្រចិត្តចូលស្នាក់នៅដាច់ដោយឡែករយៈពេល១៤ថ្ងៃចាប់តាំងពីថ្ងៃទី១៩ ខែកក្កដា នៅក្នុងអនុវិទ្យាល័យស្វាយឃ្លាំង។ លោកបន្ថែមថា មនុស្ស៩នាក់ផ្សេងទៀតក៏ត្រូវបានដាក់ឱ្យស្ថិតនៅដាច់ដោយឡែកនៅទីនោះផងដែរ ប៉ុន្តែលទ្ធផលតេស្តសំណាកលើពួកគេ រកមិនឃើញឆ្លងវីរុសកូរ៉ូណានោះឡើយ។
បើតាមលោក កែវ វណ្ណៈ មនុស្ស២៧១នាក់ កំពុងត្រូវបានដាក់ឱ្យស្នាក់នៅដាច់ដោយឡែកនៅតាមមណ្ឌលចត្តាឡីស័កនានា ដែលត្រូវបានរៀបចំឡើងដោយអាជ្ញាធរខេត្តត្បូងឃ្មុំ ក្នុងនោះមានស្ត្រី១០២នាក់។
សេចក្ដីប្រកាសព័ត៌មានក្រសួងសុខាភិបាល បានឱ្យដឹងថា គិតត្រឹមថ្ងៃទី២៣ ខែកក្កដា ឆ្នាំ២០២០នេះ កម្ពុជាមានអ្នកឆ្លងសរុបចំនួន១៩៨នាក់ ក្នុងនោះអ្នកជាសះស្បើយសរុបចំនួន១៤២នាក់ និងអ្នកកំពុងសម្រាកព្យាបាលជំងឺចំនួន៥៤នាក់៕