ក្រុមប្រឹក្សាឃ្លាំមើលកម្ពុជាជំរុញឱ្យរដ្ឋាភិបាលពង្រឹងកងកម្លាំងការពារតាមខ្សែបន្ទាត់ព្រំដែន ដើម្បីកុំឱ្យកម្លាំងអាជ្ញាធរប្រទេសជិតខាងចូលមកក្នុងដែនអធិបតេយ្យភាពនៃប្រទេសកម្ពុជា។
ការជំរុញនេះ ធ្វើឡើងបន្ទាប់ពីតំណាងក្រុមប្រឹក្សាឃ្លាំមើលកម្ពុជាបាននាំគ្នាចុះទៅពិនិត្យនិងជួបប្រជាពលរដ្ឋចំនួន១០៦គ្រួសារនៅកន្លែងដីមានទំនាស់ត្រង់បង្គោលព្រំដែនលេខ១១៤ ដល់លេខ១១៩ ស្ថិតនៅភូមិសាស្ត្រឃុំត្រពាំងផ្លុង ស្រុកពញាក្រែក ខេត្តត្បូងឃ្មុំ កាលពីថ្ងៃទី២០ ខែកក្កដា ឆ្នាំ២០២០។
សេចក្ដីថ្លែងការណ៍ចុះថ្ងៃទី២១ ខែកក្កដា ឆ្នាំ២០២០ របស់តំណាងក្រុមប្រឹក្សាឃ្លាំមើលកម្ពុជាដែលបានចុះទៅជួបប្រជាពលរដ្ឋមានទំនាស់ដីធ្លីនៅស្រុកពញាក្រែក ខេត្តត្បូងឃ្មុំ ឱ្យដឹងថា បើតាមប្រជាពលរដ្ឋចាស់ៗដែលមានអាយុជាង៧០ឆ្នាំរស់នៅភូមិត្រពាំងផ្លុងអះអាងថា ដីដែលអ្នកភូមិរស់នៅតាំងពីទសវត្សរ៍ឆ្នាំ៧០ គឺមានចម្ងាយឆ្ងាយពីបង្គោលព្រំដែនបច្ចុប្បន្ន៥០០ម៉ែត្រ ប៉ុន្តែដីនេះត្រូវបានបាត់បង់ជាបន្តបន្ទាប់ក្រោយពេលរដ្ឋាភិបាលបោះបង្គោលព្រំដែនរួចរាល់ជាមួយប្រទេសវៀតណាម។
សេចក្ដីថ្លែងការណ៍ដដែលថា ការបោះបង្គោលព្រំដែននៅចំណុចភូមិត្រពាំងផ្លុងក៏មានភាពមិនប្រក្រតី ក្នុងនោះដីទំហំ៦០ហិកតាដែលប្រជាពលរដ្ឋខ្មែរធ្លាប់អាស្រ័យផលត្រូវបានអាជ្ញាធរវៀតណាមចូលមកដេញមិនឱ្យធ្វើបន្តទៀត បើទោះបីជាដីនេះស្ថិតក្នុងដែនអធិបតេយ្យភាពកម្ពុជាក៏ដោយ។
សេចក្ដីថ្លែងការណ៍បញ្ជាក់ថា អាជ្ញាធរវៀតណាមបានឆ្លងព្រំដែនមកចូលដេញប្រជាពលរដ្ឋដល់ក្នុងដីខ្មែរជាង២០០ម៉ែត្រពីបង្គោលព្រំដែនដែលបានបោះរួច ប៉ុន្តែអាជ្ញាធរកម្ពុជាមិនបានធ្វើការទប់ស្កាត់សកម្មភាពរបស់អាជ្ញាធរវៀតណាមឡើយ។
កុ្រមប្រឹក្សាឃ្លាំមើលកម្ពុជាជំរុញឱ្យរដ្ឋាភិបាលពង្រឹងកងកម្លាំងការពារតាមខ្សែបន្ទាត់ព្រំដែន ដើម្បីកុំឱ្យអាជ្ញាធរប្រទេសជិតខាងចូលមករំលោភបំពានអធិបតេយ្យភាពប្រទេសកម្ពុជាបន្តទៀត។
តំណាងក្រុមប្រឹក្សាឃ្លាំមើលកម្ពុជា លោក រ៉ុង ឈុន បន្ថែមថា បើទោះបីជាកន្លងមក អាជ្ញាធរវៀតណាមតែងតែរំលោភបំពានចូលទឹកដីកម្ពុជាតាមខ្សែបន្ទាត់ព្រំដែនដោយមិនបានជូនដំណឹងក៏ដោយ លោកសង្កេតឃើញថា អាជ្ញាធរកម្ពុជាហាក់ដូចជាមិនសូវហ៊ានធ្វើការទប់ស្កាត់ឡើយ។
លោកថា៖ «បើតាមយើង តាមខ្សែបន្ទាត់ព្រំដែនខ្មែរយើង ហាក់មានភាពផុយស្រួល មានហានិភ័យ បើសិនជាខ្មែរយើងឈានចូលក្នុងទឹកដីគេបន្តិច គេនឹងឆ្លើយតបមកយើងភ្លាមៗ ប៉ុន្តែចំពោះគេចូលមកកម្ពុជាយើងវិញ មានការយឺតយ៉ាវក្នុងការឆ្លើយតប។ នៅប្រទេសយួន ប្រទេសសៀម ឡាវ នៅតាមបណ្ដោយព្រំដែនរបស់គេមានការអភិវឌ្ឍ បើធៀបនឹងកម្ពុជាយើងគេមានការអភិវឌ្ឍមែនទែន។ អ៊ីចឹងរដ្ឋាភិបាលកម្ពុជាគួរតែធ្វើការអភិវឌ្ឍតាមបណ្ដោយព្រំដែនអ៊ីចឹងដែរ»។
ប្រជាពលរដ្ឋរស់នៅភូមិត្រពាំងផ្លុង អ្នកស្រី ហាក់ ម៉ៃហ៊រ អះអាងថា អ្នកភូមិបានធ្វើស្រែ ចម្ការលើដីទំហំ៦០ហិកតា តាំងពីឆ្នាំ១៩៨២ ដល់ឆ្នាំ១៩៩៧ អាជ្ញាធរខេត្តត្បូងឃ្មុំបានហាមឃាត់ពួកគាត់មិនឱ្យចូលទៅតំបន់ក្បែរព្រំដែន ដោយរង់ចាំរដ្ឋាភិបាលបោះបង្គោលព្រំដែនរួចរាល់សិន ប៉ុន្តែនៅពេលបោះបង្គោលព្រំដែនរួច បែរជាអាជ្ញាធរមិនឱ្យទៅស្រែរបស់ខ្លួនទៅវិញ។ អ្នកស្រីអះអាងថា ក្រៅមិនឱ្យពួកគាត់ទៅធ្វើស្រែតំបន់ក្បែរព្រំដែនហើយ អាជ្ញាធរកម្ពុជាក៏បានឱ្យទាហានវៀតណាមចូលមកដេញពួកគាត់នៅក្នុងទឹកដីខ្មែរផងដែរ។
អ្នកស្រីអះអាងថា៖ «[ទាហានវៀតណាម]មកដេញប្រជាពលរដ្ឋ ខ្ញុំសួរគេថា ម៉េចមកដេញប្រជាពលរដ្ឋកម្ពុជា ទាហានវៀតណាមថា អាជ្ញាធរកម្ពុជាបញ្ជាឱ្យគេដេញ បានគេមក! ព្រោះអីគេអត់មានគ្រប់គ្រងដីហ្នឹងទៀតទេ គេបោះបង្គោលដាច់ស្រេចអស់ហើយ»។
អ្នកស្រី ហាក់ ម៉ៃហ៊រ ស្នើទៅរដ្ឋាភិបាលនិងអាជ្ញាធរឈប់ដេញនិងចេញបណ្ណសិទ្ធិដីធ្លីឱ្យពួកគាត់បានអាស្រ័យផល ដោយថា បច្ចុប្បន្នពួកគាត់ទាំង១០៦គ្រួសារគ្មានដីសម្រាប់ធ្វើស្រែចម្ការនោះទេ។
ស្នងការដ្ឋាននគរបាលខេត្តត្បូងឃ្មុំ លោក បែន រ័ត្ន សុំមិនធ្វើអត្ថាធិប្បាយ ដោយលោកឱ្យទៅសួរនាយករដ្ឋបាលសាលាខេត្តត្បូងឃ្មុំ លោក ម៉ៅ ឌុង ដែលជាអ្នកដឹកនាំក្រុមការងារធ្វើកិច្ចការងារនេះផ្ទាល់។
នាយករដ្ឋបាលសាលាខេត្តត្បូងឃ្មុំ លោក ម៉ៅ ឌុង មានប្រសាសន៍ថា លោកជាប់រវល់ប្រជុំ។
អ្នកនាំពាក្យរដ្ឋាភិបាល លោក ផៃ ស៊ីផាន បដិសេធដោយថាកម្ពុជាពង្រឹងកងកម្លាំងការពារតាមខ្សែបន្ទាត់ព្រំដែនមិនមានអាជ្ញាធរប្រទេសជិតខាងចូលមកក្នុងទឹកដីកម្ពុជាឡើយ។
លោកថា៖ «មិនមានកងទ័ពវៀតណាមចូលមកក្នុងទឹកដីកម្ពុជាទេ ព្រោះកន្លែងនោះជាខ្សែសីមាបានធ្វើរួចស្រេចហើយ អាហ្នឹងជាចំណុចសំខាន់មួយ ក៏ប៉ុន្តែប្រជាពលរដ្ឋដែលទទួលបានការណ៍នោះ គាត់ទៅធ្វើសកម្មភាពដែលជាចំណីខ្សែខណ្ឌសីមា។ ការទៅធ្វើសកម្មភាពលើដីខណ្ឌសីមាជារឿងខុសច្បាប់ ព្រោះដីនៅជាប់ខណ្ឌសីមាហ្នឹងជាការត្រួតពិនិត្យនិងការទទួលខុសត្រូវរបស់រដ្ឋ»។
កម្ពុជាមានព្រំដែនគោកជាប់ប្រទេសវៀតណាមប្រវែង១២៧០គីឡូម៉ែត្រ ហើយរដ្ឋាភិបាលប្រទេសទាំងពីរបានសម្រេចលើកិច្ចការបោះបង្គោលខណ្ឌសីមាបានចំនួន៨៤ភាគរយ ហើយនៅសល់១៦ភាគរយទៀតនឹងត្រូវធ្វើបន្តទៀតនៅពេលទទួលបានផែនទីពីប្រទេសបារាំង៕