សហភាពសហជីពកម្ពុជារបស់លោក រ៉ុង ឈុន បានស្នើទៅរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោក អ៊ិត សំហេង ឱ្យជួយអន្តរាគមន៍ទៅថៅកែរោងចក្រ វ៉ាយអូលែត ដោះស្រាយសំណងជូនកម្មករតាមផ្លូវច្បាប់ ដោយថា ថៅកែរោងចក្រនេះ ប្រកាសបិទទ្វារមិនបានដោះស្រាយសំណងត្រឹមត្រូវជូនកម្មករ។
ក្នុងលិខិតមួយនៅថ្ងៃនេះ សហភាពសហជីពកម្ពុជាបានលើកឡើងថា រោងចក្រ វ៉ាយអូលែត ស្ថិតក្នុងសង្កាត់អូរបែកក្អម ខណ្ឌសែនសុខ បានព្យួរការងារកម្មកររយៈពេល ២ខែក្នុងខែឧសភា និងខែមិថុនា ដោយកំណត់ឱ្យកម្មករចូលធ្វើការងារវិញនៅថ្ងៃទី១ ខែកក្កដា។
សហភាពសហជីពកម្ពុជា អះអាងថា ពេលដែលកម្មករត្រឡប់ចូលធ្វើការងារវិញ ថៅកែរោងចក្រ វ៉ាយអូលែត ប្រកាសបិទទ្វារអាជីវកម្មភ្លាមៗ ដោយមិនបានជូនដំណឹងមុនតាមនីតិវិធីច្បាប់ឡើយ។
លិខិតដដែលនេះ បានចាត់ទុកករណីថៅកែរោងចក្រមិនបានជូនដំណឹងមុន និងមិនទូទាត់អត្ថប្រយោជន៍ជូនកម្មករនោះ គឺជាការរំលោភច្បាប់ស្តីពីការងារ។
បើតាមលិខិតដដែលនេះ គឺក្រុមកម្មកររោងចក្រ វ៉ាយអូលែត បានទាមទារដោះស្រាយសំណងចំនួន ៥ចំណុច មានប្រាក់ជូនដំណឹងមុន ប្រាក់សំណងជំងឺចិត្ត ប្រាក់ដំណាច់ឆ្នាំ ប្រាក់អតីតភាពការងារ និងប្រាក់ខែចុងក្រោយ។
ប្រធានសហភាពសហជីពកម្ពុជា លោក រ៉ុង ឈុន មានប្រសាសន៍ថា លោកបានដាក់លិខិតនេះទៅក្រសួងការងាររួចហើយនៅព្រឹកមិញ ដោយមន្ត្រីការិយាល័យក្រសួងជាអ្នកទទួល។
លោក រ៉ុង ឈុន បន្ថែមលើលិខិតថា ថៅកែរោងចក្រ វ៉ាយអូលែត ប្រកាសបិទទ្វារភ្លាមៗដោយដោះស្រាយសំណងជូនកម្មករត្រឹមតែ ៣ចំណុចប៉ុណ្ណោះ មានប្រាក់ឈ្នួលចុងក្រោយ ប្រាក់អតីតភាពការងារ និងប្រាក់ដំណាច់ឆ្នាំ។ លោកថា ផ្តល់សំណងជូនកម្មករត្រឹមតែ ៣ចំណុច គឺមិនត្រឹមត្រូវតាមផ្លូវច្បាប់ឡើយ។
លោក រ៉ុង ឈុន ប្រាប់ថា៖ «អ៊ីចឹង ថៅកែក្រុមហ៊ុន វ៉ាយអូលែត ហ្នឹង ត្រូវទទួលការខុសត្រូវ និងគិតគូរអត្ថប្រយោជន៍ជូនកម្មករ ៥ចំណុចទៅតាមច្បាប់ស្តីពីការងារ»។
អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ ប្រាប់វីអូឌីតាមប្រព័ន្ធតេឡេក្រាមថា មន្ត្រីក្រសួងការងារបានឈរជើងដោះស្រាយវិវាទការងារនៅរោងចក្រ វ៉ាយអូលែត តាំងពីថ្ងៃផ្ទុះវិវាទ។ លោកថា មន្ត្រីក្រសួងបន្តផ្សះផ្សាវិវាទដោយផ្អែកលើគោលការណ៍ច្បាប់ មិនផ្អែកលើទម្លាប់ ឬការយល់ឃើញរបស់បុគ្គលណាមួយឡើយ។
បម្រើការងារផ្នែកកាន់ឃ្លាំងនៅរោងចក្រ វ៉ាយអូលែត រយៈពេល ១៧ឆ្នាំ កម្មការិនី អ្នកស្រី អ៊ុង ចាន់ធឿន ប្រាប់វីអូឌីថា កាលពីចុងសប្តាហ៍កន្លងមកនេះ ក្រុមកម្មករបានដាក់បណ្តឹងមួយទៅក្រសួងការងារដែរ ដើម្បីឱ្យពន្លឿនដំណោះស្រាយជូនកម្មករ។
កម្មការិនីរូបនេះ បន្តថា ក្រុមកម្មករនៅតែរក្សាជំហរទាមទារទៅថៅកែឱ្យទូទាត់អត្ថប្រយោជន៍ជូនកម្មករចំនួន ៥ចំណុចដដែល ខណៈកម្មករភាគច្រើនបម្រើការងារចន្លោះពី ១០ទៅ ១៧ឆ្នាំ និងមានវ័យចំណាស់។
អ្នកស្រី អ៊ុង ចាន់ធឿន ប្រាប់ថា៖ «ផលប៉ះពាល់ដល់កម្មករធំជាងគេគឺបំណុល។ កម្មករធ្វើការងារមួយខែសម្រាប់រស់តែមួយខែទេ។ ចុះបើរោងចក្របិទទ្វារអត់បានប្រាក់សំណងសម្រាប់កម្មករផង តើពួកគាត់រំពឹងអី ហើយកម្មករមួយចំនួនគាត់មានវ័យចាស់ គាត់រំពឹងថា នឹងមានប្រាក់សោធននិវត្ត។ តែដល់ពេលរោងចក្របិទភ្លាមៗអ៊ីចឹង គឺលុយកាក់របស់គាត់ត្រូវបាត់បង់ ហើយជីវភាពរស់នៅរបស់ពួកគាត់ត្រូវជួបការលំបាក។ ការរកការងារថ្មីក៏រកមិនបាន»។
ប្រធានរដ្ឋបាលរោងចក្រ វ៉ាយអូលែត លោក ប៊ូ សំណាង ប្រាប់ថា រោងចក្របិទទ្វារដោយសារគ្មានការបញ្ជាទិញ ខណៈមានវិបត្តិសុខភាពសកល ហើយថា ថៅកែបានអនុវត្តទៅតាមគោលការណ៍ច្បាប់ត្រឹមត្រូវក្នុងការទូទាត់សំណងដល់កម្មករ។
លោក ប៊ូ សំណាង ប្រាប់ថា៖ «អ៊ីចឹង អ្វីដែលពួកគាត់ទាមទារនោះ យើងមិនអាចឆ្លើយថា យ៉ាងម៉េចបានទេ។ សំខាន់ បច្ចុប្បន្ននេះ យើងបានធ្វើទៅតាមផ្លូវច្បាប់ដែលខាងក្រសួងគេបានចូលរួមដោះស្រាយដែរ»។
កាលពីថ្ងៃទី១ ខែកក្កដា មេសហជីពមួយ អ្នកស្រី យ៉ាង សុភ័ណ្ឌ ត្រូវបានក្រសួងការងារព្រមានចាត់វិធានការផ្លូវច្បាប់ និងរំលាយសហជីពនេះចោល បន្ទាប់ពីមេសហជីពរូបនោះត្រូវបានចោទថា បានដឹកនាំកម្មកររបស់រោងចក្រ វ៉ាយអូលែត តវ៉ាទាមទារអត្ថប្រយោជន៍ផ្សេងៗ។
រោងចក្រ វ៉ាយអូលែត អឹភែរឹល (ខេមបូឌា) ផលិតសម្លៀកបំពាក់ឱ្យក្រុមហ៊ុនបញ្ជាទិញសម្លៀកបំពាក់យីហោ ណៃគី (Nike) និងមានកម្មករសរុប ១,២៨៤នាក់៕