តុលាការកំពូលសម្រេចបង្វិលសំណុំរឿងអតីតអ្នកបកប្រែបណ្ដាញព័ត៌មានរុស្ស៊ី Russia Today (RT) លោក រ៉ាត់ រត្នមុនី ឱ្យទៅសាលាឧទ្ធរណ៍ជម្រះឡើងវិញ ដោយថា ការសម្រេចសេចក្ដីរបស់សាលាឧទ្ធរណ៍ធ្វើឡើងមិនទាន់បានត្រឹមត្រូវ។
សាលាដំបូងរាជធានីភ្នំពេញ និងសាលាឧទ្ធរណ៍ បានសម្រេចផ្ដន្ទាទោសអតីតអ្នកបកប្រែបណ្ដាញព័ត៌មានរុស្ស៊ី RT លោក រ៉ាត់ រត្នមុនី ឱ្យជាប់ពន្ធនាគារ ២ឆ្នាំ និងសងជំងឺចិត្តទៅជនរងគ្រោះ ក្រោមការចោទប្រកាន់ពីបទ«ញុះញង់ឱ្យមានការរើសអើង»ពាក់ព័ន្ធនឹងការផលិតខ្សែភាពយន្តឯកសាររឿង«ម្ដាយខ្ញុំលក់ខ្ញុំ»។ ដោយមិនសុខចិត្តនឹងសេចក្ដីសម្រេចរបស់តុលាការថ្នាក់ក្រោម លោក រ៉ាត់ រត្នមុនី បានប្ដឹងសាទុក្ខមកតុលាការកំពូល។
បន្ទាប់បើកសវនាការកាលពីថ្ងៃទី១ ខែកក្កដា ឆ្នាំ២០២០ ប្រធានក្រុមប្រឹក្សាជំនុំជម្រះនៃតុលាការកំពូល លោកស្រី គឹម សត្ថាវី នៅថ្ងៃនេះ បានសម្រេចបដិសេធការសម្រេចក្ដីរបស់សាលាឧទ្ធរណ៍ ហើយបានបង្វិលសំណុំរឿងលោក រ៉ាត់ រត្នមុនី ទៅសាលាឧទ្ធរណ៍ឱ្យជំនុំជម្រះឡើងវិញ ដោយថា ការសម្រេចសេចក្ដីកន្លងមកមិនបានត្រឹមត្រូវនោះទេ។
លោកស្រី គឹម សត្ថាវី ប្រកាសថា៖ «តុលាការកំពូល[ឱ្យ]ទៅសាលាឧទ្ធរណ៍ជំនុំជម្រះសារជាថ្មី»។
ប្រាប់អ្នកសារព័ត៌មាននៅកន្លែងរង់ចាំ មុនពេលមន្ត្រីនាំទៅពន្ធនាគារវិញ លោក រ៉ាត់ រត្នមុនី បង្ហាញក្ដឹសង្ឃឹមថា សាលាឧទ្ធរណ៍នឹងទម្លាក់ចោលការចោទប្រកាន់ និងដោះលែងលោកឱ្យមានសេរីភាពវិញ បន្ទាប់ពីតុលាការកំពូលបានបង្វិលសំណុំរឿងរបស់លោកឱ្យសាលាឧទ្ធរណ៍ជំនុំជម្រះឡើងវិញ។
លោកស្នើឱ្យសាលាឧទ្ធរណ៍ពន្លឿនបើកសវនាការជំនុំជម្រះសំណុំរឿងរបស់លោកឱ្យឆាប់។
លោក រ៉ាត់ រត្នមុនី ប្រាប់ថា៖ «បើសិនជាតុលាការកំពូលបង្វិលទៅសាលាឧទ្ធរណ៍វិញ ខ្ញុំយល់ថា រឿងក្ដីខ្ញុំតុលាការនឹងត្រូវទម្លាក់ចោលបទចោទ មានន័យថា តុលាការកំពូលមើលឃើញថា ការកាត់ក្ដីខ្ញុំនៅមានបញ្ហា អ៊ីចឹងហើយបានគាត់សុំឱ្យកាត់ឡើងវិញ។ អ៊ីចឹងខ្ញុំមានក្ដីសង្ឃឹមថា ខ្ញុំគ្មានទោស មិនបានធ្វើអ្វីខុសទេ»។
លោក រ៉ាត់ រត្នមុនី ត្រូវសមត្ថកិច្ចថៃចាប់ឃាត់ខ្លួននៅទីក្រុងបាងកកកាលពីខែធ្នូ ឆ្នាំ២០១៨។ នៅថ្ងៃទី២៦ ខែមិថុនា ឆ្នាំ២០១៩ លោកត្រូវបានសាលាដំបូងរាជធានីភ្នំពេញសម្រេចផ្តន្ទាទោសឱ្យជាប់ពន្ធនាគារ ២ឆ្នាំ ក្រោមការចោទប្រកាន់ពីបទ«ញុះញង់ឱ្យមានការរើសអើង» តាមការចោទប្រកាន់របស់ដើមបណ្តឹងចំនួន ៥នាក់ គឺលោក នាក់ សុទ្ធី នាយកសាលាឥន្ទ្រទេវី កញ្ញា គៀង ស្រីម៉េច កញ្ញា លឹម ស្រីទី អ្នកស្រី ទេព សាលីម និងអ្នកស្រី កែវ ម៉ាឡៃ ដែលសុទ្ធតែជាតួសម្ដែងនៅក្នុងខ្សែភាពយន្តឯកសាររឿង«ម្ដាយខ្ញុំលក់ខ្ញុំ»៕
