តំណាងសហគមន៍ឡពាងមួយរូប គឺអ្នកស្រី អ៊ុំ សុភី សម្រេចមិនចូលរួមក្នុងសវនាការនៅសាលាដំបូងរាជធានីភ្នំពេញនៅថ្ងៃនេះ ដោយថា បារម្ភខ្លាចមានការចាប់ខ្លួន និងមិនសង្ឃឹមទទួលបានយុត្តិធម៌ពីតុលាការ។
កាលពីថ្ងៃទី២៨ ខែមេសា ព្រះរាជអាជ្ញារងអមសាលាដំបូងរាជធានីភ្នំពេញ លោក ចែ សុង បានបង្គាប់ឱ្យតំណាងពលរដ្ឋឡពាងគឺអ្នកស្រី អ៊ុំ សុភី ចូលសវនាការនៅថ្ងៃទី១៤ ខែកក្កដានេះ ទៅតាមបណ្តឹងរបស់ក្រុមហ៊ុន ខេ.ឌី.ស៊ី របស់អ្នកស្រី ជា ខេង ដែលប្តឹងកាលពីឆ្នាំ២០០៨ ដោយថាអ្នកស្រី អ៊ុំ សុភី បានញុះញង់ប្រជាពលរដ្ឋឱ្យចូលធ្វើស្រែលើដីក្រុមហ៊ុន។
តំណាងសហគមន៍ឡពាង អ្នកស្រី អ៊ុំ សុភី ប្រាប់វីអូឌីថា អ្នកស្រីមិនបានចូលសវនាការទេនៅថ្ងៃនេះ គឺមេធាវីការពារក្តីឱ្យអ្នកស្រីចូលជំនួស។
អ្នកស្រីអះអាងថា អ្នកស្រីមិនបានប្រព្រឹត្តដូចការចោទប្រកាន់នោះឡើយ ហើយថា អ្នកស្រីបារម្ភខ្លាចមានការចាប់ខ្លួនអ្នកស្រី ដោយថា ការកាត់ក្តីរបស់តុលាការពេលកន្លងមក មិនដែលផ្តល់យុត្តិធម៌សម្រាប់ប្រជាពលរដ្ឋក្រីក្រឡើយ។
អ្នកស្រី អ៊ុំ សុភី ប្រាប់ថា៖ «ជាក់ស្តែង ខ្ញុំប្តឹងក្រុមហ៊ុនពាក់ព័ន្ធបទល្មើសព្រហ្មទណ្ឌមួយដែលបានឈូសឆាយផ្ទះពួកខ្ញុំកាលឆ្នាំ២០០៨ ប៉ុន្តែ តុលាការទម្លាក់បណ្តឹងពួកខ្ញុំចោល អត់ចាត់ការ។ ដោយសារតែខ្ញុំឃើញភាពមិនប្រក្រតីអ៊ីចឹងហើយ តុលាការអត់យុត្តិធម៌ហ្នឹងដែលខ្ញុំមិនចូល ហើយម្យ៉ាងទៀត ខ្ញុំមិនបានញុះញង់អ្នកណាដូចការចោទប្រកាន់ទេ»។
មេធាវីការពារក្តីឱ្យអ្នកស្រី អ៊ុំ សុភី គឺលោក សំ សុគង់ ដែលចូលស្តាប់សវនាការ ប្រាប់ថា តុលាការបានកោះហៅអ្នកភូមិឡពាង ៣នាក់ រួមមាន អ្នកស្រី អ៊ុំ សុភី អ្នកស្រី តូច លី និងលោក សួស ស៊ីផៃ ឱ្យចូលឆ្លើយដោះបន្ទុកការចោទប្រកាន់នៅព្រឹកថ្ងៃនេះ។ លោក សុគង់ បន្ថែមថា អ្នកស្រី តូច លី បានចូលបំភ្លឺ ប៉ុន្តែ លោក សួស ស៊ីផៃ បានស្លាប់បាត់បង់ជីវិតទៅហើយ។
មេធាវីរូបនេះឱ្យដឹងថា ក្នុងសវនាការនៅព្រឹកនេះ តុលាការបានសួរដេញដោលទៅជនជាប់ចោទម្នាក់ទៀតគឺអ្នកស្រី តូច លី និងសាក្សីដើមបណ្តឹងចំនួន ៣រូប ពាក់ព័ន្ធអង្គហេតុនៃបទចោទដែលបានកើតឡើងកាលពីឆ្នាំ២០០៨។
លោក សំ សុគង់ ប្រាប់ថា៖ «យើងឃើញភស្តុតាងមួយចំនួនទៀតគឺមិនច្បាស់លាស់ ហើយវាជាវិមតិសង្ស័យ។ បើនិយាយពីគោលការណ៍ច្បាប់ ជាពិសេសរដ្ឋធម្មនុញ្ញត្រង់មាត្រា៣៨ហ្នឹង កាលណាមានវិមតិសង្ស័យ ត្រូវបានជាប្រយោជន៍ដល់ជនជាប់ចោទ។ អ៊ីចឹងហើយ ខ្ញុំសង្ឃឹមថា តុលាការនឹងពិចារណាទម្លាក់បទចោទ ឬឱ្យកូនក្តីរបស់ខ្ញុំរួចផុតពីការចោទប្រកាន់»។
វីអូឌីបានស្វែងរកការបកស្រាយពីអ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ តាមបណ្ដាញទំនាក់ទំនងសង្គមតេឡេក្រាមនៅថ្ងៃនេះ ប៉ុន្តែ គ្មានការឆ្លើយតប។
បើតាមលោកមេធាវី សំ សុគង់ គឺតុលាការបានពន្យារពេលប្រកាសសាលក្រមដល់ថ្ងៃទី១៤ ខែសីហា ឆ្នាំ២០២០។
ជម្លោះដីធ្លីរវាងពលរដ្ឋឃុំតាជេស ស្រុកកំពង់ត្រឡាច និងក្រុមហ៊ុន ខេ.ឌី.ស៊ី របស់លោកស្រី ជា ខេង ដែលជាភរិយាលោក ស៊ុយ សែម រដ្ឋមន្ត្រីក្រសួងរ៉ែ និងថាមពល បានអូសបន្លាយរយៈពេលជាង ១០ឆ្នាំមកហើយ ហើយជម្លោះនេះបានឈានដល់ការចាប់ខ្លួនពលរដ្ឋដាក់គុក និងប្រើហិង្សាបណ្ដាលឱ្យរបួសជាច្រើននាក់។
កាលពីថ្ងៃទី១៧ ខែមិថុនា ឆ្នាំ២០១៤ ក្រុមអ្នកភូមិ និងកម្មករស៊ីឈ្នួលធ្វើរបងឱ្យក្រុមហ៊ុននេះ បានប៉ះទង្គិចគ្នាដោយចម្ពាមកៅស៊ូប្រើគ្រាប់ដែក និងដុំថ្ម បណ្ដាលឱ្យរបួសទាំងសងខាងជាង ២០នាក់។ ក្រោយមក តុលាការខេត្តកំពង់ឆ្នាំង បានចេញដីកាតាមចាប់ខ្លួនពលរដ្ឋជាច្រើននាក់ដាក់ពន្ធនាគារតាមបណ្ដឹងរបស់ភាគីកម្មករក្រុមហ៊ុន៕