សមាគមមីក្រូហិរញ្ញវត្ថុកម្ពុជា អះអាងថា ការផ្តល់ប្រាក់កម្ចីរបស់ខ្លួនឱ្យទៅអតិថិជន ជាការចូលរួមចំណែកយ៉ាងសកម្មដើម្បីកាត់បន្ថយភាពក្រីក្រ និងជំរុញកំណើនសេដ្ឋកិច្ចជាតិ ក្រោយក្រុមសង្គមស៊ីវិលចេញផ្សាយករណីសិក្សាមួយរកឃើញថា កម្មករមួយចំនួន«ធ្វើការរហូតជាប់បំណុលវ័ណ្ឌក»។
កាលពីថ្ងៃទី៣០ ខែមិថុនានេះ សម្ព័ន្ធសហជីពកម្ពុជា (CATU) មជ្ឈមណ្ឌលសម្ព័ន្ធភាពការងារនិងសិទ្ធិមនុស្ស (CENTRAL) និងអង្គការលីកាដូ បានចេញផ្សាយរបាយការណ៍ដាក់ចំណងជើងថា «ធ្វើការងាររហូតជំពាក់បំណុលវ័ណ្ឌក» ដោយធ្វើការសម្ភាសកម្មករ ១៦២នាក់ក្នុងរោងចក្រ ៣ ដែលបានព្យួរការងារទាំងស្រុង ឬដោយផ្នែក ចន្លោះពីខែមីនា ដល់ខែឧសភា ឆ្នាំ២០២០។
បើតាមរបាយការណ៍ដដែល បញ្ហានេះបង្កើតឱ្យមានវិបត្តិរំលោភសិទ្ធិមនុស្សជាច្រើនដែលនាំឱ្យកម្មករមានការលំបាកខ្លាំងក្នុងការផ្គត់ផ្គង់ជីវភាពគ្រួសារ និងធ្វើឱ្យការកាន់កាប់ដីធ្លីត្រូវរងសម្ពាធយ៉ាងខ្លាំងពីគ្រឹះស្ថានមីក្រូហិរញ្ញវត្ថុ។
សេចក្តីថ្លែងការណ៍ចុះថ្ងៃទី១៣ ខែកក្កដានេះ សមាគមមីក្រូហិរញ្ញវត្ថុកម្ពុជា ចាត់ទុកការរកឃើញរបស់ក្រុមអ្នកធ្វើការផ្នែកសិទ្ធិមនុស្ស និងសិទ្ធិកម្មករថា ខ្វះភាពត្រឹមត្រូវ មានភាពលម្អៀង ខ្វះការយល់ដឹងពីវិស័យមីក្រូហិរញ្ញវត្ថុ និងថា ការសម្ភាសកម្មករតែជាង ១០០នាក់ពីរោងចក្រចំនួន ៣ មិនឆ្លុះបញ្ចាំងពីរោងចក្ររាប់ពាន់ និងកម្មកររាប់សែននាក់នោះទេ។
សេចក្តីថ្លែងការណ៍នោះបន្ថែមទៀតថា៖ «វិស័យមីក្រូហិរញ្ញវត្ថុនៅកម្ពុជា ត្រូវបានទទួលស្គាល់ជាអន្តរជាតិថាជាគំរូដ៏ល្អមួយ និងមានភាពរឹងមាំ ដោយសារវិស័យនេះបានចូលរួមយ៉ាងសកម្មក្នុងការកាត់បន្ថយភាពក្រីក្រ បង្កើនប្រាក់ចំណូលប្រជាជន និងជំរុញកំណើនសេដ្ឋកិច្ចជាតិប្រកបដោយនិរន្តរភាព»។
ប៉ុន្តែ លិខិតច្រានចោលការកឃើញរបស់ក្រុមអង្គការសង្គមស៊ីវិលនេះ មិនបានបញ្ជាក់ថា មានកត្តាអ្វីខ្លះបានចូលរួមកាត់បន្ថយភាពក្រីក្រដល់អតិថិជនដែលប្រើប្រាស់កម្ចីទេ។
អ្នកនាំពាក្យសមាគមនេះ គឺលោក កាំង តុងងី និយាយបន្ថែមដូចនេះថា៖ «បើយើងមើលទៅលើអតិថិជនដែលគាត់ទទួលប្រាក់កម្ចីហ្នឹង គឺភាគច្រើនគាត់យកទៅប្រកបមុខរបរអាជីវកម្ម ប្រកបរបរកសិកម្ម អ្នកខ្លះយកទៅពង្រីកមុខរបរ ដែលកត្តាទាំងអស់នេះវាជួយឱ្យគាត់មានចំណូលដែលកាត់បន្ថយភាពក្រីក្ររបស់គាត់បាន»។
បើតាមលោក កាំង តុងងី បើគ្មានមីក្រូហិរញ្ញវត្ថុទេ ពលរដ្ឋនឹងត្រូវបង្ខំចិត្តខ្ចីប្រាក់ពីក្រុមហ៊ុនឯកជនទាំងអត្រាការប្រាក់ខ្ពស់ ប្រឈមនឹងការរឹបអូសទ្រព្យសម្បត្តិ។ លោកថា តាមរយៈការប្រើប្រាស់សេវាមីក្រូហិរញ្ញវត្ថុជាង ៣០ឆ្នាំមកនេះ បន្ទាត់ភាពក្រីក្ររបស់កម្ពុជាធ្លាក់ពីជាង ៤០ភាគរយ មកនៅត្រឹមជាង ១០ភាគរយ។
អ្នកជំនាញផ្នែកខាងហិរញ្ញវត្ថុ លោក ង៉ែត ជូ និយាយថា ការផ្តល់សេវាហិរញ្ញវត្ថុកន្លងទៅមានអតិថិជនមួយចំនួនធំប្រើប្រាស់ប្រាក់កម្ចីដែលបានជួយលើកកម្ពស់ជីវភាព តែថា ខ្លះទៀតក៏កំពុងប្រឈមនឹងបំណុលវ័ណ្ឌកអាស្រ័យទៅនឹងចំណេះដឹង។
បើតាមអ្នកជំនាញរូបនេះ អ្នកដែលប្រឈមនឹងបំណុលវ័ណ្ឌក គឺការប្រើប្រាស់កម្ចីដើម្បីទិញសម្ភារប្រើប្រាស់ និងខ្ចីដើម្បីចំណាយលើសេវាសុខភាព ឬព្យាបាលសមាជិកគ្រួសារ។
លោកថា៖ «បើយើងពិនិត្យមើលដើមហេតុដែលអតិថិជនខ្លះស្ថិតក្នុងបំណុលវ័ណ្ឌក ឬស្ថិតក្នុងវិបត្តិបំណុលហ្នឹង គឺថា គាត់ភាគច្រើនគាត់អត់មានចំណេះដឹងផ្នែកហិរញ្ញវត្ថុ ហើយការផ្សព្វផ្សាយចំណេះដឹងបញ្ហានេះនៅមានកម្រិតតិចមែនទែន ត្រូវមានការអប់រំជាយុទ្ធនាការថ្នាក់ជាតិឱ្យគាត់យល់»។
ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព លោក យង់ គិមអេង បង្ហាញការព្រួយបារម្ភថា ការប្រើប្រាស់សេវាហិរញ្ញវត្ថុទាំងខ្វះចំណេះដឹង រួមនឹងវិបត្តិកូវីដ១៩ កំពុងជំរុញឱ្យអ្នកប្រើប្រាស់កម្ចីកាន់តែច្រើនប្រឈមនឹងបំណុលវ័ណ្ឌក បើស្ថាប័នពាក់ព័ន្ធ រួមទាំងរដ្ឋាភិបាលមិនជួយដោះបន្ទុក។
លោកថា៖ «ប្រជាពលរដ្ឋដែលជំពាក់បំណុលគេ ជាទូទៅ កំពុងតែប្រឈមមុខនឹងខ្វះលុយសងហ្នឹងហើយ មូលហេតុដែលសំខាន់យើងឃើញហើយបច្ចុប្បន្ននេះ ពាក់ព័ន្ធទៅនឹងមុខរបររកស៊ីរបស់ពួកគាត់វាមិនអាចដំណើរការបាន ដូចជា កន្លែងការងារខ្លះត្រូវបានគេបិទ គេផ្អាកសកម្មភាពរោងចក្រសហគ្រាសមួយចំនួន និងវិស័យផ្សេងៗទៀតត្រូវបានគេបិទ ដូចនេះគ្មានមានលុយឯណាទៅសងធនាគារ»។
អង្គការសមាគម ១៣៥ មានទាំងអង្គការលីកាដូផងដែរ កាលពីថ្ងៃទី២៧ ខែមេសា ឆ្នាំ២០២០ បានចេញផ្សាយរបាយការណ៍មួយថា ពលរដ្ឋជាង ២លាន ៦សែននាក់ជាប់បំណុលគ្រឹះស្ថានមីក្រូហិរញ្ញវត្ថុដែលជាមធ្យមពួកគាត់ម្នាក់ៗជំពាក់ជិត ៤ពាន់ដុល្លារ (៣៨០៤)។
ទោះជាយ៉ាងណា សមាគមមីក្រូហិរញ្ញវត្ថុ ហៅរបាយការណ៍របស់ក្រុមអង្គការសង្គមស៊ីវិលថា បានមើលរំលងការខំប្រឹងប្រែងរបស់ខ្លួន ដែលបានជួយដល់អតិថិជនជាង ២សែននាក់ក្នុងអំឡុងកូវីដ១៩ តាមរយៈការរៀបចំប្រាក់កម្ចីឡើងវិញ ក្នុងទំហំឥណទានជាង ១ពាន់លានដុល្លារ៕
វីអូឌី សូមធ្វើការកែតម្រូវកំហុសត្រង់កថាខណ្ឌទី១៤ «អង្គការសមាគម ១៣៥ មានទាំងអង្គការលីកាដូផងដែរ កាលពីថ្ងៃទី២៧ ខែមេសា ឆ្នាំ២០២០ បានចេញផ្សាយរបាយការណ៍មួយថា ពលរដ្ឋជាប់បំណុលធនាគារជាង ២លាន ៦សែននាក់ គិតជាមធ្យមម្នាក់ជិត ៤ពាន់ដុល្លារ (៣៨០០) កំពុងរង់ចាំដំណោះស្រាយពីរដ្ឋាភិបាល» ខ្លឹមសារដែលត្រឹមត្រូវគឺ «អង្គការសមាគម ១៣៥ មានទាំងអង្គការលីកាដូផងដែរ កាលពីថ្ងៃទី២៧ ខែមេសា ឆ្នាំ២០២០ បានចេញផ្សាយរបាយការណ៍មួយថា ពលរដ្ឋជាង ២លាន ៦សែននាក់ជាប់បំណុលគ្រឹះស្ថានមីក្រូហិរញ្ញវត្ថុដែលជាមធ្យមពួកគាត់ម្នាក់ៗជំពាក់ជិត ៤ពាន់ដុល្លារ (៣៨០៤)»។