មន្ត្រីសមាគមការពារសិទ្ធិមនុស្សអាដហុក អះអាងថា សកម្មជនព្រៃឈើ ៧នាក់នៅខេត្តរតនគិរី បានរត់គេចចេញពីភូមិដោយបារម្ភពីសុវត្ថិភាព ក្រោយរងការគំរាមកំហែងពីបុគ្គលមួយចំនួន ដែលជាប់ឈ្មោះនៅក្នុងបណ្ដឹងពាក់ព័ន្ធនឹងបទល្មើសព្រៃឈើនៅក្នុងតំបន់។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា បានឱ្យដឹងថា តាមព័ត៌មានដែលលោកទទួលបាន គឺកាលពីម្សិលមិញនេះ សកម្មជនព្រៃឈើ ៧នាក់ ដែលសកម្មក្នុងការរាយការណ៍ និងបានដាក់ពាក្យបណ្ដឹងប្រឆាំងនឹងមន្ត្រីអាជ្ញាធរ និងពលរដ្ឋមួយចំនួននៅខេត្តរតនគិរីពាក់ព័ន្ធបទល្មើសព្រៃឈើទៅតុលាការនោះ បាននាំគ្នារត់គេចចេញពីភូមិទៅកន្លែងមានសុវត្ថិភាព ក្រោយពួកគេរងការគំរាមកំហែង។
លោក ស៊ឹង សែនករុណា បន្ថែមថា កាលពីថ្ងៃទី៨ ខែកក្កដា សកម្មជនព្រៃឈើម្នាក់ឈ្មោះ ឆន ផល្លា ត្រូវបានគេព្រួតគ្នាវាយនៅចំពោះមុខអាជ្ញាធរក្នុងវេទិកាសាធារណៈមួយ ក្រោយពីបុរសរូបនេះឡើងថ្លែងប្រាប់អាជ្ញាធរពីការរីករាលដាលនៃបទល្មើសព្រៃឈើនៅក្នុងខេត្តរតនគិរី។
អ្នកសិទ្ធិមនុស្សរូបនេះ ឱ្យដឹងទៀតថា ក្រៅពីលោក ឆន ផល្លា រងអំពើហិង្សា សមាជិកសកម្មជនព្រៃឈើផ្សេងទៀតក៏រងការគំរាមកំហែងដែរ ដោយសន្តិសុខភូមិបានទៅរករឿង។ លោក ស៊ឹង សែនករុណា បានចាត់ទុកករណីនេះថា ជាការប្រើអំពើហិង្សាដោយចេតនា ដែលសមត្ថកិច្ចត្រូវតែចាត់វិធានការ និងផ្តន្ទាទោសជនប្រើអំពើហិង្សានោះទៅតាមផ្លូវច្បាប់។
លោក ស៊ឹង សែនករុណា បន្ថែមថា៖ «សន្តិសុខភូមិផ្សេងៗបានទៅរករឿងឈ្មោះអ្នកដែលបានចូលរួមប្តឹងជាមួយលោក ឆន ផល្លា និងសហគមន៍ផ្សេងទៀតដែលបានប្តឹងអំពីការបំផ្លិចបំផ្លាញព្រៃឈើ កាប់រានយកដីរដ្ឋដែលជាអំពើខុសច្បាប់ទាំងអស់ហ្នឹង ត្រូវបានគេគំរាមកំហែងពួកគាត់រហូតដល់ពួកគាត់អត់ហ៊ាននៅផ្ទះ។ គាត់បានរត់គេចខ្លួនចេញពីផ្ទះទៅរកកន្លែងសុវត្ថិភាពជាដើមហ្នឹង។ អ៊ីចឹង វាជារូបភាពមួយដ៏អាក្រក់ណាស់។ អាជ្ញាធរត្រូវតែធ្វើការស្រាវជ្រាវឱ្យបានច្បាស់នៅក្នុងរឿងហ្នឹង ហើយចាត់វិធានការ និងដាក់ទោសទៅតាមច្បាប់ប្រទេសយើង»។
អ្នកនាំពាក្យសមាគមការពារសិទ្ធិមនុស្សអាដហុករូបនេះ បានឱ្យដឹងទៀតថា សកម្មជនព្រៃឈើលោក ឆន ផល្លា និងសមាជិកក្រុមគ្រួសារ បានប្តូរកន្លែងព្យាបាលពីមន្ទីរពេទ្យបង្អែកខេត្តមកសម្រាកព្យាបាលនៅមន្ទីរពេទ្យស្ថិតនៅរាជធានីភ្នំពេញ ដោយសារបារម្ភពីសុវត្ថិភាពរបស់ពួកគេ។
លោក ខាំ នីន ដែលជាសមាជិកសហគមន៍ម្នាក់មកពីភូមិសាមុត្រក្រោម គឺស្ថិតនៅក្នុងចំណោមសកម្មជនព្រៃឈើទាំង ៧នាក់នោះ បានប្រាប់ថា ពួកគាត់បានសម្រេចចាកចេញពីភូមិមួយរយៈដោយសារបារម្ភពីសុវត្ថិភាព ក្រោយពីសន្តិសុខភូមិ ១០នាក់ បានចុះឃ្លាំមើលរូបគាត់ និងតាមរករូបលោកដល់ផ្ទះជាច្រើនដងដោយមិនបានប្រាប់មូលហេតុ។ ប៉ុន្តែ លោកបដិសេធផ្ដល់ព័ត៌មានលម្អិតអំពីទីតាំងជាក់លាក់ដែលលោក និងសកម្មជនព្រៃឈើដទៃទៀត កំពុងស្នាក់នៅ។
លោក ខាំ នីន ប្រាប់ថា៖ «ខ្ញុំអត់ដឹងថា គេមករកខ្ញុំទេ គម្រោងខ្ញុំតិចទៀតខ្ញុំទៅផ្ទះហើយ ប៉ុន្តែ កូនខ្ញុំតេប្រាប់ថា ប៉ាអើយពួកសន្តិសុខភូមិគេមករកប៉ាឯង។ អ៊ីចឹងហើយខ្ញុំបារម្ភសុវត្ថិភាព ព្រោះក្រុមអាជ្ញាធរគេចង់ធ្វើបាប។ ខ្ញុំមិនដឹងថា គម្រោងគេចង់ធ្វើយ៉ាងម៉េចចំពោះខ្ញុំទេ»។
មេភូមិសាមុត្រក្រោម លោក ខំា ផសាវ៉ាត សុំមិនធ្វើអធិប្បាយលើរឿងនេះទេ ដោយប្រាប់ថា លោកកំពុងមានទុក្ខ ព្រោះកូនស្រីរបស់លោកបាត់បង់ជីវិត។
ស្នងការនគរបាលខេត្តរតនគិរី លោក យិន ចំណាន បានច្រានចោលនូវការអះអាងថា មានគេប្រើអំពើហិង្សាលើលោក ឆន ផល្លា និងឡោមព័ទ្ធផ្ទះរបស់គាត់ពីសំណាក់ក្រុមអ្នកភូមិ និងកងកម្លាំងនគរបាល។ លោកថា ព័ត៌មាននេះមិនពិត និងគ្មានការប្រើអំពើហិង្សា ឬគំរាមកំហែងណាមួយទៅលើលោក ឆន ផល្លា ដូចការលើកឡើងឡើយ ហើយថា សមត្ថកិច្ចក៏គ្មានវិធានការអ្វីដែរ។
លោក យិន សំណាង បន្ថែមថា៖ «គ្មានពីណាទៅវាយដំច្រំធាក់គាត់ទេ។ គាត់ចេះតែប្រាប់អ្នកសារព័ត៌មានអញ្ចេះអញ្ចុះថា មានការប្រើអំពើហិង្សាទៅលើគាត់ រឿងហ្នឹងមិនពិតទេ។ គ្មានរឿងអីចឹងកើតឡើងទៅលើ ឆន ផល្លា ហ្នឹងទេ»។
ក្នុងលិខិតវិញ្ញាបនបត្រសុខភាពរបស់មន្ទីរពេទ្យបង្អែកខេត្តរតនគិរី លោកវេជ្ជបណ្ឌិត ហ៊ួត ចិន្តា បានឱ្យដឹងថា លោក ឆន ផល្លា បានទៅសម្រាកព្យាបាលនៅមន្ទីរពេទ្យបង្អែកខេត្តកាលពីថ្ងៃទី៨ ខែកក្កដា។ វេជ្ជបណ្ឌិតរូបនេះ អះអាងក្នុងលិខិតពិនិត្យសុខភាពនោះថា ក្រោយពិនិត្យលើលោក ឆន ផល្លា រួច គឺគ្មានរបួសស្លាកស្នាមអ្វីនោះទេ ប៉ុន្តែ មានជំងឺប្រចាំកាយដូចជាជំងឺលើសឈាម និងជំងឺទឹកនោមផ្អែម។
កាលពីម្សិលមិញនេះ ស្នងការនគរបាលខេត្តរតនគិរី ក៏បានចេញលិខិតបំភ្លឺមួយផងដែរ ដោយបានបដិសេធចំពោះការចុះផ្សាយរបស់សារព័ត៌មានវីអូឌីខ្មែរ ដែលចុះផ្សាយថា លោក ឆន ផល្លា ត្រូវគេវាយចំពោះមុខសមត្ថកិច្ចក្នុងកម្មវិធីវេទិកាសាធារណៈមួយនៅខេត្តរតនគិរី។
នគរបាលខេត្តរតនគិរីលើកឡើងថា អ្នកយកព័ត៌មានរបស់វីអូឌី ប្រមូលព័ត៌មានមិនគ្រប់ជ្រុងជ្រោយ និងយកព័ត៌មានតែមួយជ្រុង គ្មានមូលដ្ឋាន និងភស្តុតាងច្បាស់លាស់។
ទោះជាយ៉ាងណា ថ្ងៃកើតហេតុនោះ វីអូឌីបានសុំការបញ្ជាក់ពីអភិបាលស្រុកលំផាត់ លោក នូ ថេរ ដែរ ប៉ុន្តែ លោកសុំមិនធ្វើអត្ថាធិប្បាយទេ ដោយតម្រូវឱ្យចុះដល់កន្លែងកើតហេតុផ្ទាល់។
ចំណែកមេភូមិសាមុត្រក្រោម លោក ខំា ផសាវ៉ាត ដែលចូលរួមវេទិកានោះដែរ បានអះអាងថា ពលរដ្ឋ ៤ភូមិនៅតំបន់នោះមិនពេញចិត្តទង្វើរបស់លោក ឆន ផល្លា នោះទេ ដោយថា បុរសនោះបានប្តឹងគេគ្រប់គ្នា។
មេភូមិរូបនេះ អះអាងទៀតថា វេទិកាសេរីនេះ អាជ្ញាធរមិនបានអញ្ជើញលោក ឆន ផល្លា មកចូលរួមទេ តែលោកថា លោក ឆន ផល្លា បានមកចូលរួមដោយខ្លួនឯង ហើយឡើងនិយាយខុសប្រធានបទ រិះគន់រឿងបទល្មើសព្រៃឈើ និងយកទូរសព្ទថតមុខអភិបាលស្រុក មេប៉ុស្តិ៍ ក្នុងវេទិកា ធ្វើឱ្យអ្នកភូមិផ្ទុះកំហឹង។
បើលិខិតបំភ្លឺរបស់ស្នងការនគរបាលខេត្តរតនគិរី ករណីគេប្រើអំពើហិង្សាលើលោក ឆន ផល្លា និងការគំរាមកំហែងលើសកម្មជនព្រៃឈើផ្សេងទៀតនេះ មានការអន្តរាគមន៍ពីការិយាល័យឧត្តមស្នងការអង្គការសហប្រជាជាតិទទួលបន្ទុកការងារសិទ្ធិមនុស្សនៅកម្ពុជាផងដែរ៕