មន្ត្រីសិទ្ធិមនុស្សប្រចាំខេត្តរតនគិរី លោក ឌិន ខន្នី បញ្ជាក់ជាថ្មីថា សកម្មជនព្រៃឈើម្នាក់ បានរងរបួសធ្លាយបោះវៀន បន្ទាប់ពីបានចាក់ខ្លួនឯង ដោយអះអាងថា ក្រោយរងសម្ពាធ។
កាលពីម្សិលមិញ មន្ត្រីរូបនេះបានប្រាប់ VOD ថា ជនជាតិដើមទំពូនលោក កែវ ហ្វើញ បានរងរបួសធ្លាយពោះនៅឯចម្ការ លោកសង្ស័យថា ជាករណីមនុស្សឃាត ដោយថា ហេតុការនេះ វាបានកើតឡើងក្រោយពីសកម្មជនម្នាក់ទៀតឈ្មោះ ឆន ផល្លា ត្រូវបានគេវាយមុខអាជ្ញាធរក្នុងវេទិកាសាធារណៈមួយមុននេះមួយថ្ងៃ។
លោក ឌិន ខន្នី ប្រាប់ថា៖ «នៅពេលដែលខ្ញុំឱ្យជំនួយការខ្ញុំទៅជួបបុរសឈ្មោះ កែវ ហ្វើញ ដែលជាជនជាតិទំពួនដែលយើងសង្ស័យថាជាអំពើឃាតកម្មនោះ ឥឡូវយើងបានព័ត៌មានពិតហើយពីសាមីខ្លួនរបស់គាត់។ គាត់បានបញ្ចាក់ថា គាត់ពិតជាបានវះពោះខ្លួនឯងមែន ដោយសារតែគាត់ទទួលរងសម្ពាធ ហើយយើងក៏មិនបានដឹងដែរថា សម្ពាធនោះដោយសារតែអ្នកណា ហើយមកពីរឿងអ្វីទេ»។
មន្ត្រីសម្របសម្រួលសមាគមអាដហុកប្រចាំខេត្តរតនគិរី លោក ឌិន ខន្នី និយាយទៀតថា លោក កែវ ហ្វើញ អាយុ ៥០ឆ្នាំ ជាសកម្មជនការពារព្រៃឈើរស់នៅក្នុងភូមិសមុត្រក្រោម ឃុំសេដា ស្រុកលំផាត់។ លោកថា សកម្មជនព្រៃឈើរូបនេះ ធ្លាប់ប្តឹងអ្នកភូមិ និងអាជ្ញាធរពាក់ព័ន្ធមួយចំនួនក្នុងស្រុកនេះ ទៅតុលាការពាក់ព័ន្ធនឹងបទល្មើសព្រៃឈើនៅតំបន់នោះ៕
