ប្រជាពលរដ្ឋជាង ១០០នាក់មកពីស្រុករលាប្អៀរ ខេត្តកំពង់ឆ្នាំង អះអាងថា ពួកគេបារម្ភខ្លាចបាត់បង់ដីជាង ៨០០ហិកតា ដែលបានអាស្រ័យផលយូរឆ្នាំហើយ បើរដ្ឋាភិបាលមិនជួយអន្តរាគមន៍ទាន់ពេលទេនោះ។
ប្រជាពលរដ្ឋជាង ១០០នាក់ តំណាងឱ្យអ្នកភូមិជាង ៣០០គ្រួសារនៅភូមិប៉ាតឡាង ឃុំក្រាំងលាវ បាននាំគ្នាឡើងមកដាក់ញត្តិនៅក្រសួងរៀបចំដែនដី នគរូបនីយកម្ម និងសំណង់ នៅថ្ងៃនេះ ហើយស្នើឱ្យជួយដោះស្រាយបញ្ហាដីធ្លី ដែលពួកគេអះអាងថា ត្រូវកងទ័ពអាកាសប្រចាំការនៅតំបន់ព្រលានយន្តហោះធ្វើរបងព័ទ្ធផ្ទះ និងដីស្រែដោយមិនដោះស្រាយសំណងឱ្យពួកគេ។
បន្ទាប់ពីដាក់ញតិនៅក្រសួងរៀបចំដែនដីហើយ ពលរដ្ឋម្នាក់មកពីភូមិប៉ាតឡាង លោក អ៊ិន ស៊ីវ៉ាន ប្រាប់វីអូឌីថា ដីស្រែ និងដីភូមិទំហំជាង ៨០០ហិកតា ដែលស្ថិតនៅជាប់នឹងទីតាំងព្រលានយន្តហោះសម័យខ្មែរក្រហមនោះ បានរស់នៅលើ កាន់កាប់ និងអាស្រ័យផលតាំងពីឆ្នាំ១៩៨១។
អ្នកភូមិរូបនេះ អាះអាងថា មេបញ្ជាការកងទ័ពជើងអាកាសខេត្តកំពង់ឆ្នាំង លោក កែវ វណ្ណដេត បានធ្វើរបងហ៊ុំព័ទ្ធដីស្រែ និងដីភូមិរបស់ពួកគាត់ដោយមិនដោះស្រាយសំណងឱ្យពួកគាត់នោះទេ។
លោកបន្តថា កងព័ទអាកាសបានធ្វើរបងព័ទ្ធផ្ទះនឹងដីស្រែរបស់ប្រជាពលរដ្ឋកាលពីខែមេសា ឆ្នាំ២០១៩ ដោយមិនបានបង្ហាញផែនការ ឬគម្រោងឱ្យប្រជាពលរដ្ឋបានដឹងនោះឡើយ។
លោក អ៊ិន ស៊ីវ៉ាន ស្នើរដ្ឋាភិបាលជួយអន្តរាគមន៍ចំពោះរឿងនេះ បើមិនបានដូច្នេះទេ លោកថា បាត់បង់ដីផ្ទះ និងដីស្រែរបស់ពួកគាត់ ដោយសារ បច្ចុប្បន្ន អាជ្ញាធរខេត្តកំពង់ឆ្នាំងមិនបានធ្វើប្លង់កម្មសិទ្ធិឱ្យនោះទេ បើទោះបីជាពួកគាត់រស់នៅ និងអាស្រ័យលើជាច្រើនឆ្នាំក៏ដោយ។
លោក អ៊ិន ស៊ីវ៉ាន ប្រាប់ថា៖ «ប្រជាពលរដ្ឋក្នុងភូមិគាត់ចង់បានប្លង់កម្មសិទ្ធិដីធ្លី ព្រោះប្រជាពលរដ្ឋទូទាំងប្រទេសគេមានអស់ហើយ។ អ៊ីចឹងគាត់មានទុកកង្វក់កាលពីគេធ្វើរបងហើយជាដីរបស់គេហើយ អ៊ីចឹងប្រជាពលរដ្ឋដីដែលខ្លួនកាន់កាប់ទៅជាដីរបស់គេអស់ហើយ។ អ៊ីចឹងគាត់អត់មានអីទេ បាតដៃទទេហើយ ព្រោះគាត់អត់មានដំណោះស្រាយអីឱ្យផង។ ការសង់ក៏អត់មានប្រាប់អីប្រជាពលរដ្ឋជាសាធារណផង អត់មានបង្ហាញប្លង់គោល ឬខាងរដ្ឋាភិបាលប្រាប់អីក៏អត់»។
ពលរដ្ឋម្នាក់ទៀតលោក ផន សាយ លើកឡើថា អ្នកភូមិបានរស់នៅនិងអាស្រ័យផលលើដីនេះរយៈពេល៤០ ឆ្នាំមកហើយ។ លោកស្នើទៅរដ្ឋាភិបាលឱ្យជួយអន្តរាគមន៍ ដោយថា រាល់ថ្ងៃពួកគាត់ខ្លាចបាត់បង់ដីធ្លីរស់នៅ និងអាស្រ័យផល ខណៈដែលកន្លងមករឿងនេះធ្លាប់កើតឡើងចំពោះអ្នកភូមិនៅជាប់នោះរួចហើយ។
លោក ផន សាយ ប្រាប់ថា៖ «បារម្ភខ្លាច់បាត់ដី ព្រោះក្នុងនាមខ្ញុំជាប្រជាពលរដ្ឋម្នាក់រស់នៅពឹងផ្អែកទាំងស្រុង លើផ្នែកកសិកម្ម និងលំនៅឋាន បើយើងអត់ផ្ទះ អត់ដីតើឱ្យខ្ញុំទៅនៅណា ទៅរកស៊ីអី យើងរាល់ថ្ងៃមុខបបរចិញ្ចឹមខ្លួន ចិញ្ចឹមគ្រួសារ ពឹងផ្អែកធ្វើស្រែហ្នឹងហើយ»។
លោក ផន សាយ បន្តថា កន្លងមក ពួកគាត់បានរកកិច្ចអន្តរាគមន៍ពីអាជ្ញាធរខេត្តឱ្យជួយដោះស្រាយដែរ ប៉ុន្តែ អាជ្ញាធរមិនមានដំណោះស្រាយ ទើបពួកគាត់នាំគ្នាឡើងមករាជធានីភ្នំពេញ ដើម្បីសុំឱ្យរដ្ឋមន្ត្រី ក្រសួងរៀបចំដែនដី នគរូបនីយកម្ម និងសំណង់ជួយអន្តរាគមន៍ ដោយចេញប្លង់សិទ្ធិដីធ្លីដល់ពួកគាត់។
វីអូឌីមិនអាសុំការអត្ថាធិប្បាយពីរដ្ឋមន្ត្រីក្រសួងរៀបចំដែនដី បានទេ ដោយទូរសព្ទចូលគ្មានអ្នកទទួល ក្រោយពីអ្នកនាំពាក្យក្រសួងរៀបចំដែនដី លោក សេង ឡូត សុំមិនធ្វើអត្ថាធិប្បាយ ដោយលោកថា ជាប់រវល់ប្រជុំ។
វីអូឌីមិនអាសុំការអត្ថាធិប្បាយពីអភិបាលរងខេត្តកំពង់ឆ្នាំង លោក ស៊ុន សុវណ្ណារិទ្ធ បានទេ ដោយទូរសព្ទចូលគ្មានអ្នកទទួល។
មន្ត្រីសម្របសម្រួលសមាគមន៍អាដហុកប្រចាំខេត្តកំពង់ឆ្នាំង លោក សំ ចាន់គា ជំរុញឱ្យអាជ្ញាធរ និងស្ថាប័នពាក់ព័ន្ធដោះស្រាយបញ្ហាវិវាទដីធ្លីជូនប្រជាពលរដ្ឋ ដើម្បីកុំឱ្យប្រជាពលរដ្ឋឡើងមកតវ៉ាម្ដងហើយម្ដងទៀត។
លោក សំ ចាន់គា ប្រាប់ថា៖ «រដ្ឋាភិបាល ជាពិសេសអាជ្ញាធរ គួរតែប្រកាសប្រាប់ អំពីតំបន់ដែលត្រូវអភិវឌ្ឍន៍ ឬតំបន់ដែលត្រូវដកហូតយកទៅធ្វើជាសម្បត្តិសាធារណៈ ។ គួរតែពិនិត្យមើលរកដំណោះស្រាយតាមរដ្ឋធម្មនុញ្ញក៏ដូចជាច្បាប់ភូមិ។ យើងមិនគួរធ្វើស្ងាត់ៗ ធ្វើឱ្យមានការច្របូកច្របល់ យើងគួរតែប្រកាសជាផ្លូវការទៅ ហើយអ្នកដែលពាក់ព័ន្ធត្រូវបា្រប់អ្វីដែលរដ្ឋាភិបាលចង់បាននោះ»។
លោក អ៊ិន ស៊ីវ៉ាន អះអាងថា ក្រោយពីតវ៉ាប្រហែល ១ម៉ោង មន្ត្រីក្រសួងដែនដីបានចេញមកទទួលញត្តិពីពួកគាត់ ប៉ុន្តែ មិនបានសន្យាថា នឹងដោះស្រាយពេលណានោះទេ។ លោក អ៊ិន ស៊ីវ៉ាន អះអាងថា កងទ័ពអាកាសប្រចាំការនៅតំបន់ព្រលានយន្តហោះខេត្តកំពង់ឆ្នាំង បានសាងសង់របងព័ទ្ធប៉ះពាល់ផ្ទះប្រជាពលរដ្ឋជាង ១៥០គ្រួសារ និងពលរដ្ឋ ២០០គ្រួសារទៀត ប៉ះពាល់ដីស្រែ៕