លោកនាយករដ្ឋមន្ត្រី ហ៊ុន សែន អំពាវនាវនៅថ្ងៃនេះទៅពលរដ្ឋឱ្យចូលរួមការពារព្រៃឈើ និងដាំកូនឈើឡើងវិញ ជាអ្វីដែលលោកថា ដើម្បីជាប្រយោជន៍សហគមន៍ ប្រព័ន្ធជីវៈចម្រុះជាសម្បត្តិរបស់មនុស្សជាតិគ្រប់ជំនាន់។
លោក ហ៊ុន សែន អំពាវនាវបែបនេះនៅលើហ្វេសប៊ុករបស់លោកនៅថ្ងៃនេះ ចំថ្ងៃដែលកម្ពុជាប្រារព្ធបុណ្យ«រុក្ខទិវា» ដែលត្រូវបានផ្ដួចផ្ដើមឱ្យមានការប្រារព្ធពិធីបុណ្យនេះចាប់តាំងពីឆ្នាំ១៩៥២មក ក្រោមព្រះរាជកិច្ចដឹកនាំរបស់ព្រះបរមរតនកោដ ព្រះមហាវីរក្សត្រ សម្តេចព្រះ នរោត្តម សីហនុ ក្នុងគោលបំណងបំផុសចលនាដាំដើមឈើឡើងវិញ។
ទំព័រហ្វេសប៊ុកលោក ហ៊ុន សែន សរសេរថា៖ «សូមបងប្អូនប្រជាពលរដ្ឋខ្មែរទូទាំងចូលរួមស្រឡាញ់ថែរក្សាការពារព្រៃឈើ និងចូលរួមដាំដុះកូនឈើ ថែរក្សាការពារបរិស្ថានធម្មជាតិឱ្យបានគង់វង្សនៅគ្រប់ទីកន្លែង ដើម្បីជាប្រយោជន៍ដល់ការរស់នៅរបស់ខ្លួនយើងផង សហគមន៍យើងផង និងជីវិតសត្វព្រៃគ្រប់ប្រភេទផង ព្រមទាំងប្រព័ន្ធជីវៈចម្រុះជាច្រើនផងដែរ ដែលជាសម្បត្តិរបស់មនុស្សជាតិនៅគ្រប់ជំនាន់»។
របាយការណ៍ស្រាវជ្រាវរបស់សាកលវិទ្យាល័យអន្តរជាតិមួយ ដែលបានសិក្សារួមគ្នាជាមួយដៃគូពាក់ព័ន្ធផ្សេងទៀត ចេញផ្សាយកាលពីថ្ងៃទី២៤ ខែមិថុនាឆ្នាំនេះ បង្ហាញថា គម្របព្រៃឈើនៅតំបន់ការពារព្រៃឡង់របស់កម្ពុជា បានរងការបំផ្លិចបំផ្លាញកាន់តែធំជាងមុនទៀត។
របាយការណ៍ចំហជាលើកទីពីររបស់សាកលវិទ្យាល័យ ខូប៉ែនហាក (Copenhagen) របស់ប្រទេសដាណឺម៉ាក ឱ្យដឹងដែរថា ទំហំការបាត់បង់ព្រៃឈើនៅកម្ពុជាកើនឡើងយ៉ាងឆាប់រហ័ស ជាពិសេសនៅដែនជម្រកសត្វព្រៃព្រៃឡង់ ក្នុងឆ្នាំ២០១៩ រហូតធ្វើឱ្យកម្ពុជាក្លាយជាប្រទេសស្ថិតនៅលំដាប់ទី១០ ក្នុងនាមជាប្រទេសបាត់បង់គម្របព្រៃឈើច្រើនជាងគេបំផុតនៅលើពិភពលោក។
របាយការណ៍ចំហរៀបរាប់ថា៖ «កំណើននៃការបាត់បង់ព្រៃឈើនៅក្នុងដែនជម្រកសត្វព្រៃព្រៃឡង់ បានកើតឡើងព្រមគ្នាជាមួយក្រសួងបរិស្ថានដែលបានហាមឃាត់សហគមន៍មូលដ្ឋានមិនឱ្យចុះល្បាតព្រៃ និងធ្វើរបាយការណ៍អំពីបទល្មើសព្រៃឈើ»។
របាយការណ៍របស់សាកលវិទ្យាល័យ ម៉ារីលែន បង្ហាញថា កម្ពុជាបានបាត់បង់ព្រៃឈើដល់ទៅ ៦៣,០០០ហិកតានៅក្នុងឆ្នាំ២០១៩កន្លងមក ហើយបាត់បង់គម្របព្រៃឈើដល់ទៅ ២៦ភាគរយ ឬទំហំ ២.៣លានហិកតាគិតចាប់តាំងពីឆ្នាំ២០០០មក៕
