សហភាពសហជីពកម្ពុជា ស្នើឱ្យរាជរដ្ឋាភិបាលពន្លឿនកិច្ចអន្តរាគមន៍ចំពោះសាច់ប្រាក់ឧបត្ថម្ភចំនួន៤០ដុល្លារ ជូនកម្មករ-កម្មការិនី និយោជិតឱ្យបានទាន់ពេលវេលា។
ក្នុងលិខិតចុះថ្ងៃទី០៩ ខែកក្កដា ឆ្នាំ២០២០នេះ សហភាពសហជីពកម្ពុជា ហៅកាត់ថា (CCU) បានស្នើសុំដល់លោកនាយករដ្ឋមន្ត្រី ហ៊ុន សែន ឱ្យជួយអន្តរាគមន៍ និងពន្លឿនការឧបត្ថម្ភសាច់ប្រាក់ជូនកម្មករ-កម្មការិនី និយោជិតឱ្យទាន់ពេល ក្រោយពីពួកគាត់រងគ្រោះពីការព្យួរការងារ និងរោងចក្រមួយចំនួនប្រកាសបិទទ្វារ។
ក្នុងលិខិតនោះសរសេរថា៖ «ក្នុងកំឡុងពេលមានការឆ្លងរាតត្បាតមេរោគកូវីដ១៩ ធ្វើឱ្យរោងចក្រមួយចំនួនព្យួរ និងបិទ នាំឱ្យបងប្អូនកម្មករនិយោជិតបាត់បង់ការងារ និងប្រាក់ចំណូលដែលពួកគាត់សង្ឃឹមលើប្រាក់ឧបត្ថម្ភពីរាជរដ្ឋាភិបាល គ្រាន់បានសម្រាលបន្ទុក ប៉ុន្ដែ ការបើកជូនកម្មករនិយោជិតមានការយឺតយ៉ាវ ដែលធ្វើឱ្យពួកគាត់ជួបការលំបាកចំពោះជីវភាពរស់នៅ ថ្លៃផ្ទះ ឬថ្លៃបន្ទប់ និងបំណុលជាដើម»។
កាលពីព្រឹកថ្ងៃទី០៧ ខែមេសាកន្លងទៅ លោកនាយករដ្ឋមន្រ្តី ហ៊ុន សែន បានថ្លែងថា កម្មករ-កម្មការិនី នឹងទទួលបានប្រាក់ឧបត្ថម្ភប្រចាំខែអំឡុងពេលរោងចក្រព្យួរការងារ ចំនួនទឹកប្រាក់ ៧០ដុល្លារអាមេរិក ដោយក្នុងនោះ រដ្ឋនឹងចេញ ៤០ដុល្លារ ខណៈដែលថៅកែរោងចក្រនឹងចេញ ៣០ដុល្លារ។
ក្នុងបទសម្ភាសន៍ជាមួយអ្នកយកព័ត៌មានVOD កាលពីថ្ងៃទី២ ខែកក្កដា ប្រធាននាយកដ្ឋានអធិការកិច្ចការងារ លោក អ៊ុក ចាន់ធូ មានប្រសាសន៍ថា ការបើកប្រាក់ឧបត្ថម្ភរបស់រដ្ឋគឺធ្វើឡើងតាមធនាគារឯកជន ដែលក្នុងមួយខែត្រូវបើកចំនួន២ដង ខណៈលោកថា រហូតមកដល់ពេលនេះមិនមានបញ្ហាអ្វីកើតឡើងនោះទេចំពោះការបើកប្រាក់នេះ។
លោកថា៖ «យើងបានធ្វើការយ៉ាងច្បាស់លាស់ដល់បងប្អូនកម្មករនិយោជិត គឺក្រសួងការងារចេញលិខិតអនុញ្ញាតព្យួរ មានចំនួនកម្មករនិយោជិតត្រឹមត្រូវ មានឈ្មោះ មានលេខទូរស័ព្ទច្បាស់លាស់ មានអត្ដសញ្ញាណបណ្ណសញ្ញាតិខ្មែរត្រឹមត្រូវដាក់ឱ្យក្រសួងការងារ។ ក្រសួងការងារនឹងផ្ដល់ទៅក្រសួងសេដ្ឋកិច្ច និងហិរញ្ញវត្ថុ ហើយក្រសួងសេដ្ឋកិច្ចនឹងផ្ដល់ទៅធនាគារឯកទេសវីង ធនាគារឯកទេសវីងគេឃើញតារាងឈ្មោះរបស់កម្មករនិយោជិតដែលបានព្យួរកិច្ចសន្យាការងារនេះ ធនាគារនឹងទម្លាក់លុយទៅឱ្យបងប្អូនកម្មករនិយោជិតតាមប្រព័ន្ធសារទូរស័ព្ទ»។
បើតាមលោក អ៊ុក ចាន់ធូ គិតត្រឹមដើមខែកក្កដា មានរោងចក្រសហគ្រាសចំនួន ៤៥៨រោងចក្រដែលបានព្យួរការងារបុគ្គលិក ដែលបានប៉ះពាល់ដល់កម្មករនិយោជិតជាង ១៦ម៉ឺននាក់៕