ពលរដ្ឋអះអាងថា សកម្មជនការពារព្រៃឈើម្នាក់នៅខេត្តរតនគិរី ត្រូវបានគេព្រួតគ្នាវាយនៅចំពោះមុខអាជ្ញាធរក្នុងវេទិកាសាធារណៈមួយ ក្រោយពីបុរសរូបនោះឡើងថ្លែងប្រាប់អាជ្ញាធរពីការរីករាលដាលនៃបទល្មើសព្រៃឈើនៅក្នុងតំបន់នោះ។
បុរសជនជាតិដើមភាគតិចម្នាក់សុំមិនបញ្ចេញឈ្មោះ ដោយបារម្ភពីសុវត្ថិភាពផ្ទាល់ខ្លួន ប្រាប់ VOD នៅព្រឹកមិញនេះថា លោក ឆន ផល្លា ដែលធ្លាប់ប្តឹង និងរាយការណ៍ពីបទល្មើសព្រៃឈើ ត្រូវបានគេព្រួតគ្នាវាយឱ្យរងរបួសក្នុងវេទិកាសាធារណៈមួយ ដែលត្រូវបានរៀបចំឡើងនៅសាលាឃុំសេដាដោយអាជ្ញាធរស្រុកលំផាត់ ខេត្តរតនគិរី។
បុរសសុំមិនបញ្ចេញអត្តសញ្ញាណប្រាប់ថា៖ «គេវាយគាត់ធ្ងន់ធ្ងរហើយ ប្រជាពលរដ្ឋវាយ[…] មូលហេតុមកពីគាត់ប្តឹងគេ។ គេវាយគាត់នៅក្នុងប្រជុំ។ ប្រជុំវេទិកាសេរី»។
បុរសរូបនេះអះអាងទៀតថា ពេលនេះ លោក ឆន ផល្លា កំពុងសម្ងំក្នុងផ្ទះដែលឡោមព័ទ្ធដោយក្រុមអ្នកភូមិ និងកងកម្លាំងនគរបាល។
វីអូឌីបានទាក់ទងទៅលោក ឆន ផល្លា ដោយផ្ទាល់តាមរយៈលេខទូរស័ព្ទរបស់លោក ប៉ុន្តែ គ្មាននរណាទទួលនោះឡើយ។
ក្នុងសារជាសំឡេងដែលផ្ដល់ដោយសមាគមការពារសិទ្ធិមនុស្សអាដហុកប្រចាំខេត្តរតនគិរី លោក ឆន ផល្លា ដែលរស់នៅភូមិសាមុត្រក្រោម ឃុំសេដា និយាយដែរថា ពេលអ្នកភូមិផ្សេងទៀតព្រួតគ្នាវាយលោក លោកបានរត់ទៅឱ្យមេប៉ុស្តិ៍ និងអភិបាលស្រុកដែលមានវត្តមាននៅទីនោះជួយដែរ តែលោកថា ពួកគេហាក់ធ្វើមិនដឹងមិនឮ។
លោក ឆន ផល្លា និយាយថា៖ «គេវាយខ្ញុំនៅមុខប៉ូលិស ខ្ញុំរត់ទៅឱ្យប៉ូលិសជួយ ហើយនៅតែឱ្យពួកហ្នឹងវាយទៀត ឱ្យខ្ញុំទុកចិត្តពួកគាត់[សមត្ថកិច្ច]យ៉ាងម៉េច? ខ្ញុំសំណូមពរខាងសិទ្ធិមនុស្សឱ្យជួយខ្ញុំយកចេញពីផ្ទះផង»។
អភិបាលស្រុកលំផាត់ លោក នូ ថេ សុំមិនធ្វើអត្ថាធិប្បាយទេ ដោយតម្រូវឱ្យចុះដល់កន្លែងកើតហេតុផ្ទាល់។ ប៉ុន្តែ មេភូមិសាមុត្រក្រោម លោក ខំា ផសាវ៉ាត ដែលចូលរួមវេទិកានោះដែរ បានអះអាងថា ពលរដ្ឋ ៤ភូមិនៅតំបន់នោះមិនពេញចិត្តទង្វើរបស់លោក ឆន ផល្លា នោះទេ ដោយថា បុរសនោះបានប្តឹងគេគ្រប់គ្នា។
មេភូមិរូបនេះ អះអាងទៀតថា វេទិកាសេរីនេះ អាជ្ញាធរមិនបានអញ្ជើញលោក ឆន ផល្លា មកចូលរួមទេ តែលោកថា លោក ឆន ផល្លា បានមកចូលរួមដោយខ្លួនឯង ហើយឡើងនិយាយខុសប្រធានបទ រិះគន់រឿងបទល្មើសព្រៃឈើ និងយកទូរសព្ទថតមុខអភិបាលស្រុក មេប៉ុស្តិ៍ ក្នុងវេទិកាធ្វើឱ្យអ្នកភូមិផ្ទុះកំហឹង។
លោក ខាំ ផសាវ៉ាត ប្រាប់ថា៖ «គាត់ហ្នឹងឃុំស្រុកអីក៏ប្តឹងហ្មង បរិស្ថានស្រុក បរិស្ថានខេត្តអីក៏គេប្តឹងដែរ ប្តឹងទាំងអស់ហ្មងម្នាក់ហ្នឹង លើសគេលើសឯង។ ម្នាក់ហ្នឹងមកពីកំពង់ចាម។ គេលែងត្រូវការហើយមនុស្សហ្នឹង ឱ្យអភិបាលស្រុកយកទៅណាយកទៅ»។
ស្នងការរងនគរបាលខេត្តរតនគិរី លោក អឹម ផានី បានប្រាប់ថា លោកមិនទាន់ទទួលបានព័ត៌មានអំពីករណីប្រើអំពើហិង្សាទៅលើលោក ឆន ផល្លា ទេ។
មន្ត្រីសម្របសម្រួលសមាគមការពារសិទ្ធិមនុស្សអាដហុកប្រចាំខេត្តរតនគិរី លោក ឌិន ខន្នី និយាយថា លោក ឆន ផល្លា ជាសកម្មជនការពារព្រៃសហគមន៍ និងព្រៃដែនជម្រកអភិរក្សនៅតំបន់នោះចាប់ពីឆ្នាំ២០១៧មក។
មន្ត្រីការពារសិទ្ធិមនុស្សរូបនេះ អះអាងថា តាមរយៈសកម្មភាពនេះ លោក ឆន ផល្លា បានប្ដឹងទាំងជនល្មើសព្រៃឈើ ប្រជាសហគមន៍ និងអាជ្ញាធរពាក់ព័ន្ធ ទៅតុលាការចំនួន ៧បណ្តឹង។ លោក ខន្នី បន្ថែមថា បច្ចុប្បន្ន បណ្តឹងខ្លះរបស់លោក ឆន ផល្លា នៅសាលាដំបូង និងខ្លះទៀតឡើងដល់សាលាឧទ្ធរណ៍ហើយ។
លោក ឌិន ខន្នី ប្រាប់ថា៖ «ខ្ញុំសោកស្តាយករណីដែលអាជ្ញាធរមានទាំងស្រុក មានទាំងឃុំ មានទាំងភូមិ ឱ្យគេវាយប្រជាពលរដ្ឋដែលជាអ្នកស្របច្បាប់បាន មានន័យថា វាជាគំរូដ៏អាក្រក់មួយនៅក្នុងសង្គម»។
អ្នកការពារសិទ្ធិមនុស្សរូបនេះ ជំរុញឱ្យអាជ្ញាធរថ្នាក់ជាតិចាត់វិធានការករណីនេះ ដើម្បីធានាថា សកម្មជនការពារព្រៃឈើមិនត្រូវបានគេរើសអើង បណ្តេញចេញពីភូមិ ឬព្រួតគ្នាវាយឱ្យរងរបួសចំពោះមុខអាជ្ញាធរមានសមត្ថកិច្ចបែបនេះទេ។
យ៉ាងនេះក្តី រដ្ឋមន្ត្រីក្រសួងមហាផ្ទៃ លោក ស ខេង ក្នុងពិធីមួយនៅក្រសួងមហាផ្ទៃកាលពីម្សិលមិញ បាននិយាយថា អ្នកធំៗបាននាំគ្នាសម្រុកទៅចាប់ដីនៅខេត្តមណ្ឌលគិរី។
លោកនាយករដ្ឋមន្ត្រី ហ៊ុន សែន ក្រោយកិច្ចប្រជុំគណៈរដ្ឋមន្ត្រីកាលពីថ្ងៃសុក្រសប្ដាហ៍មុន បានចេញសេចក្តីសម្រេចមួយប្រាប់ទៅអង្គភាពប្រឆាំងអំពើពុករលួយថា ដល់ពេលវះកាត់មន្ត្រីឃុបឃិតគ្នារំលោភយកដីពលរដ្ឋ និងដីរដ្ឋខុសច្បាប់ហើយ។
ប៉ុន្តែ អ្នកឃ្លាំមើលសិទ្ធិមនុស្ស លោក ឌិន ខន្នី អះអាងថា វាជាគំរូអាក្រក់មួយដល់សង្គម បើរដ្ឋាភិបាលមិនអាចចាត់វិធានការលើមន្ត្រីខិលខូចឃុបឃិតគ្នាទន្ទ្រានយកដីរដ្ឋរួចពីសំណាញ់ច្បាប់ ហើយមិនអន្តរាគមន៍ជួយសកម្មជនការពារព្រៃឈើនោះ៕