ក្រុមកម្មកររោងចក្រកាត់ដេរ ហាណា វ័ន (HANA) ស្ថិតក្នុងខណ្ឌពោធិ៍សែនជ័យ រាជធានីភ្នំពេញ បាននាំគ្នាដើរហែក្បួនតវ៉ាដោយថ្មើរជើងជាថ្មីទៀត ទៅកាន់ខុទ្ទកាល័យរបស់លោកនាយករដ្ឋមន្ត្រី ហ៊ុន សែន នៅព្រឹកថ្ងៃនេះ ដើម្បីស្វែងរកអន្តរាគមន៍ជុំវិញវិវាទការងាររបស់ពួកគេ ប៉ុន្តែ ត្រូវបានសមត្ថកិច្ចរារាំងជាថ្មី។
កម្មករ-កម្មការិនីប្រហែល ១០០នាក់របស់រោងចក្រ ហាណា វ័ន បាននាំគ្នាដើរហែក្បួនតវ៉ារបស់ពួកគេជាលើកទី២ ចេញពីរោងចក្រ ស្ថិតក្នុងភូមិត្រពាំងក្រសាំង សង្កាត់ត្រពាំងក្រសាំង បម្រុងទៅរកកិច្ចអន្តរាគមន៏ពីលោក ហ៊ុន សែន ឱ្យជួយដោះស្រាយវិវាទការងារ ខណៈវិវាទនោះអូសបន្លាយរយៈពេលកន្លះខែមកហើយដោយពុំមានដំណោះស្រាយ ប៉ុន្តែ ត្រូវបានអាជ្ញាធរខណ្ឌពោធិ៍សែនជ័យ រារាំងនៅលើកំណាត់ផ្លូវជាតិលេខ៤ ត្រង់ចំណុចមុខសាលាសង្កាត់ចោមចៅទី៣។
កម្មករផ្នែកវេចខ្ចប់ លោក លុន សុភ័ក្រ ដែលអះអាងថា បម្រើការងារនៅរោងចក្រ ហាណា ២ឆ្នាំកន្លះ ប្រាប់វីអូឌីថា ក្រុមកម្មករសម្រេចទៅរកកិច្ចអន្តរាគមន៍ពីលោកនាយករដ្ឋមន្ត្រី ហ៊ុន សែន ជួយដោះស្រាយវិវាទការងារ ក្រោយពីកម្មករអស់ជំនឿលើការដោះស្រាយរបស់ក្រុមមន្ត្រីក្រសួងការងារ។
លោក លន់ សុភ័ក្រ ប្រាប់ថា៖ «ពួកខ្ញុំរង់ចាំការចុះដោះស្រាយរបស់ក្រសួងការងារតាំងពីថ្ងៃចន្ទអាទិត្យមុនរហូតមកថ្ងៃចន្ទអាទិត្យនេះ អត់ឃើញគាត់ចុះមកទេ។ ដូច្នេះហើយពួកខ្ញុំសម្រេចនាំគ្នាហែក្បួនជាលើកទី២ គោលដៅគឺទៅផ្ទះឪពុកម្តាយ គឺសម្តេច ហ៊ុន សែន ឱ្យគាត់មកជួយដោះស្រាយដល់ពួកខ្ញុំផង ព្រោះមន្ត្រីក្រសួងការងារមិនបានគោរពពាក្យសន្យារបស់គាត់ទេ»។
អភិបាលរងខណ្ឌពោធិ៍សែនជ័យ លោក ប៉ាង លីដា ដែលដឹកនាំកម្លាំងសន្តិសុខចម្រុះចុះទៅសម្របសម្រួលការដើរហែក្បួនរបស់កម្មករនេះ មានប្រសាសន៍ថា អាជ្ញាធរពោធិ៍សែនជ័យមិនមែនរារាំងកម្មករមិនឱ្យទៅខុទ្ទកាល័យលោកនាយករដ្ឋមន្ត្រីនោះទេ គឺអាជ្ញាធរចង់ឱ្យកម្មករទៅខុទ្ទកាល័យតាមមធ្យោបាយធ្វើដំណើរផ្សេង ដើម្បីកុំឱ្យមានការកកស្ទះចរាចរណ៍ និងប៉ះពាល់សណ្តាប់ធ្នាប់សាធារណៈប៉ុណ្ណោះ។
លោក ប៉ាង លីដា ប្រាប់ថា៖ «មិនមែនរារាំងមិនឱ្យពួកគាត់ទៅនោះទេ។ យើងចង់ឱ្យគាត់ជិះឡាន យើងមានឡានឱ្យគាត់ជិះទៀត តែគាត់មិនព្រម»។
ក្រោយពីអាជ្ញាធររារាំងជាង ៣ម៉ោង គឺក្រុមកម្មករសម្រេចត្រឡប់ទៅរោងចក្រវិញ បន្ទាប់មន្ត្រីក្រសួងការងារ លោក វង្ស សុវណ្ណ ចុះទៅសម្របសម្រួល និងសន្យាកោះហៅតំណាងក្រុមហ៊ុនទៅចរចារកដំណោះស្រាយនៅរោងចក្រថ្ងៃស្អែកម៉ោង ៩ព្រឹក។
កម្មករអះអាងថា ថៅកែរោងចក្រ ហាណា វ័ន បានប្រកាសបិទទ្វាររោងចក្រភ្លាមៗកាលពីថ្ងៃទី២២ ខែមិថុនា ដោយមិនបានជូនដំណឹងមុន ដែលបណ្តាលឱ្យក្រុមកម្មករផ្ទុះការតវ៉ាទាមទារការដោះស្រាយសំណងតាមផ្លូវច្បាប់។
ក្រោយកម្មករផ្ទុះការតវ៉ានៅថ្ងៃទី២៣ ខែមិថុនា មន្ត្រីក្រសួងការងារបានចុះសម្របសម្រួលដោះស្រាយ។ ក្នុងកំណត់ហេតុចុះដោះស្រាយកាលថ្ងៃទី២៣ ខែមិថុនា គឺថៅកែរោងចក្របានសន្យា និងព្រមព្រៀងដោះស្រាយសំណងជូនកម្មករ ៥ចំណុចតាមផ្លូវច្បាប់ ប៉ុន្តែ កម្មករអះអាងថា ពេលបើកលុយ គឺពួកគេទទួលបានការទូទាត់ត្រឹមតែ ៣ចំណុចប៉ុណ្ណោះ មានប្រាក់ឈ្នួលចុងក្រោយ ប្រាក់អតីតភាពការងារ និងប្រាក់ដំណាច់ឆ្នាំដែលនៅសល់។ ចំណែកប្រាក់សំណងជំងឺចិត្ត និងប្រាក់ជូនដំណឹងមុន មិនត្រូវបានថៅកែផ្តល់ជូនកម្មករឡើយ។
អគ្គលេខាធិការរងគណៈកម្មការដោះស្រាយកូដកម្មបាតុកម្មគ្រប់មុខសញ្ញា នៃក្រសួងការងារលោក វង្ស សុវណ្ណ មានប្រសាសន៍ថា បញ្ហាសុខភាពសកលដោយសារជំងឺកូដ១៩ បានធ្វើឱ្យថៅកែរោងចក្រជួបវិបត្តិសេដ្ឋកិច្ច។ លោកថា វិបត្តិសុខភាពសកលនេះ ត្រូវបានចាត់ទុកជាប្រធានសក្តិ ដែលថៅកែរួចផុតពីការទូទាត់ប្រាក់សំណងជំងឺចិត្ត និងប្រាក់ជូនដំណឹងមុន។
លោក វង្ស សុវណ្ណ បន្ថែមថា៖ «នាយកដ្ឋានអធិការកិច្ចបានបញ្ជាក់ហើយ ការផ្តល់ជូន៣ចំណុចនេះ គឺដោយសារតែកាលៈទេសៈប្រទេសយើង វិបត្តិជំងឺកូវីដជាសកលដែរ។អីចឹងបានជាងយើងដោះស្រាយទៅតាមគោលការណ៍ដែលចេញបញ្ជាក់ដោយនាយកដ្ឋានអធិការកិច្ច»។
ប៉ុន្តែ លោក វង្ស សុវណ្ណ អះអាងថា លោកនឹងខិតខំជជែកជាមួយថៅកែ ដើម្បីសុំសំណងបន្ថែមជូនទៅដល់ក្រុមកម្មករដែលកំពុងតវ៉ាទាមទារនេះ។
អ្នកគ្រប់គ្រងទូទៅនៅរោងចក្រ ហាណា អ្នកស្រី ទី សុធីតា មានប្រសាសន៍ថា រោងចក្រសម្រេចបិទទ្វារដោយសារគ្មានការបញ្ជាទិញ ហើយថៅកែជួបវិបត្តិសេដ្ឋកិច្ច ខណៈជំងឺកូវីដ១៩ រីករាលដាលជាសកល។
អ្នកគ្រប់គ្រងទូទៅរូបនេះ បញ្ជាក់ថា អ្វីដែលភាគីរោងចក្រដោះស្រាយជូនកម្មករនោះ គឺត្រឹមត្រូវតាមច្បាប់ដែលក្រសួងការងារបានកំណត់។ អ្នកស្រី ទី សុធីតា ប្រសិនបើក្រសួងការងារមើលឃើញការដោះស្រាយខ្វះចន្លោះតាមផ្លូវច្បាប់ណា គឺក្រុមហ៊ុននឹងដោះស្រាយបន្ថែម។
អ្នកស្រី ទី សុធីតា ប្រាប់ថា៖ «ខាងក្រុមហ៊ុនអត់គោលការណ៍ដោះស្រាយក្រៅផ្លូវច្បាប់ទេ។ សំខាន់បើខាងក្រសួងការងារថា ខាងក្រុមហ៊ុនដោះស្រាយនៅខ្វះចន្លោះកន្លែងណា ឬក៏គិតឱ្យកម្មករអត់គ្រប់ត្រង់ណាទៀត គឺខាងក្រុមហ៊ុននឹងបង់ ឬបន្ថែមតាមហ្នឹងទៀត»។
បើតាមអ្នកស្រី ទី សុធីតា រោងចក្រ ហាណា ជារោងចក្រផលិតម៉ាស់ និងសម្លៀកបំពាក់ មានថៅកែជាជនជាតិកូរ៉េខាងត្បូង មានកម្មករសរុប ៦៦៩នាក់៕