លោកនាយករដ្ឋមន្ត្រី ហ៊ុន សែន ប្រាប់មន្ត្រីថា ដល់ពេលវះកាត់ជនខិលខូចឃុបឃិតគ្នារំលោភយកដីរដ្ឋ និងដីពលរដ្ឋហើយ ខណៈតុលាការកំពុងសាកសួរឧកញ៉ាម្នាក់ និងមន្ត្រីពាក់ព័ន្ធក្នុងជម្លោះដីធ្លីមួយកន្លែងនៅស្រុកគាស់ក្រឡ ខេត្តបាត់ដំបង។
តាមរយៈសេចក្តីសម្រេចមួយចុះនៅថ្ងៃសុក្រសប្ដាហ៍មុន លោក ហ៊ុន សែន ថ្លែងថា ករណីទំនាស់ដីធ្លីនៅស្រុកគាស់ក្រឡ ក្រសួងស្ថាប័នពាក់ព័ន្ធខេត្តនេះ ត្រូវដកហូតត្រឡប់មកវិញនូវដីដែលបុគ្គលឈ្មោះ សង ថន បានទន្ទ្រានរំលោភយកដោយខុសច្បាប់។
មេដឹកនាំរូបនេះ បញ្ជាក់ថា អាជ្ញាធរខេត្តបាត់ដំបងត្រូវរក្សាទុកដីនោះធ្វើជាការបែងចែកទៅប្រជាពលរដ្ឋក្នុងគោលដៅសម្បទានសង្គមកិច្ច។
លោកនាយករដ្ឋមន្ត្រី ហ៊ុន សែន ក្រើនរំឭកដែរថា អង្គភាពប្រឆាំងអំពើពុករលួយត្រូវធ្វើការងារនេះបន្តទៀត ដោយអះអាងថា ដំណាក់កាលនេះជាពេលដែលត្រូវធ្វើការវះកាត់ជនខិលខូចទាំងឡាយណាដែលឃុបឃិតគ្នាយកដីរដ្ឋ និងដីរបស់ប្រជាពលរដ្ឋ។
លោក ហ៊ុន សែន ថា៖ «គឺត្រូវផ្តន្ទាទោស ហើយនឹងឈានដល់ការដកហូតមុខតំណែង និងត្រូវបណ្តេញចេញពីគណបក្សប្រជាជនកម្ពុជាតែម្តង។ ចំពោះបណ្ណកម្មសិទ្ធិដីធ្លីទាំងឡាយណាដែលចេញពីអំពើទុច្ចរិត គឺត្រូវធ្វើមោឃភាពចោល»។
កាលពីថ្ងៃទី២៧ ខែមិថុនា មួយសប្តាហ៍មុននេះ អង្គភាពប្រឆាំងអំពើពុករលួយបាននាំខ្លួនឧកញ៉ា សង ថន មកសាកសួរពាក់ព័ន្ធជម្លោះដីធ្លីនៅស្រុកគាស់ក្រឡ ខេត្តបាត់ដំបង។
នៅថ្ងៃដដែលនោះ លោកនាយករដ្ឋមន្ត្រី ហ៊ុន សែន បានចេញអនុក្រឹត្យបញ្ចប់មុខតំណែងអភិបាលស្រុកគាស់ក្រឡ លោក ម៉ៅ សុចាន់ ផងដែរ។
នៅថ្ងៃទី១ ខែកក្កដា អង្គភាពប្រឆាំងអំពើពុករលួយ បានកោះហៅអភិបាលរងខេត្តទទួលបន្ទុកដោះស្រាយវិវាទដីធ្លី គឺលោក ស៊ូ អារ៉ាហ្វាត់ មកសាកសួរដូចគ្នា។
ព្រះរាជអាជ្ញារង និងជាអ្នកនាំពាក្យសាលាដំបូងរាជធានីភ្នំពេញ លោក គុជ គឹមឡុង ឱ្យដឹងតាមបណ្តាញសង្គមតេឡេក្រាមនៅថ្ងៃចន្ទនេះថា តុលាការកំពុងបន្តនីតិវិធីសាកសួរឧកញ៉ា សង ថន និងលោក ស៊ូ អារ៉ាហ្វាត់។
លោក គុជ គឹមឡុង ប្រាប់ថា៖ «សូមបញ្ជាក់ជូនបង ការងារហ្នឹងលោកព្រះរាជអាជ្ញារងកំពុងតែសាកសួរនៅឡើយ ហើយនៅពេលដែលសាកសួរចប់ និងសម្រេចយ៉ាងណា ខ្ញុំនឹងប្រាប់នៅពេលក្រោយ»។
វីអូឌីមិនអាចទាក់ទងអភិបាលខេត្តបាត់ដំបង លោក ងួន រតនៈ បានទេ ដោយទូរសព្ទរបស់លោកគ្មានអ្នកទទួល។
មន្ត្រីសម្របសម្រួលសមាគមអាដហុកការពារសិទ្ធិមនុស្សប្រចាំខេត្តបាត់ដំបង លោក យិន ម៉េងលី ហៅចំណាត់ការរបស់រដ្ឋាភិបាលនេះថា នឹងធ្វើឱ្យពលរដ្ឋមានឱកាសស្តារជីវភាពឡើងវិញ ក្រោយពីជម្លោះដីធ្លីបានអូសបន្លាយចាប់តាំងពីឆ្នាំ២០១៥មកម្ល៉េះ។
លោក យិន ម៉េងលី ផ្តល់ជាយោបល់ថា អាជ្ញាធរគួរចាត់វិធានការនេះតាំងពីយូរមក មិនគួររង់ចំាំនាយករដ្ឋមន្ត្រីស្រែកទើបនាំគ្នាធ្វើនោះទេ ដែលលោកថា ទម្លាប់បែបនេះនឹងបង្កឱ្យពលរដ្ឋដែល រងការរំលោភបំពាននៅកន្លែងផ្សេងទៀតបន្តរងគ្រោះ បើគ្មានការលូកដៃពីរដ្ឋាភិបាលនោះ។
លោក យិន ម៉េងលី ប្រាប់ថា៖ «អាជ្ញាធរនៅមូលដ្ឋាននេះជាអ្នករស់នៅជាមួយពលរដ្ឋ យើងនាំគ្នាចាត់ចែងតាមនីតិវិធីទៅ កុំចំាតែសម្តេចស្រែក ចុះបើសម្តេចអត់ស្រែក អាជ្ញាធរថ្នាក់ក្រោមជាតិនាំគ្នាដេកលក់អស់ទៅ»។
បើតាមលោក យិន ម៉េងលី ឧកញ៉ា សង ថន មានដីនៅស្រុកគាស់ក្រឡ ៥ពាន់ហិកតា ដីជិត ១ពាន់ហិកតាដែលកំពុងមានជម្លោះជាមួយពលរដ្ឋ ២២២គ្រួសារ។
តំណាងអ្នកមានជម្លោះដីធ្លីនៅឃុំតាជេស ឃុំតាជេស ស្រុកកំពង់ត្រឡាច ខេត្តកំពង់ឆ្នាំង អ្នកស្រី អ៊ុំ សុភី និយាយថា ជម្លោះដីធ្លីរបស់ពួកគេជាង ១៤ឆ្នាំមកហើយជាមួយក្រុមហ៊ុន KDC របស់លោកស្រី ជា ខេង ភរិយារដ្ឋមន្ត្រីក្រសួងរ៉ែ និងថាមពល លោក ស៊ុយ សែម។
អ្នកស្រី អ៊ុំ សុភី និយាយទៀតថា ក្រុមហ៊ុន KDC បានឃុបឃិតជាមួយអាជ្ញាធរធ្វើរបងព័ទ្ធយកដីអ្នកភូមិទំហំ ៥១២ហិកតា ខណៈទិញត្រឹមតែ ១៩៥ហិកតា ដែលអ្នកស្រីថា ធ្វើឱ្យប៉ះពាល់អ្នកភូមិ ១០៨គ្រួសារ។
អ្នកស្រី អ៊ុំ សុភី ប្រាប់ថា៖ «សុំឱ្យរដ្ឋាភិបាលចាត់ការមន្ត្រីរបស់គាត់ផង លោកជំទាវ ស៊ុយ សែម ហ្នឹងមករំលោភដីពួកខ្ញុំយូរឆ្នាំហើយ គាត់អត់មានតាំងចិត្តដោះស្រាយឱ្យពួកខ្ញុំទេ អូសបន្លាយទុកឱ្យពួកខ្ញុំធ្លាក់ខ្លួនក្រីក្រ អត់ព្រមកាត់ដីឱ្យពួកខ្ញុំទេ ហើយពួកខ្ញុំជាប្រជាពលរដ្ឋត្រូវការដី ដីជាអាយុជីវិតរបស់ពួកខ្ញុំ»។
សិទ្ធិកាន់កាប់ដីធ្លីជាផ្នែកមួយដែលសហភាពអឺរ៉ុបដាក់លក្ខខណ្ឌពាក់ព័ន្ធទៅនឹងប្រព័ន្ធអនុគ្រោះពន្ធ EBA «អ្វីៗគ្រប់យ៉ាងលើកលែងតែអាវុធ»របស់ខ្លួន។
អង្គការតម្លាភាពអន្តរជាតិកាលពីថ្ងៃទី២៣ ខែមករាដើមឆ្នាំនេះ បានចេញផ្សាយរបាយការណ៍មួយបង្ហាញថា កម្ពុជាស្ថិតនៅក្នុងចំណាត់ថ្នាក់ពុករលួយជាងគេនៅតំបន់អាស៊ាន។
របាយការណ៍បានសិក្សាលើ ១៨០ប្រទេសលើពិភពលោក ក្នុងចំណោម១៨០នោះ កម្ពុជាទទួលបានពិន្ទុ ២០ក្នុងចំណោម ១០០ពិន្ទុ ដែល ១០០ពិន្ទុ ជាប្រទេសគ្មានអំពើពុករលួយ៕
