ក្រសួងមហាផ្ទៃសម្រេចផ្ទេរសមត្ថកិច្ចឱ្យមេប៉ុស្តិ៍ក្នុងការផ្ដល់សៀវភៅស្នាក់នៅ និងសៀវភៅគ្រួសារ ដើម្បីបង្កលក្ខណៈងាយស្រួល និងឆាប់រហ័សលើការចុះបញ្ជីស្នាក់នៅ និងបញ្ជីគ្រួសារ ជូនប្រជាជនដែលមានលំនៅឋានក្នុងប្រទេសកម្ពុជា។
ក្នុងសេចក្តីប្រកាសរបស់ក្រសួងមហាផ្ទៃចុះផ្សាយ កាលពីថ្ងៃទី១ ខែកក្កដា ឆ្នាំ២០២០នេះថា កាលពីកន្លងមក សមត្ថកិច្ចពីអធិការនគរបាលក្រុង ស្រុក ខណ្ឌ ជាអ្នកផ្តល់សៀវភៅស្នាក់នៅ និងសៀវភៅគ្រួសារ ជូនប្រជាជនដែលមានលំនៅដ្ឋានក្នុងប្រទេសកម្ពុជា។
ប៉ុន្តែនៅដើមខែកក្កដាឆ្នាំនេះ រដ្ឋមន្ត្រីក្រសួងមហាផ្ទៃ លោក ស ខេង បានសម្រេចផ្ទេរការងារនេះ ជូនទៅនាយប៉ុស្តិ៍នគរបាលរដ្ឋបាលឃុំ សង្កាត់ ជាអ្នកពិនិត្យ សម្រេចផ្តល់សៀវភៅស្នាក់នៅ ទុតិយតាសៀវភៅស្នាក់នៅ ការប្រែប្រួលនៃមាជិកគ្រួសារ ការផ្លាស់ប្តូរទីលំនៅ និងរាល់ការកែតម្រូវទិន្នន័យក្នុងបញ្ជីស្នាក់នៅស្របតាមច្បាប់កំណត់។
ម្យ៉ាងទៀត ការផ្ទេរសមត្ថកិច្ចពីស្នងការនគរបាលរាជធានី ខេត្ត ជូនទៅអធិការនគរបាលក្រុង ស្រុក ខណ្ឌ ជាអ្នកពិនិត្យ សម្រេចផ្តល់សៀវភៅស្នាក់នៅ ទុតិយតាសៀវភៅស្នាក់នៅ ការប្រែប្រួលនៃមាជិកគ្រួសារ ការផ្លាស់ប្តូរទីលំនៅ និងរាល់ការកែតម្រូវទិន្នន័យក្នុងបញ្ជីស្នាក់នៅស្របតាមច្បាប់កំណត់ផងដែរ។
ចំណែក ការចុះបញ្ជីសៀវភៅស្នាក់នៅ ចុះបញ្ជីសៀវភៅគ្រួសារ ការលុប ឬបំពេញបន្ថែមសមាជិក ការកែតម្រូវទិន្នន័យក្នុងបញ្ជីស្នាក់នៅ បញ្ជីសៀវភៅគ្រួសារ ការផ្តល់ទុតិយតា ការផ្លាស់ប្តូរទីលំនៅ និងការចុះបញ្ជីស្នាក់នៅបណ្តោះអាសន្ន ត្រូវធ្វើតាមការណែនាំរបស់អគ្គនាយកដ្ឋានអត្តសញ្ញាណកម្ម។
សេចក្តីប្រកាសដដែលបញ្ជាក់ថា សៀវភៅស្នាក់នៅ និងសៀវភៅគ្រួសារ ដែលបានផ្តល់ជូនប្រជាជនកន្លងមក នៅតែមានតម្លៃផ្លូវច្បាប់ រហូតមានការផ្លាស់ប្តូរថ្មី។ លើកលែងតែមានបទបញ្ញត្តិថ្មីជំនួស និងផ្ទុយពីសេចក្តីប្រកាសនេះ៕