លោកនាយករដ្ឋមន្ត្រី ហ៊ុន សែន បានបញ្ជាទៅមន្ត្រីពាក់ព័ន្ធឱ្យកាត់ឆ្វៀលដីចេញពីតំបន់ការពារ ដើម្បីបែងចែកទៅឱ្យប្រជាពលរដ្ឋដែលរស់នៅ និងអាស្រ័យផលយូរឆ្នាំ។
ចុះផ្សាយលើទំព័រហ្វេសប៊ុករបស់នាយករដ្ឋមន្ត្រីនៅថ្ងៃទី៣ ខែកក្កដានេះ បានឱ្យដឹងថា ក្នុងសម័យប្រជុំគណៈរដ្ឋមន្រ្តីពេញអង្គនាព្រឹកនេះ លោក ហ៊ុន សែន បានបញ្ជាផ្ទាល់ទៅរដ្ឋមន្រ្តីក្រសួងបរិស្ថាន ក្រសួងកសិកម្ម និងក្រសួងរៀបចំដែនដី ឱ្យកាត់ឆ្វៀលដីឱ្យពលរដ្ឋដោយកាត់ចេញពីដីដែលជាគម្របព្រៃឈើ ឬជាតំបន់ការពារ ឬតំបន់អភិរក្សសត្វព្រៃរបស់រដ្ឋ។
លោកនាយករដ្ឋមន្ត្រី ហ៊ុន សែន បានបញ្ជាក់ថា ការកាត់ឆ្វៀលដីចេញពីតំបន់ការពារ ដើម្បីចែកទៅពលរដ្ឋធ្វើកម្មសិទ្ធិនោះ គឺអនុវត្តសម្រាប់តែពលរដ្ឋដែលបានទៅរស់នៅ និងបង្កបង្កើនផលលើដីតំបន់ការពារនោះពី ១០ ទៅ ២០ឆ្នាំប៉ុណ្ណោះ ជាពិសេសពលរដ្ឋនៅខេត្តកោះកុង និងខេត្តព្រះវិហារជាដើម។
សំណេរលើទំព័រហ្វេសប៊ុករៀបរាប់ថា៖ «ព្រោះកន្លងមក រដ្ឋមានតែដីក្នុងផែនទីទេ តាមពិតមានបងប្អូនប្រជាពលរដ្ឋបានកសាងលំនៅដ្ឋានរស់នៅបង្កើតកូនចៅរាប់សិបឆ្នាំមកហើយនៅលើទីតាំងដីទាំងនោះ។ នេះជាការដោះស្រាយកង្វល់ជូនពលរដ្ឋពិតប្រាកដ។ កុំទុកប្រជាពលរដ្ឋឱ្យភ័យខ្លាច អត់ឃ្លាន រត់ទៅចំណាកស្រុកគេតទៅទៀត»។
លោក ហ៊ុន សែន ក៏បញ្ជាទៅមន្ត្រីពាក់ព័ន្ធធ្វើការងារនេះឱ្យបានហ្មត់ចត់ និងត្រឹមត្រូវបំផុត រួមទាំងជំរុញឱ្យមន្ត្រីពន្លឿនចេញប័ណ្ណកម្មសិទ្ធិជូនពលរដ្ឋឱ្យបានឆាប់ផងដែរ។
បើទោះបីជាលោកនាយករដ្ឋមន្ត្រីបញ្ជាទៅមន្ត្រីក្រោមឱវាទឱ្យកាត់ឆ្វៀលដីចេញពីតំបន់ការពារ ដើម្បីចែកពលរដ្ឋក៏ដោយ លោកក៏ស្នើទៅពលរដ្ឋកុំពង្រីក ឬរំលោភយកដីនៅតំបន់ការពារបន្ថែមទៀតដែរ។
អ្នកនាំពាក្យក្រសួងបរិស្ថាន លោក នេត្រ ភក្ត្រា សុំមិនធ្វើអធិប្បាយលើអ្វីដែលលោកនាយករដ្ឋមន្ត្រី ហ៊ុន សែន រៀបរាប់លើហ្វេសប៊ុកនោះឡើយ។
ពលរដ្ឋ ៣នាក់បងប្អូននៅស្រុកស្រែអំបិល ខេត្តកោះកុង បានជាប់បណ្តឹងនៅតុលាការ ខណៈឪពុករបស់ពួកគេឈ្មោះ ចេត ប៊ុន អាយុ ៦៥ឆ្នាំ ជាប់ពន្ធនាគារជិត ១ឆ្នាំ ទៅតាមបណ្តឹងរបស់មន្ទីរបរិស្ថាន និងអង្គការសម្ព័ន្ធមិត្តសត្វព្រៃ (Wildlife Alliance Cambodia) ក្រោមការចោទថា បានកាប់រុករាន និងឈូសឆាយចូលដីព្រៃតំបន់ការពារធម្មជាតិទំហំ ០.៣៥ហិកតាមកធ្វើជាកម្មសិទ្ធិ ស្ថិតក្នុងភូមិតាធង ឃុំដងពែង។
កូនលោក ចេត ប៊ុន គឺ ប៊ុន ឆាន និយាយថា គ្រួសាររបស់លោករងភាពអយុត្តិធម៌យ៉ាងខ្លាំង ខណៈដែលរូបលោក និងប្អូនស្រីពីរនាក់ បានជាប់បណ្តឹងនៅតុលាការ ហើយឪពុកកំពុងឃុំខ្លួនក្នុងពន្ធនាគារ ដោយសារតែចូលកាប់ឆ្ការព្រៃក្នុងភូមិ ដែលលោកថា បានចូលកាន់កាប់ និងទទួលស្គាល់ដោយអាជ្ញាធរមូលដ្ឋានពីឆ្នាំ១៩៩៤។
លោក ប៊ុន ឆាន បានទាមទារទៅតុលាការទម្លាក់ចោល និងដោះលែងឪពុកមានសេរីភាពវិញ ហើយអាជ្ញាធរផ្តល់ដីជូនគ្រួសារលោកវិញ។
លោកបន្ថែមថា៖ «ដីរបស់ឪពុកខ្ញុំសោះ ហើយអាជ្ញាធរមូលដ្ឋានគេបានវាស់វែងឱ្យហើយ និងត្រៀមចេញជាប្លង់ហើយ បែរជាចាប់គាត់ឃុំបែបនេះ វាអយុត្តិធម៌សម្រាប់គ្រួសារខ្ញុំណាស់។ ក្នុងឱកាសនេះ ខ្ញុំសូមតុលាការដោះលែងឪពុកខ្ញុំវិញ និងផ្តល់ដីឱ្យគ្រួសារខ្ញុំវិញ»។
មន្ត្រីសម្របសម្រួលគម្រោងធុរកិច្ច និងសិទ្ធិមនុស្ស នៃមជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត បានគាំទ្រចំពោះប្រសាសន៍លោកនាយករដ្ឋមន្ត្រី ហ៊ុន សែន។ អ្នកសិទ្ធិមនុស្សរូបនេះ ក៏ស្នើទៅប្រមុខរដ្ឋាភិបាលមានវិធានការដកដីចេញពីអ្នកមានលុយមានអំណាច និងក្រុមហ៊ុនមួយចំនួនដែលបានរំលោភយកដីធ្លីពលរដ្ឋមកប្រគល់ជូនពលរដ្ឋវិញផងដែរ។
លោក វណ្ណ សុផាត ប្រាប់ថា មានក្រុមហ៊ុន និងអ្នកមានលុយមានអំណាចមួយចំនួន នៅតែបន្តរំលោភបំពានយកដីធ្លីរបស់ប្រជាពលរដ្ឋ ដែលបណ្តាលឱ្យប្រជាពលរដ្ឋរងទុក្ខលំបាកខ្វះខាតដីធ្វើកសិកម្ម។
លោក វណ្ណ សុផាត បន្ថែមថា៖ «សំខាន់ដីប្រជាពលរដ្ឋដែលគាត់រស់នៅពីដើមមកហើយនេះ សូមកុំឱ្យអាជ្ញាធរ ឬក៏ក្រុមហ៊ុន ឬឧកញ៉ាទៅរំលោភយកដីរបស់ប្រជាពលរដ្ឋ ហើយបណ្តេញគាត់ចេញពីលំនៅឋានជាដើម។ ឃើញថ្មីៗនេះ តាមរយៈសង្គមហ្វេសប៊ុក ឃើញមានឧកញ៉ា ឬអ្នកមានសក្តិធំមួយចំនួន បានប្រើប្រាស់មន្ត្រីសាធារណៈ ប៉ូលិស យោធា ប៉េអឹម ទៅឈូសឆាយយកដីពលរដ្ឋ ដែលនេះជារឿងមួយសោកស្តាយ ហើយប្រសិនបើសម្តេចចាត់វិធានការលើរឿងហ្នឹងបានទៀត ប្រជាពលរដ្ឋនឹងគាំទ្រសម្តេចមែនទែន»។
អ្នកនាំពាក្យក្រសួងបរិស្ថាន លោក នេត្រ ភក្ត្រា អះអាងថា កម្ពុជាមានព្រៃឈើ ៥០ភាគរយគ្របដណ្តប់ទូទាំងប្រទេស ដែលជាអត្រាមានព្រៃឈើខ្ពស់ជាងគេនៅតំបន់អាស៊ីអាគ្នេយ៍។ លោកថា មកទល់បច្ចុប្បន្ននេះ រដ្ឋាភិបាលបានបង្កើនផ្ទៃដីតំបន់ការពារធម្មជាតិ ដែលស្ថិតនៅក្រោមយុត្តាធិការរបស់ក្រសួងបរិស្ថានរហូតដល់ប្រមាណ ៤១ភាគរយ នៃផ្ទៃដីប្រទេសកម្ពុជា គឺស្មើនឹងប្រមាណ ៧លាន ២សែនហិកតា៕