ស្នងការនគរបាលក្រុងភ្នំពេញ អះអាងថា មន្ត្រីនគរបាលមួយក្រុមដែលចុះបង្ក្រាបមុខសញ្ញាជួញដូរ និងប្រើប្រាស់គ្រឿងញៀនលើសនីតិវិធី ត្រូវដាក់ពិន័យជាលាយលក្ខណ៍អក្សរ ប៉ុន្តែថា កំហុសនោះមិនដល់ថ្នាក់បញ្ឈរជើង ឬបណ្តេញចេញពីក្របខណ្ឌឡើយ។
ការលើកឡើងនេះ បន្ទាប់ពីមានវីដេអូឃ្លីបមួយចែកចាយលើបណ្តាញសង្គមហ្វេសប៊ុក ដោយបង្ហាញពីសកម្មភាពមន្ដ្រីនគរបាលទាត់ធាក់ទៅលើបុរសម្នាក់អំឡុងពេលចាប់ខ្លួន។ បណ្ដាញសង្គមហ្វេសប៊ុក បានរៀបរាប់ថា ក្រុមមន្ត្រីនគរបាលស្លៀកពាក់ស៊ីវិលទាំង ៣រូបនោះ ស្ថិតនៅក្នុងប៉ុស្តិ៍រដ្ឋបាលសង្កាត់ក្បាលកោះ នៅក្នុងខណ្ឌច្បារអំពៅ ហើយអំពើហិង្សានោះបានកើតឡើងកាលពីថ្ងៃទី៣០ ខែមិថុនា។
វីដេអូឃ្លីបបានបង្ហាញបុរសទាំង ៣នាក់ ចាប់ខ្លួនបុរសម្នាក់ចងដៃទៅក្រោយ ហើយលើកដាក់លើម៉ូតូមួយគ្រឿង ប៉ុន្តែ បុរសនោះបានរើបម្រះធ្លាក់ពីលើម៉ូតូ បន្ទាប់មកបុរសម្នាក់បានធាក់ទៅលើបុរសដែលធ្លាក់ពីលើម៉ូតូនោះ។ បន្ទាប់មកទៀត បុរសម្នាក់បានប្រើជង្គង់ទៅសង្កត់លើក្បាលបុរសរូបនោះផ្ទប់ទៅនឹងដី។
ស្នងការនគរបាលរាជធានីភ្នំពេញ លោក ស ថេត មានប្រសាសន៍ទទួលស្គាល់ចំពោះវីដេអូដែលបង្ហោះនៅលើបណ្តាញសង្គមនោះថា សមត្ថកិច្ចលោកបានអនុវត្តលើសពីអ្វីដែលច្បាប់ផ្តល់ឱ្យមែន ប៉ុន្តែ ខាងលោកក៏បានចេញលិខិតព្រមានមន្ត្រីនគរបាលដែលប្រើប្រាស់ហិង្សាលើបុរសរូបនោះហើយដែរ។
លោកបញ្ជាក់ថា នេះជាការព្រមានលើកដំបូង ប៉ុន្តែ បើមន្ត្រីនគរបាលរូបនោះនៅតែប្រព្រឹត្តខុសវិន័យបែបនេះទៀត ពួកគេអាចនឹងត្រូវរងពិន័យរហូតដល់ដកបញ្ឈរជើង ឬបណ្តេញចេញពីក្របខណ្ឌមន្ត្រីនគរបាលជាតិតែម្តង។
លោក ស ថេត មានប្រសាសន៍ថា៖ «នៅក្រោយពេលកើតហេតុហ្នឹងមួយ យើងក៏យកហេតុការណ៍ហ្នឹងមួយជាបទពិសោធន៍សម្រាប់មន្ត្រីនគរបាលរាជធានីភ្នំពេញដែរ ទាំងនៅការិយាល័យជំនាញ ខាងអធិការខណ្ឌមួយចំនួនទៀត សូមឱ្យមានការប្រយ័ត្នប្រយែងនូវអ្វីដែលយើងត្រូវអនុវត្តច្បាប់។ បើដៃគេជាប់ខ្នោះ ឬគេសម្របសម្រួលឱ្យយើងប្រតិបត្តិការតាមច្បាប់ហើយ យើងមិនត្រូវវាយដំ ឬធ្វើទារុណកម្មគេទេ។ ដូច្នេះ សូមអំពាវនាវឱ្យមន្ត្រីជំនាញទាំងអស់ ត្រូវអនុវត្ត ឬធ្វើម៉េចទៅតាមតួនាទីអំណាចដែលផ្តល់ឱ្យបានហើយ»។
នៅលើបណ្ដាញសង្គម Facebook មានការរិះគន់ច្រើនចំពោះប្រតិបត្តិការរបស់សមត្ថកិច្ចទាំងនោះ ដោយថែមទាំងយករូបសមត្ថកិច្ចនៅសហរដ្ឋអាមេរិកសង្កត់កលើបុរសជនជាតិស្បែកខ្មៅរហូតដល់ស្លាប់ មកប្រៀបប្រដូចទៅនឹងសកម្មភាពសមត្ថកិច្ចសង្កាត់ក្បាលកោះដែលយកជង្គង់សង្កត់កបុរសម្នាក់ ដែលសមត្ថកិច្ចអះអាងថា ជាមុខសញ្ញាប្រើប្រាស់ និងចែកចាយគ្រឿងញៀន ខណៈដៃរបស់ជនសង្ស័យបានជាប់ខ្នោះរួចទៅហើយ។
នាយករងអង្គការការពារសិទ្ធិមនុស្សលីកាដូ លោក អំ សំអាត មើលឃើញថា នេះជារូបភាពពីរដាច់ដោយឡែកពីគ្នា។ លោកថា មួយជាកំហុសក្រមសីលធម៌វិជ្ជាជីវៈរបស់មន្ត្រីទាំងនោះក្នុងការអនុវត្តច្បាប់ ដែលត្រូវរងវិន័យតាមបែបបទរដ្ឋបាលនគរបាល ប៉ុន្តែ មួយទៀត ស្ថាប័នសាម៉ីត្រូវស៊ើបអង្កេតបទល្មើសព្រហ្មទណ្ឌទៅលើមន្ត្រីនគរបាលទាំងនោះ ពាក់ព័ន្ធករណីប្រើអំពើហិង្សាទៅលើបុរសរូបនោះផងដែរ។
លោក អំ សំអាត បន្តថា៖ «បើយើងអនុវត្តតែវិន័យរដ្ឋបាល ប៉ុន្តែ បើមើល! វាអាចពាក់ព័ន្ធនឹងបទល្មើសព្រហ្មទណ្ឌទៀត ព្រោះកន្លងមក យើងក៏ឃើញកើតមានច្រើនដែរ ដែលកងកម្លាំងនគរបាលអនុវត្តពិន័យរដ្ឋបាល ហើយអនុវត្តទៅតាមបទល្មើសដែលបានប្រព្រឹត្តហ្នឹងទៅទៀតគឺបទល្មើសព្រហ្មទណ្ឌ។ អ៊ីចឹង អាហ្នឹងត្រូវតែមានការស៊ើបអង្កេតឱ្យបានច្បាស់លាស់ ហើយបើមានបណ្តឹងមានអីពីក្រុមគ្រួសារអីទៀត ហើយយើងឃើញតាមរយៈវីដេអូ យើងឃើញមានការប្រើប្រាស់អំពើហិង្សាអីចឹងមែន អាហ្នឹងគួរតែអនុវត្តទៅតាមបទល្មើសព្រហ្មទណ្ឌមួយទៀតផងដែរ»។
លោក អំ សំអាត មើលឃើញថា ប្រសិនបើករណីទាំងនោះនៅតែបន្តកើតឡើងទៀត នឹងធ្វើឱ្យប៉ះពាល់ដល់កិត្តិយសមន្ត្រីនគរបាលទាំងមូល ប៉ះពាល់អង្គភាព ឬស្ថាប័នអនុវត្តច្បាប់ទាំងនោះផងដែរ។ ករណីនេះ លោកថា ស្ថាប័នជំនាញត្រូវយកជាករណីសិក្សាសម្រាប់អប់រំដល់កងកម្លាំងនគរបាលទូទាំងប្រទេសឱ្យគោរពតាមសីលធម៌វិជ្ជាជីវៈ ដើម្បីចៀសវាងនូវកំហុសបែបនេះកើតឡើងជាថ្មីម្តងទៀត។
កាលពីខែមករា ឆ្នាំ២០២០ មន្ត្រីកងរាជអាវុធហត្ថខេត្តបន្ទាយមានជ័យ ២រូប ត្រូវបានចាប់ និងឃុំខ្លួននៅពន្ធនាគារខេត្ត ដោយចៅក្រមស៊ើបសួរចោទប្រកាន់ពីបទហិង្សាដោយចេតនាមានស្ថានទម្ងន់ទោស ដោយសារមរណភាពនៃជនរងគ្រោះ បន្ទាប់ពីរកឃើញថា ពួកគេប្រើហិង្សាលើពលរដ្ឋមានជម្លោះដីធ្លីបណ្តាលឱ្យពលរដ្ឋម្នាក់ស្លាប់។
មួយខែក្រោយមក សមត្ថកិច្ចខេត្តព្រៃវែង បានបញ្ជូនមន្ត្រីយោធាកងវិស្វកម្មក្រសួងការពារជាតិម្នាក់ទៅសាលាដំបូងខេត្តកាលពីថ្ងៃទី២៦ ខែកុម្ភៈ ហើយសមត្ថកិច្ចអះអាងថា នឹងស្វែងរកចាប់ខ្លួនបក្សពួកផ្សេងទៀតដែលជាមន្ត្រីយោធា ក្រោយពីពួកគេបានលើកគ្នាទៅវាយប្រជាពលរដ្ឋដល់ផ្ទះពេលនោះ៕