ក្រុមកម្មកររោងចក្រកាត់ដេរ ហាណា (HANA) ស្ថិតនៅក្នុងខណ្ឌពោធិ៍សែនជ័យ បានព្យាយាមដើរហែក្បួនតវ៉ារបស់ពួកគេមកកាន់ខុទ្ទកាល័យរបស់លោកនាយករដ្ឋមន្ត្រី ហ៊ុន សែន នៅព្រឹកថ្ងៃនេះ ដើម្បីស្វែងរកអន្តរាគមន៍ជុំវិញវិវាទការងារ ប៉ុន្តែ ត្រូវបានសមត្ថកិច្ចរារាំងទៅវិញ។
កម្មករ-កម្មការិនីជាង ១០០នាក់របស់រោងចក្រ ហាណា នៅថ្ងៃនេះ បាននាំគ្នាដើរហែក្បួនតវ៉ារបស់ពួកគេចេញពីរោងចក្រ ស្ថិតក្នុងភូមិត្រពាំងក្រសាំង នៅក្នុងសង្កាត់ត្រពាំងក្រសាំង ប៉ុន្តែ ត្រូវបានអាជ្ញាធរខណ្ឌពោធិ៍សែនជ័យ រារាំងនៅលើកំណាត់ផ្លូវជាតិលេខ៤ ត្រង់ចំណុចមុខសាលាសង្កាត់ចោមចៅទី៣។
កម្មករផ្នែកវេចខ្ចប់ លោក ណែម ភារម្យ ដែលអះអាងថា បម្រើការងារនៅរោងចក្រ ហាណា ៧ឆ្នាំ ប្រាប់វីអូឌីថា ក្រុមកម្មករសម្រេចទៅរកកិច្ចអន្តរាគមន៍ពីលោកនាយករដ្ឋមន្ត្រី ហ៊ុន សែន ជួយដោះស្រាយវិវាទការងារ ក្រោយពីកម្មករអស់ជំនឿលើការដោះស្រាយរបស់អាជ្ញាធរមូលដ្ឋាន និងក្រុមមន្ត្រីក្រសួងការងារ។
លោក ណែម ភារម្យ និយាយថា៖ «កម្មករចង់ឱ្យសម្តេចជួយផ្តល់យុត្តិធម៌ដល់ពួកគាត់ ព្រោះមន្ត្រីក្រសួងការងារ បានចុះដោះស្រាយច្រើនលើកច្រើនសារហើយ ប៉ុន្តែ ចុះទៅដោះលើកណាក៏ពួកគាត់កាន់ជើងខាងថៅកែ និយាយការពារថៅកែរហូត។ យើងដឹងហើយ ក្រុមហ៊ុនបានសន្យាដោះស្រាយសំណងជូនកម្មករចំនួន ៥ចំណុច តែពេលកម្មករបើកលុយបានតែ ៣ចំណុច។ អ៊ីចឹង កម្មករម៉េចសុខចិត្ត?»
កម្មការិនីផ្នែកដេរ អ្នកស្រី ភឺន សុភា ដែលអះអាងថា បម្រើការងារនៅរោងចក្រ ហាណា ៦ឆ្នាំ ប្រាប់វីអូឌីកន្លែងតវ៉ាថា កាលពីថ្ងៃទី២២ ខែមិថុនា ថៅកែរោងចក្រ ហាណា បានប្រកាសបិទរោងចក្រភ្លាមៗដោយមិនបានជូនដំណឹងមុននោះទេ ហើយកម្មករបានផ្ទុះការតវ៉ាទាមទារសំណងតាមផ្លូវច្បាប់។
មន្ត្រីក្រសួងការងារបានចុះទៅសម្របសម្រួលដោះស្រាយការតវ៉ារបស់កម្មករកាលពីថ្ងៃទី២៣ ខែមិថុនា ហើយភាគីថៅកែរោងចក្រនេះ បានសន្យាដោះស្រាយសំណងចំនួន ៥ចំណុចទៅតាមការទាមទាររបស់ក្រុមកម្មករ។
កម្មការិនីរូបនេះបន្ថែមថា កម្មករ-កម្មការិនីទាមទារសំណងពីរចំណុចបន្ថែមទៀត មានប្រាក់សំណងជំងឺចិត្ត និងប្រាក់ជូនដំណឹងមុន។
អ្នកស្រី ភឺន សុភា ប្រាប់ថា៖ «ពួកខ្ញុំសុំឱ្យសម្តេចជួយដោះស្រាយដល់កូនចៅជាកម្មករកម្មការិនីរបស់រោងចក្រ ហាណា ចំនួនពីរចំណុចទៀតទៅតាមផ្លូវច្បាប់ផង។ ពួកខ្ញុំមិនទាមទារអ្វីលើសពីផ្លូវច្បាប់នោះទេ»។
អភិបាលខណ្ឌពោធិ៍សែនជ័យ លោក ហែម ដារិទិ្ធ ដែលចុះសម្របសម្រួលដោះស្រាយការតវ៉ារបស់កម្មករនេះ មានប្រសាសន៍ថា អាជ្ញាធរមិនបានរារាំងកម្មករមិនឱ្យទៅខុទ្ទកាល័យនោះទេ។
លោកថា អាជ្ញាធរគ្រាន់តែចង់ឱ្យកម្មករចាត់ជាតំណាង ៣ ឬ ៤នាក់ជិះឡាន ឬមធ្យោបាយធ្វើដំណើរផ្សេងៗដើម្បីយកញត្តិទៅដាក់ ជាជាងធ្វើដំណើរដោយថ្មើរជើង ដែលលោកថា ធ្វើប៉ះពាល់ដល់សណ្តាប់ធ្នាប់សាធារណៈ។
លោក ហែម ដារិទ្ធិ ប្រាប់ថា៖ «ក្នុងនាមខ្ញុំជាអភិបាលខណ្ឌ គឺខ្ញុំចុះមកហ្នឹងមិនមែនចុះមករារាំង ឬទប់ស្កាត់ពួកគាត់ទេ គឺចុះមកដោះស្រាយជាជំហាននៅទីនេះសិន។ បើយើងដោះនៅទីនេះចេញ វាប្រសើរជាងគាត់ទៅដោះនៅទីនោះ[ខុទ្ទកាល័យនាយករដ្ឋមន្ត្រី] ហើយខ្ញុំគោរពអញ្ជើញខាងក្រសួង និងអ្នកដែលពាក់ព័ន្ធមកដោះនៅទីនេះផ្ទាល់តែម្តង»។
ក្រោយពីអាជ្ញាធររារាំង និងសម្របសម្រួលដោះស្រាយជាង ៣ម៉ោង ក្រុមកម្មករសម្រេចរំសាយត្រឡប់ទៅរោងចក្រវិញ បន្ទាប់ពីអភិបាលខណ្ឌ លោក ហែម ដារិទិ្ធ សន្យាធ្វើជាតំណាងរបស់កម្មករ ហើយចូលទៅដោះស្រាយជាមួយភាគីរោងចក្រនៅម៉ោង ៤រសៀលថ្ងៃនេះ។
មន្ត្រីក្រសួងការងារ និងបណ្តុះបណ្តាលវិជ្ជាជីវៈ លោក ខៀវ សាវុធ ដែលចុះដោះស្រាយវិវាទការងារនេះ មានប្រសាសន៍ថា ក្នុងករណីថៅកែបិទទ្វាររោងចក្រ ហើយបញ្ឈប់ទាំងអស់បែបនេះ គឺថៅកែត្រូវដោះស្រាយសំណងជូនកម្មករចំនួន ៣ចំណុចប៉ុណ្ណោះ មានប្រាក់ឈ្នួលចុងក្រោយ ប្រាក់អតីតភាពការងារ និងប្រាក់ដំណាច់ឆ្នាំដែលនៅសល់។
លោក ខៀវ សាវុធ ប្រាប់ថា៖ «កាលគេបិទរោងចក្ររួមគ្នាអ៊ីចឹង គេគិតឱ្យតែបីចំណុចទេ។ តែបើបញ្ឈប់ខ្លះ ទុកខ្លះ អាហ្នឹងគេគិតឱ្យបួនចំណុច។ ប៉ុន្តែ បើថៅកែបញ្ឈប់កម្មករ ២ ឬ ៣នាក់ អាហ្នឹងគេគិតឱ្យដូចការទាមទាររបស់ពួកគាត់នេះហើយ[គិត៥ចំណុច]»។
ប៉ុន្តែ កិច្ចព្រមព្រៀងរវាងតំណាងកម្មករ និងតំណាងក្រុមហ៊ុន ក្រោមការសម្របសម្រួលដោះស្រាយពីមន្ត្រីក្រសួងការងារកាលពីថ្ងៃទី២៣ ខែមិថុនា បញ្ជាក់ថា ថៅកែបានសន្យាផ្តល់សំណងជូនកម្មករចំនួន ៥ចំណុចស្របទៅតាមច្បាប់ស្តីពីការងារ។
មន្ត្រីផ្នែកច្បាប់ និងដោះស្រាយវិវាទនៃសម័្ពន្ធសហជីពស៊ីខៅឌូ លោក ស៊ាង យ៉ូត ធ្លាប់ប្រាប់វីអូឌីថា តាមផ្លូវច្បាប់នៅពេលដែលរោងចក្របិទ ឬបញ្ឈប់កម្មករពីការងារ គឺការដោះស្រាយសំណងជូនកម្មករ ត្រូវពឹងផ្អែកទៅតាមកិច្ចសន្យាការងារ។
មន្ត្រីផ្នែកច្បាប់រូបនេះ បញ្ជាក់ថា ក្នុងករណីកម្មករប្រើប្រាស់កិច្ចសន្យាមិនកំណត់ ថៅកែត្រូវទូទាត់សំណងជូនកម្មករចំនួន ៥ចំណុច រួមមាន ប្រាក់ខែចុងក្រោយ ប្រាក់ជូនដំណឹង ប្រាក់អតីតភាពការងារ ប្រាក់ជំងឺចិត្ត និងប្រាក់ដំណាច់ឆ្នាំដែលនៅសល់។
ប៉ុន្តែ សម្រាប់កម្មករប្រើប្រាស់កិច្ចសន្យាកំណត់វិញ ថៅកែត្រូវទូទាត់សំណងជូនពួកគេចំនួន ៤ចំណុច រួមមាន ប្រាក់ឈ្នួលចុងក្រោយ ប្រាក់៥ភាគរយ ប្រាក់ដំណាច់ឆ្នាំដែលនៅសល់ និងប្រាក់ជំងឺចិត្ត ក្នុងករណីកិច្ចសន្យាការងាររបស់ពួកគេនៅសល់។
អ្នកគ្រប់គ្រងទូទៅនៅរោងចក្រ ហាណា អ្នកស្រី ទី សុធីតា ប្រាប់វីអូឌីកាលពីសប្ដាហ៍មុនថា រោងចក្រ ហាណា ជារោងចក្រផលិតម៉ាស់ និងសម្លៀកបំពាក់ ដែលមានកម្មករសរុប ៦៦៩នាក់។ អ្នកស្រីថា ថៅកែសម្រេចបិទទ្វាររោងចក្រដោយសារគ្មានអ្នកបញ្ជាទិញ៕
