រដ្ឋាភិបាលបានសម្រេចពន្យារពេល ៣ខែបន្ថែមទៀត សម្រាប់ពលរដ្ឋផ្ទេរកម្មសិទ្ធិយានយន្តរបស់ពួកគេ ខណៈចំនួននៃការផ្ទេរកម្មសិទ្ធិយានយន្តនៅរយៈពេល ៣ខែចុងក្រោយនេះ កើនឡើងខ្ពស់។
ឱសានវាទសម្រាប់ការផ្ទេរកម្មសិទ្ធិយានយន្តដែលកំណត់ដោយក្រសួងសាធារណការ និងដឹកជញ្ជូន បានផុតកំណត់កាលពីថ្ងៃម្សិលមិញ ក្រោយពីក្រសួងបានប្រកាសប្រាប់ពលរដ្ឋឱ្យផ្ទេរកម្មសិទ្ធិយានយន្តចាប់ផ្ដើមតាំងពីដើមខែមីនាក្នុងឆ្នាំនេះ។
អគ្គនាយកនៃអគ្គនាយកដ្ឋានដឹកជញ្ជូនផ្លូវគោករបស់ក្រសួងសាធារណការ និងដឹកជញ្ជូន លោក ឈួន វ៉ន់ បានឱ្យដឹងថា ដំណើរការផ្ទេរកម្មសិទ្ធិយានយន្តនេះ ត្រូវបានក្រសួងសម្រេចពន្យារពេល ៣ខែទៅមុខទៀត ចាប់ពីដើមខែកក្កដារហូតដល់ចុងខែតុលាខាងមុខ ដោយក្រសួងបានសម្រួលនីតិវិធីមួយចំនួនសម្រាប់ពលរដ្ឋដែលមានបំណងស្នើសុំផ្ទេរកម្មសិទ្ធិ។
លោក ឈួន វ៉ន់ ប្រាប់ថា៖ «ដោយសារបងប្អូនប្រជាពលរដ្ឋយើងគាត់មកផ្ទេរកម្មសិទ្ធិមានចំនួនច្រើន ជាពិសេសដូចជាខាងមន្ទីរមួយចំនួនបានរាយការណ៍មកថា កាលមុនមួយខែបានតែ ៥០គ្រឿងទេ ឥលូវកន្លះខែនៃខែ៦នេះដល់មួយពាន់គ្រឿងជាង។ ចំនួននេះវាច្រើន ហើយខាងយើងមានការលំបាកក្នុងការធ្វើឱ្យទាន់ពេលវេលាជូនខាងបងប្អូនយើង។ អ៊ីចឹង យើងសុខចិត្តពន្យារពេលបន្តទៀត ដោយថា ឃើញបងប្អូនចូលរួមសហការតាមការជូនដំណឹងរបស់[ក្រសួងសាធារណការ និងដឹកជញ្ជូន]យើង»។
លោក ឈួន វ៉ន់ បានឱ្យដឹងបន្ថែមថា ការផ្ទេរកម្មសិទ្ធិយានយន្ត សម្រេចបានជាង ៨ពាន់គ្រឿងនៅចន្លោះថ្ងៃទី១២ ខែមីនា ដល់ដំណាច់ខែមិថុនា ឬមានកំណើនជាង ៧០ភាគរយ បើធៀបទៅនឹងរយៈពេលដូចគ្នាកាលពីឆ្នាំមុន។
ទោះជាយ៉ាងណា លោក ឈួន វ៉ន់ ប្រាប់ថា លោកមិនអាចបញ្ជាក់បានថា តើយានយន្តប៉ុន្មានគ្រឿងនៅមិនទាន់ត្រូវបានផ្ទេរកម្មសិទ្ធិនៅឡើយទេរហូតមកដល់ពេលនេះ ដោយលោកថា ក្រសួងមិនអាចកំណត់ចំនួនបានជាក់លាក់នោះឡើយ ដោយសារតែការទិញលក់ ត្រូវបានធ្វើឡើងពីពលរដ្ឋម្នាក់ទៅពលរដ្ឋម្នាក់ទៀត។
ប្រធាននាយកដ្ឋានព័ត៌មានវិទ្យា និងទំនាក់ទំនងសាធារណៈ នៃក្រសួងសាធារណៈការ និងដឹកជញ្ជូន លោក ហ៊ាង សុទ្ធាយុត្តិ បានឱ្យដឹងថា យានយន្តដល់ទៅ ២៦៥,០០០គ្រឿង ត្រូវបានស្នើសុំចុះបញ្ជីនៅក្រសួងចាប់ពីដើមខែមករារហូតដល់ថ្ងៃទី១ ខែកក្កដានេះ ក្នុងនោះមានរថយន្តធុនធ្ងន់ ៩,៥០០គ្រឿង រថយន្តលក្ខណៈគ្រួសារ ៣៩,៤០០គ្រឿង ហើយយានយន្តជាង ២១ម៉ឺនគ្រឿងទៀត គឺជាម៉ូតូរ៉ឺម៉ក ឬទោចក្រយានយន្ត។
លោក ហ៊ាង សុទ្ធាយុត្តិ បានឱ្យដឹងទៀតថា រថយន្តសរុបជាង ១ម៉ឺន ២ពាន់គ្រឿង ត្រូវបានស្នើសុំផ្ទេរកម្មសិទ្ធិនៅក្នុងរយៈពេល ៦ខែក្នុងឆ្នាំនេះ ក្នុងនោះមានរថយន្តគ្រួសារ និងរថយន្តដឹកទំនិញធុនតូចមានចំនួនដល់ទៅ ១១,៦៥០គ្រឿង។
ប្រជាពលរដ្ឋរស់នៅរាជធានីភ្នំពេញ លោក ចំរើន ធី បានឱ្យដឹងថា លោកបានទៅផ្ទេរកម្មសិទ្ធិយានយន្តមកជាកម្មសិទ្ធិផ្ទាល់ខ្លួនលោករួចហើយ ហើយលោកប្រាប់ថា ដំណើរការស្នើសុំផ្ទេរកម្មសិទ្ធិនេះ ឆ្លងកាត់នីតិវិធីជាច្រើន ដែលលោកថា នាំឱ្យចំណាយពេលវេលាយូរ និងមានភាពស្មុគស្មាញ។
លោក ចំរើន ធី និយាយថា៖ «យើងរត់ចុះរត់ឡើងទៅក្រសួងផង ទៅប៉ុស្តិ៍ប៉ូលិសផង មកបង់ពន្ធ ហើយមកបញ្ជាក់អត្តសញ្ញាណបណ្ណនៅខណ្ឌទៀត។ វាច្រើនគន្លាក់ មានអារម្មណ៍ថា ពិបាកដែរ ព្រោះថា យើងខាតពេលរកស៊ី ចំណូលយើងតិចតួចផង ហើយយើងរវល់រត់លិចរត់កើត រត់ចុះរត់ឡើង ប៉ះពាល់ដល់ជីវភាពយើងរកស៊ីជីវភាពយើងរាល់ថ្ងៃដែរ»។
លោក ជិន នី ដែលអះអាងថា ជាអ្នករត់តាក់ស៊ីពីភ្នំពេញទៅខេត្តកំពង់ស្ពឺ និយាយថា លោកខកខានមិនបានទៅផ្ទេរកម្មសិទ្ធិយានយន្តរបស់លោកទៅតាមពេលវេលាកំណត់ដោយរដ្ឋាភិបាល ប៉ុន្តែ លោកប្រាប់ថា លោកកំពុងព្យាយាមរៀបចំឯកសារដើម្បីស្នើសុំផ្ទេរកម្មសិទ្ធិនៅសប្ដាហ៍នេះ។
គាត់បានរៀបចំឯកសារដើម្បីត្រៀមទៅសុំផ្ទេរកម្មសិទ្ធិយានយន្តនាសប្តាហ៍ក្រោយនេះ ដើម្បីងាយស្រួលគ្រប់គ្រងយានយន្តរបស់លោកនៅពេលជួបបញ្ហាប្រឈមផ្សេងៗដោយយថាហេតុ។
លោក ជិន នី និយាយថា៖ «ដោយសារគេរកអត្តសញ្ញាណបណ្ណបញ្ជាក់ពីអាជ្ញាធរមូលដ្ឋាន នៅពេលខ្ញុំបានឯកសារគ្រប់គ្រាន់ ខ្ញុំទៅកាត់ឈ្មោះ[ផ្ទេរកម្មសិទ្ធិ]ដែរហើយ»។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ បានជំរុញទៅរដ្ឋាភិបាលឱ្យផ្ដល់សេវាកម្មជាកញ្ចប់ទៅដល់ប្រជាពលរដ្ឋ ដោយលោកថា ដើម្បីជួយសម្រួលដល់ពលរដ្ឋដែលទៅស្វែងរកសេវាសាធារណៈមួយនេះ។
លោក សន ជ័យ ប្រាប់ថា៖ «រងគ្រោះដោយសារខ្វះខាតក្នុងការឆ្លើយតប ក្នុងការផ្តល់សេវាបញ្ជាក់ឯកសារ។ ទីពីរ គាត់អាចខាតបង់ផលប្រយោជន៍ទិញឡានហើយយកលុយទៅសូកគេបន្តិចបន្តួច ដើម្បីធ្វើឯកសារបញ្ជាក់ទៀត។ ទីបី គាត់អាចប្រឈមនឹងផ្លូវច្បាប់ បើសិនជាគាត់មិនទៅបំពេញ កាត់ឈ្មោះឱ្យទាន់ពេលវេលាដែលបានកំណត់ដោយក្រសួងសាធារណការ និងដឹកជញ្ជូន»។
កាលពីខែមិថុនាឆ្នាំមុន រដ្ឋាភិបាលបានសម្រេចតម្រូវឱ្យពលរដ្ឋផ្ទេរកម្មសិទ្ធិយានយន្តរបស់ពួកគេឡើងវិញ ៣ឆ្នាំក្រោយពីលោកនាយករដ្ឋមន្ត្រី ហ៊ុន សែន សម្រេចឱ្យផ្អាកអនុវត្តន៍កាលពីដើមឆ្នាំ២០១៦កន្លងមក៕
